اعمال 18
18
پولُس قُرِنتُسدا
1بو زادلاردان سورا، پولُس آتِندان چیخدی و قُرِنتُس شَهرینه گئتدی. 2اؤردا پولُس بیر آکیلا آدلی یهودی کیشی اینن آشنا اولدو. او کیشی پونتوس ولایتینینگ آداملاریندان ایدی و تازّالیگدا آروادی اینان کی آدی پْریسکیلا ایدی ایتالیا دان گلمیشدی. بو سَبریه کی روم پادشاهی، کْلودیوس فرمان وئرمیشدی کی واری یهودیلار رومدان چیخَسیلَر. پولُس اوللارینگ گؤرمکینه گئتدی 3و بو خاطره کی پولُسینگ ایشی دا اوللار لهیین چادر تیکمَک ایدی، اوللار یانیندا قالدی و ایش گؤردو. 4پولُس هَر شنبه، یهودیلارینگ عبادتگاهیندا بحث ائدیردی و تلاش ائدیردی تا یهودیلاری و یونانلیلاری مُجاب ائده.
5اوندا کی سیلاس و تیموتائوس مَقدونیه منطقهسیندَن ائتیشدیلَر، پولُس تارئ کلامینی اعلام ائدمَکه مشغول ایدی و یهودیلارا گواهلیگ وئریردی کی عیسا ائله او وَعده وئریلَن مَسیح دیر. 6آما اوندا کی اوللار پولُس اینان ضِدّ ائدیلَر و بئلَسینی سؤیدیلر، او اؤز قاباسینی سیلکهلهدی تا اوللار ضِدّینه بیر شهادت اولا و اوللارا دئدی: «قانینز اؤز بوینونزا! منده تَقصیر یوخ. ایندیدَن بئله غیرییهودیلارا ساری گئدهرَم.» 7پولُس اؤردان چیخدی و گئتدی بیر کیشینینگ ائوینه کی آدی تیتیوس یوستوس ایدی. بو کیشی تارئیی پَرست ائدیردی. اؤنونگ ائوی عبادتگاهینگ پهلیسینده ایدی. 8عبادتگاه رئیسی، کْریسپوس اوباسی آدامی اینان واری بئلینه رَبّه ایمان گتیردیلَر. قُرِنتُس خلخینینگ چوخو پولُسینگ سؤزلَرینی ائشیدَنده، ایمان گتیردیلر و تَعمید غُسلی توتدولار. 9بیر گئجه رَب دیشده پولُسا دئدی: «قورخما! بلکی دانیش و بی سَس تورما! 10بو خاطره کی من سنینگ ایننم و هئچ کَس سَنه حمله ائدمَز تا باشینگا بیر قَضّا گتیره. بو سَبریه کی من بو شَهرده چوخ آدام واریم کی منیم خلخیم دیرلار.» 11پس پولُس بیر ایل یاریم اؤردا قالدی و تارئ کلامینی اوللارا تَعلیم وئردی.
12آما اوندا کی گالیو، اَخائیه منطقهسینینگ والیسی ایدی، یهودیلار بیرلیکده پولُس ضدّینه توردولار آیاقی و اؤنو گتیردیلَر مَحکمه حُضورونا. 13اوللار دئییرلَردی: «بو کیشی خلخی مُجاب ائدیر کی شَریعت دئدیگی یولونگ برعَکسینه تارئیی پَرست ائدلَّر.» 14ائله پولُس سئیردی دانیشا کی، گالیو یهودیلارا دئدی: «ای یهودیلار، اگر بیر پیس ایش یا دا بیر سَخت جُرم آرادا وار ایدی، من بیر دلیل واریم ایدی کی سیزینگ شکایتینزی قبول ائدم. 15آما بو سَبریه کی بو مُرافا اؤز سؤزلَرینز و آدلارینز و شَریعتینز اوستونه دیر، اؤزونز بونو حَل ائدینز. من سئمئیرَم کی بو زادلارا حکم ائدَم.» 16و بئللَرینی مَحکمهدن آتدی یازّیا. 17اوللارینگ واریسی عبادتگاه رئیسی، سوستِنِسی توتدولار و مَحکمه قَرشیسینده بئلَسینی ووردولار. آما گالیو بوللارینگ هئچ بیرینه اعتنا ائدمهدی.
پولُس بؤکولدو اَنطاکیهیه
18بو تَفاقدان سورا، پولُس چوخ گؤنلَر قُرِنتُسدا قالدی و اوندان سورا، کاکالاردان آیریلدی و دریا یولوندان گئتدی سوریهیه. پْریسکیلا و آکیلا دا پولُس اینان ایدیلار. پولُس کِنخْریهده باشینی قیرخدی، بو سَبریه کی نَذر ائدمیشدی. 19اوللار اَفِسُسا گلَنده، پولُس اؤردا اوللاردان آیریلدی و اؤزو گئتدی عبادتگاها و یهودیلار اینن بحث ائدیردی. 20اوندا کی اوللار پولُسدان سئدیلَر کی بیر مُدّت آرتیق اوللار اینان قالا، او قبول ائدمهدی. 21آما اوللار اینان خدافظلیگ ائدنده بئللَرینه دئدی: «اگر تارئ سئیه، دؤنرَم یانینزا.» و کشتییه میندی و اَفِسُسدان چیخدی. 22قیصریهده کشتیدَن ائننده، کلیسا آداملارینینگ گؤرمَکینه گئتدی، اوندان سورا دا گئتدی اَنطاکیه شَهرینه. 23بیر مُدّت اؤردا قالاندان سورا اؤردان چیخدی و غَلاطیه و فْریجیه منطقهلَرینینگ واری یئرلَرینه گئتدی و واری شاگردلَری ایماندا تقویت ائدی.
آپولُس جرأت اینن اَفِسُسدا دانیشیر
24بیر آپولُس آدلی یهودی کی اسکندریه شَهرینینگ آدامی ایدی، گلدی اَفِسُس شَهرینه. بو کیشی دانیشماکدا چوخ ماهر ایدی و مُقدّس یازیلیلاری دا چوخ خوب بیلیردی. 25بو آدام رَبّ یولوندا تَعلیم توتموشدو و غیرت اینن دانیشیردی و دقّت اینن عیسا بارهسینده تَعلیم وئریردی. هَرچند کی فقط یحیا تَعمیدیندَن خبر واری ایدی. 26آپولُس یهودیلارینگ عبادتگاهیندا جرأت اینن دانیشماکا باشلادی. آما پْریسکیلا و آکیلا اؤنونگ سؤزلرینی ائشیدَنده بئلَسینی آپاردیلار اؤز یانلارینا و تارئ یولونو دقیقتر اؤنا اؤرگتدیلر.
27اوندا کی آپولُس سئيردی گئده اَخائیه منطقهسینه، کاکالار بئلَسینی تشویق ائدیلَر و باقّی شاگردلَر ایچی یازدیلار کی اؤنو خوش ایز اینان یوئودالّار. آپولُس اؤرا ائتیشنده، اوللارا کی فِیض واسطهسی اینن ایمان گتیرمیشلَردی چوخ کؤمَک ائدی. 28چونکی واری کَسینگ حُضوروندا یهودیلارینگ نَظرلَرینی سفت و سَخت رَد ائدیردی و مُقدّس یازیلیلار طَریقیندَن ثابت ائدیردی کی عیسا ائله او وَعده وئریلَن مَسیح دیر.
Currently Selected:
اعمال 18: QII
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
