بیرینجی نامه، قُرِنتلیلَره 9
9
پولُس اؤز حَقّیندَن گچیر
1بئیه من آزاد دهییلَم؟ بئیه من بیر حَواری دهییلَم؟ بئیه من رَبّیمیز عیسایی گؤرمهمیشَم؟ بئیه سیز، منیم ایشیمینگ ثَمرهسی رَبده دهییلَینز؟ 2اگر آیری آداملار ایچی بیر حَواری دهییلَم، حداقل سیزینگ ایچی کی بیر حوارییام؛ چونکی سیز، او تأیید مُهرییانز کی ثابت ائدیر من، رَبده بیر حَوارییام.
3اوللار قَرشیسینده کی منیم بارهمده حکم ائدیرلَر، دفاعیم بو دیر. 4بئیه بیز بو حَقّی یوخوموز کی یئیک و ایچَک؟ 5بئیه بیز بو حَقّی یوخوموز کی باقّی حَواریلار لهیین، رَب عیسانینگ کاکالاری لهیین و کیفا لهیین، بیر ایماندار آرواد آلاک و یانیمیز سورا آپاراک؟ 6یا دا فقط من و بارنابایاک کی گؤنوموزو گچیردمَک ایچی ایش گؤرهسیک؟
7کیم دیر کی اؤز خَرجی اینن سربازلیگ ائده؟ کیم دیر کی بیر اوزوم باغی اَکه و اؤنونگ میوهسیندن یئمهیه؟ یا دا کیم دیر کی بیر سورویی چوبانلیگ ائده آما اؤنونگ سؤدوندَن ایچمهیه؟ 8بئیه من بو سؤزلَری بَشر فِکری اینان دئییرَم؟ بئیه شَریعت دا ائله بوللاری دئمئیر؟ 9چونکی موسی شَریعتینده یازیلمیش کی: «خَرمنی دؤیَن سیقیرینگ آغیزینی، باغلاما.» بئیه تارئ سِقیر قیدینده؟ 10بئیه او گرچکدَن بونو بیزیم اؤزوموز ایچی دئمئیر؟ بو سؤز بیزیم خاطریمیزه یازیلمیش. بو سَبریه کی یئری خیش ائدَن، امید اینن خیش ائدهسی و خَرمنی دؤیَن دا امید اینن دؤیهسی، سَهم آپارماک امیدی اینن. 11اگر بیز روحانی دانلار سیزینگ آراینزدا اکمیشَک، ایندی بو سیزه چوخ گلیر کی سیزدَن جسمانی زادلار بیچَک؟ 12اگر آیری آداملار بو حَقّی وارلاری کی بیر بئلهیین زاد سیزدَن سئیلّر، بئیه بیز آرتیق حَق یوخوموز؟
آما بیز بو حَقدن هئچ بهره آپارمامیشاک، بلکی واری زادی آلیراک جانیمیزا تا مَسیح اینجیلینینگ یولو ایچینه هئچ مانع قؤیمامیش اولاک. 13بئیه بیلمئیرَینز مَعبد ایچینده ایش گؤرَنلَر، خورَکیلَرینی مَعبددَن گؤتورورلَر و قُربانگاهدا خدمت ائدَن آداملار، تقدیم اولموش قُربانلوقلاردان سَهم آپاریرلار؟ 14ائله بئلهیین دا، رَب حکم ائدی کی اینجیلی اعلام ائدَن آداملارینگ روزیسی، اینجیل طریقیندَن وئریلهسی.
15آما من بو حَقلَرینگ هئچ بیریندَن نه بهره آپارمیشام، نه دا بوللاری یازیرام تا بو ایشلَر منیم ایچی اولونا. چونکی منیم ایچی ائله یئیتر دیر کی اؤلَم تا بو کی بیری منیم فَخریمی هئچ ائده. 16چونکی اگر من اینجیلی اعلام ائدیرَم، بو بئلیمه بو حَقّی وئرمئیر کی فَخر ائدَم. چون بیر وظیفه دیر کی منیم بوینوما قؤیولموش. وای منیم حالیما اگر بو اینجیلی اعلام ائدمهیَم! 17بو خاطره کی اگر بو ایشی اؤز میلیم اینن گؤرَم، بیر اَجر واریم؛ آما اگر اؤز میلیم اینن گؤرمهیَم، فقط منه تاپشیریلان وظیفهیی یئرینه ائتیشتیریرَم. 18پس منیم اَجریم نه دیر؟ فقط بو کی اینجیلی مُفت اعلام ائدَم و اؤز حَقّیمدَن کی اینجیلده واریم، بهره آپارمایام.
19چونکی هَر چند واری کَسدَن آزادام، آما اؤزومو واری کَسینگ غُلامی ائدمیشَم تا بئله آرتیق آداملاری مَسیح ایچی اَله گتیرَم. 20یهودیلار یانیندا بیر یهودی لهیین اولدوم، تا یهودیلاری مَسیح ایچی اَله گتیرَم. او آداملار یانیندا کی شَریعت آلتیندا دیرلار، بیر آدام لهیین اولدوم کی شَریعت آلتیندا دیر، تا شَریعت آلتیندا اولانلاری، مَسیح ایچی اَله گتیرَم. هَر چند کی اؤزوم شَریعت آلتیندا دهییلَم. 21او آداملار یانیندا کی شَریعت آلتیندا دهییلَر، بیر آدام لهیین اولدوم کی شَریعت آلتیندا دهییل، تا شَریعت آلتیندا اولمایانلاری مَسیح ایچی اَله گتیرَم، هرچند کی اؤزوم تارئ شَریعتیندَن چیخمئیرَم، بلکی مَسیح شَریعتی آلتیندایام. 22ضعیفلَر ایچی، ضعیف اولدوم تا ضعیفلَری مَسیح ایچی اَله گتیرَم. واری کَس ایچی، واری زاد اولموشام تا هر طور کی اولموش بیر پارا آدامی نجات وئرم. 23بوللارینگ واریسینی اینجیل خاطرینه ائدیرَم تا بلکم بَرکتلَرینده سَهمیم اولا.
24بئیه بیلمئیرَینز کی مُسابقه میدانیندا، قَچنلَرینگ واریسی قَچیرلَر، آما فقط بیر نفر دیر کی جایزهیی آپاریر؟ پس سیز ائله قَچینز کی جایزهیی آپارانز. 25هَر کَس کی مُسابقه وئریر، واری زاددا نَفْسی جلوسینی توتیر. اوللار بئلهیین ائدیرلَر کی بیر آرادان گئدَن تاجی اَله گتیرلَّر؛ آما بیز بئلهیین ائدیرَک کی بیر آرادان گئدمهیَن تاجی ائله گتیرَک. 26پس من هَدفسیز قَچمئیرَم و بیر آدام لهیین کی هوایا یوموروغ آتیر، ویل یوموروغ آتمئیرام. 27بلکی اؤز بدنیمی تربیت ائدیرَم و اوسارینی آلیرام اَلیمه، تا ائدمئیه بوندان سورا کی باقّی آداملارا اینجیلی اعلام ائدیم، اؤزوم رَد اولام.
Currently Selected:
بیرینجی نامه، قُرِنتلیلَره 9: QII
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
