بیرینجی نامه، قُرِنتلیلَره 6
6
جَر و مُرافا ایماندارلار آراسیندا
1اوندا کی بیر آدام سیزدَن، او بیرسینینگ ضدّینه بیر شکایت واری، نهیین جرأت ائدیر بونونگ یئرینه کی شکایتینی آپارا مَسیحه ایمانی اولانلارینگ حُضورونا، آپاریر گُناهکار آداملارینگ حُضورونا؟ 2بئیه بیلمئیرَینز کی مَسیحه ایمانی اولانلار دنیایا حکم ائدرلَر؟ و اگر سیز دنیایا حکم ائدهسینز، اَلینزدَن گلمئیر کی کوچوک مَسئلهلَره حکم ائدَینز؟ 3بئیه بیلمئیرَینز کی بیز فرشتهلَره حکم ائدهسیک؟ پس داها نه ائتیشه بو زندلیگ مَسئلهلَرینه. 4پس اگر آراینزدا بئلهیین اختلافلار وار، نه ایچی بو اختلافلاری آپاریراینز او آداملار حُضورونا کی کلیسادا گپلَرینده هئچ ارزش یوخ؟ 5بونو دئییرم تا بئلَینزی خجیل ائدم. بئیه اولور کی سیزینگ آراینزدا بیر حِکمتلی آدام اولمایا تا باشارا کاکالار آراسینداکی جَر و بَحثی یاتیردا؟ 6بونونگ یئرینه کاکا، کاکا ضدّینه مَحکمهیه گئدیر، او دا ایمانسیزلَر حُضورونا؟
7اصلاً، آراینزدا بئلهیین شکایتلَرینگ اولماکی اؤزو، سیزینگ ایچی بیر شکست دیر. بونونگ یئرینه نه ایچی قبول ائدمئیرَینز کی مظلوم سیز اولاینز؟ نه ایچی قبول ائدمئیرَینز کی باشینا بِرک گئدَن سیز اولاینز؟ 8جَخت ظلم ائدَن و خلخ باشینا بِرک قؤیان ائله سیزینگ اؤزونزَینز. او دا اؤز کاکالارینز حَقّینده.
9بئیه بیلمئیرَینز کی ظلم ائدَنلَر تارئ پادشاهلیگینی میراثا آپارمازلار؟ آلّانماینز: نه عِفّتسیزلَر، نه بُت پَرستلَر، نه زِناکارلار، نه او کیشیلَر کی بیر بیر اینن یاتیرلار، چه بو عَملی ائدَن چه دا بو عَمل اؤنونگ اوستونه اولونان، 10نه اوغرولار، نه طمع ائدَنلَر، نه عَرقخورلار، نه سؤیوش وئرنلَر، نه دا خلخ باشینا بِرک قؤیانلار، تارئ پادشاهلیگینی میراثا آپارمازلار. 11سیزینگ بیر پاراینز دا بیر بئلهیین آداملار ایدینز. آما رَب عیسا مَسیح آدیندا و تارئمیزینگ روحو اینان، یویولدونز، مُقدّس اولدینز و صالح ساییلدینز.
عِفّتسیزلیگدَن قَچینز
12«واری زاد منه جایز دیر،» آما واری زاد فایدهلی دهییل. «واری زاد منه جایز دیر،» آما قؤیمام هئچنه منیم اختیاریمی آلا اَلینه. 13«خورکی، قارن ایچی دیر و قارن، خورکی ایچی» و تارئ اوللارینگ ایکّیسینی، هم بونو، هم دا اؤنو نابود ائدَر. بدن عِفّتسیزلیگ ایچی دهییل، بلکی رَب ایچی دیر و رَب، بدن ایچی. 14تارئ اؤز قُدرتی اینن رَب عیسایی دئرّیتدی و بیزی دا دئرّیتَر. 15بئیه بیلمئیرینز کی سیزینگ بدنینز مَسیح عضولاری دیر؟ پس ایندی مَسیح عُضولارینی گؤتورم و اوللاری ائدَم بیر فاحشه عضولاری؟ هئچ وَخت! 16یا دا بئیه بیلمئیرَینز او کیشی کی بیر فاحشه آروادا قوشولیر، اؤنونگ اینان بیر بدن اولیر؟ چون ائله اولهیین کی توراتدا یازیلمیش: «ایکّیسی بیر بَدن اولارلار.» 17آما او آدام کی رَبّه قوشولیر، اؤنونگ اینان بیر روح اولیر.
18عِفّتسیزلیگدَن قَچینز. آدام هَر آیری گُناه کی ائده بدندَن یازّیا دیر، آما عِفّتسیزلیگ ائدن آدام، اؤز بدنی ضدّینه گُناه ائدیر. 19یا دا بئیه بیلمئیرَینز کی سیزینگ بدنینز، ائله بو بدن کی تارئدان وارینز، وجودینز ایچیندهکی تارئنینگ قُدّوس روحونونگ مَعبدی دیر؟ سیز اؤزونزکی دهییلَینز، 20چونکی بیر بَها وئریلمیش سیزینگ آلینماکینز ایچی. پس اؤز بدنینز ایچینده تارئیا عزّت ائدینز.
Currently Selected:
بیرینجی نامه، قُرِنتلیلَره 6: QII
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
