بیرینجی نامه، قُرِنتلیلَره 7
7
ائولَنمگ اُصولی
1ایندی، منه یازدیگینز مَسئلهلَر بارهسینده:
دئییرَینز کی، «بیر کیشی ایچی خوب دیر کی اَلی آروادا دهییمهیه.» 2آما عِفّتسیزلیگ ائدمَک وَسوَسهسی سَبرسینه، هر کیشی اؤز آروادینی واری اولاسی و هَر آرواد دا اؤز اَرینی واری اولاسی. 3اَر، اؤز دئینینی آروادی حَقّینده یئرینه ائتیشتیرهسی و ائله بئله دا آرواد، اؤز دئینینی اَری حَقّینده. 4بو خاطره کی آرواد اؤز بدنینینگ اختیارینی یوخو، بلکی اؤنونگ صاحب اختیاری اَری دیر، ائله بئله دا اَر، اؤز بدنینینگ اختیارینی یوخو، بلکی آروادی اؤنونگ صاحب اختیاری دیر. 5بیر بیری بی بَهره قؤیمانز، بهغیری بیر بیر رضایتی اینن او دا بیر مُدّت ایچی، کی اؤزونزو دُعایا وَقف ائدَینز. آما اوندان سورا گئنه بیر بیره قوشولینز تا بئله شیطان بو سَبریه کی نَفْسینزینگ جلوسینی توتا بیلمئیرَینز بئلَینزی وَسوَسهیه آتمایا. 6بو سیزه دئدیگیم گپ بیر حکم لهیین دهییل، بلکی دئییرَم کی سیز بو ایشینگ اجازهسینی وارینز. 7کاش واری کَس منیم اؤزوم لهیین ایدیلَر. آما تارئ هَرکَسه بیر عَطا وئرمیش. بیری بیر رَقم عَطا واری و او بیری دا بیر آیری رَقم.
8مُجرّدلَره و دوللارا، دئییرم، بئللَری ایچی خوب دیر کی منیم لهیین، ائله ائولنمهمیش قالالّار. 9آما اگر اؤز نَفْسلَرینینگ جلوسینی توتا بیلمئیرلَر، ائولَنهسیلَر. چونکی ائولنمَک، هَوی و هَوس اوتوندا یانماکدان یئی دیر.
10منیم حکمیم اوللار ایچی کی ائولَنمیشلَر بو دور، اَلبت نه منیم حکمیم، بلکی رَبّینگ حکمی دیر کی: آرواد، اَریندَن آیریلمایاسی. 11آما اگر آیریلا، داها اَره گئدمیهسی یا دا اَری اینن صُلح ائدهسی. اَر دا آروادینی طلاق وئرمیهسی.
12آداملارینگ قالیقینا دئییرَم، اَلبت من دئییرم، نه رَب کی: اگر بیر کاکانینگ آروادی ایمان گتیرمهمیش و او آرواد اؤنونگ اینان زندلیگ ائدمَکه راضی اولا، او کیشی آروادینی طلاق وئرمیهسی. 13اگر بیر آروادینگ اَری ایمان گتیرمهمیش و او کیشی اؤنونگ اینان زندلیگ ائدمَکه راضی اولا، او آرواد اَریندَن طلاق آلمایاسی. 14چون او اَر کی ایمان گتیرمهمیش، آروادی سَبرسینه مُقدّس اولیر، او آرواد دا کی ایمان گتیرمهمیش اَری سَبرسینه مُقدّس اولیر. بئله اولماسایدی، سیزینگ اوشاقلارینز، ناپاک ایدیلار؛ آما بئله دهییل، اوللار مُقدّس دیرلار. 15آما اگر ایمان گتیرمهمیش آرواد یا اَر سئیه کی آیریلا، قؤی تا بئله اولا. بیر بئلهیین مَسئلهلَرده او کاکا یا او باجی اَسیر دهییل. تارئ، بیزی صُلح و سلامتلیگه چاغیرمیش. 16چونکی ای آرواد، سَن هاردان بیلیرَینگ، شاید اَرینگی نجات وئردینگ؟ یا دا سَن ای اَر، هاردان بیلیرَینگ شاید آروادینگی نجات وئردینگ؟
او رَقم زندلیگ ائدینز کی بئلَسی ایچی چاغیریلموشاینز
17فقط، هَر آدام او رَقم زندلیگ ائدسین کی رَب بئلَسی ایچی مَعین ائدمیش و تارئ بئلَسینی اؤنا چاغیرمیش. واری کلیسالاردا بو منیم قانونیم دیر. 18آیا بیری وار ایمیش کی تارئ بئلَسینی چاغیراندا، سُنّت اولموش ایمیش؟ او آدام بونونگ قولونجوندا اولماسین کی سُنّت اولدوگونو پناه ائده. آیا بیری وار ایمیش کی تارئ بئلَسینی چاغیراندا، سُنّت اولماموش ایمیش؟ او آدام سُنّت اولماک قولونجوندا اولماسین. 19چونکی نه سُنّت اولماک مهم دیر، نه دا سُنّت اولمازلیگ. بلکی مهم تارئنینگ حکملارینا عمل ائدمَک دیر. 20هَر کَس، هَر وضعده کی تارئ بئلَسینی چاغیرمیش، ائله او وضعده قالسین. 21اوندا کی چاغیریلدینگ غُلام ایدینگ؟ هئچ فکرینه گئدمه. آما اگر اؤزونگو آزاد ائده بیلیرَینگ، فُرصتی اَلدن وئرمه. 22چون او آدام کی رَب طرفیندَن چاغیریلاندا غُلام ایمیش، رَبّینگ آزاد آدامی دیر. ائله بئله دا او آدام کی چاغیریلاندا آزاد ایمیش، مَسیحنینگ غُلامی دیر. 23بیر بَها وئریلمیش سیزینگ آلینماکینز ایچی؛ آداملار غُلامی اولمانز. 24پس کاکالار، هَر کَس هَر وَضعده کی چاغیریلموش، ائله او وَضعده تارئ اینان قالسین.
مُجرّدلَر و دوللار
25ایندی او قیز و اوغوللار بارهسینده کی ائولَنمَکلَری وختی دیر رَب طرفیندَن هئچ حکم یوخوم. آما من بیر آدام مَقامیندا کی رَبّینگ مَرحمتی واسطهسینه اِعتماد ائدمهلی دیر، اؤز حکمیمی وئریرَم. 26من بئله گمان ائدیرَم کی ایندیکی زامانانینگ سختلیگلَری سَبرسینه، آدام ایچی خوب دیر کی هَر وضعده کی وار، ائله اولهیین قالا. 27بیر آروادا باغلییانگ؟ بونونگ قولونجوندا اولما کی آرالانانگ. آرواد یوخونگ؟ آرواد آلماک قولونجوندا اولما. 28آما اگر آرواد آلاینگ، گُناه ائدمهمیشینگ؛ اگر ده کی بیری اَره گئدیر، او دا گُناه ائدمهمیش. با بو حال، اوللار کی ائولَنیرلَر بو زندلیگده سختلیگ چَکرلَر و من سئمئیرَم کی سیز زَجر چَکَینز.
29کاکالار، مَقصودوم بو گپدَن بو دور کی، وخت چوخ کوتاه اولموش. ایندیدَن بئله اوللار کی آرواد وارلاری بیر رَقم زندلیگ ائدسینلَر کی اینگار یوخلاری. 30اوللار کی یاسلی دیرلار، بیر رَقم کی اینگار هئچ یاسلی دهییللَر؛ اوللار دا کی شادلیگ ائدیرلَر، بیر رَقم کی اینگار هئچ شاد دهییللَر؛ و اوللار دا کی بیر زاد آلیرلار، بیر رَقم ائدسینلَر کی اینگار هئچنه یوخلاری؛ 31اوللار کی بو دنیادان بهره آپاریرلار بیر رَقم ائدسینلَر کی اینگار اوندان هئچ بهره آپارمامیشلار. بو سبریه کی بو دنیانینگ ایندیکی ظاهری آرادان گئدیر.
32من، سیزدَن سئيرَم کی نگرانلیگلاردان آزاد اولانز. عَضَب کیشی، رَب اُموراتینینگ قیدینده دیر کی نهیین رَبّی خُشنود ائده. 33آما او کیشی کی ائولَنمیش، دنیا اُموراتینینگ قیدینده دیر کی نهیین آروادینی خُشنود ائده 34و اؤنونگ هوشی بیر یئرده دهییل. او آرواد کی اَره گئدمهمیش یا دا او قیز کی حَلی اَره گئدمهمیش، رَب اُموراتینینگ قیدینده دیر، کی نهیین جسمده و روحدا، مُقدّس اولا. آما او آرواد کی اَره گئدمیش، دنیا اُموراتینینگ قیدینده دیر که نهیین اَرینی خُشنود ائده. 35من بونو سیزینگ اؤز خیرینز ایچی دئییرم، نه بونونگ ایچی کی سیزی قید و بَنده چَکم. مَقصودوم بو دور کی سیز دؤز رووآل ائدَینز و بدون بو کی هوش و گوشینز گئده آیری یئره اؤزونزو رَبّه وَقف ائدَینز. 36اگر بیر کیشی فکر ائدیر کی رووآلی اؤز آداخلیسی اینن دؤز دهییل و اگر هَوسی چوخ دیر کی ائله بئلهیین دا اولاسی، قؤی تا او کیشی آرزیسینه ائتیشه؛ قؤی تا ائولَنلّر، بو ایش گُناه دهییل. 37آما اگر بیر کیشی تصمیمی اوستونده دیر و فشار ایچینده دهییل، بلکی اؤز هَوسینه گؤج دیر و تصمیمینی توتموش کی آداخلیسی اینان ائله ایندی توی ائدمهیه، او کیشی دا خوب ایش گؤرور. 38پس او کی اؤز آداخلیسی اینن ائولَنیر، خوب ایش گؤرور؛ آما او کی ائولَنمئیر، اوندان دا یئیتر ایش گؤرور.
39بیر آرواد اوندایانچاز کی اَری دئرّی دیر، اؤنا باغلی دیر. آما اگر اَری اؤله، آزاد دیر کی سئدیگی آدام اینان ائولنه، آما فقط رَبده. 40با بو حال منیم نَظریمه اگر او آرواد ائله اولهیین کی وار قالا، خوشتر دیر. و بئله فکر ائدیرَم کی من ده تارئ روحونو واریم.
Currently Selected:
بیرینجی نامه، قُرِنتلیلَره 7: QII
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
