بیرینجی نامه، قُرِنتلیلَره 15
15
مَسیحنینگ دئرّیلمَکی
1کاکالار، ایندی سئیرَم بئلَینزه اعلام ائدیگیم خوش خبری یادینزا گتیرَم، ائله او خبر کی قبول ائدینز و اوستونده دا توریراینز، 2و اؤنونگ وسیلهسینه نجات توتیراینز، اَلبت اگر بئلَینزه اعلام ائدیگیم سؤزه سِفت یاپیشاینز. یوخسا، ایمان گتیردیگینز هئچ دیر.
3چونکی من، او پیغامی کی منه ده وئریلدی، بیر ائنگ مُهم سؤز لهیین سیزه ائتیشتیردیم: بو کی، مَسیح بیزیم گُناهلاریمیز ایچی اؤلدو، ائله اولهیین کی مُقدّس یازیلیلاردا یازیلمیش، 4و بو کی، مَقبره ایچینه قؤیولدو، بو کی، اؤچونجو گؤنده دئرّیلدی، ائله اولهیین کی مُقدّس یازیلیلاردا یازیلمیش، 5و بو کی، کیفایا و اوندان سورا دا او اون ایکّی شاگرده ظاهر اولدو. 6اوندان سورا بیر دفعهده کاکالارینگ بئش یوز نفریندَن آرتیقینا، ظاهر اولدو. اوللارینگ چوخو حَلی دئرّی دیرلَر، هَر چند کی بیر پارالاری اؤلموشلار. 7اوندان سورا یَعقوبا و سورا دا واری حَواریلره ظاهر اولدو. 8واری کَسدَن آخیر، منه ده ظاهر اولدو، منه کی، وَختیندَن ایلَری آنادان اولان اوشاق لهیین ایدیم.
9بو خاطره کی من، حَواریلارینگ ائنگ کوچوکویَم و هئچ لایق دهییلَم کی بئلَمی حَواری چاغیرالّار، چونکی من، تارئ کلیساسینا جور و جفا ائدیم. 10آما تارئ فِیضینینگ وَسیلهسینه دیر کی هَر نه کی وارام، وارام و اؤنونگ فِیضی منه هئچ دهییلدی. برعَکس، اوللارینگ واریسیندان سختتر دا ایش گؤردوم، با بو حال کی بو من دهییلدیم بلکی تارئ فِیضی ایدی کی منیم اینن دیر. 11او موقع، چه من ایدیم، چه اوللار، بیز بئلهیین اعلام ائدیرَک و سیز ده بئلهیین ایمان گتیردینز.
اؤلولَرینگ دئرّیلمَکی
12ایندی اگر بئله اعلام اولیر کی مَسیح اؤلومدَن دئرّیلدی، سیزینگ بیر پاراینز نهیین دئیه بیلیرَینز کی اؤلومدَن دئرّیلمَک یوخ؟ 13آما اگر اؤلومدَن دئرّیلمَک یوخ، پس حتّی مَسیح ده دئرّیلمهمیش. 14و اگر مَسیح دئرّیلمهمیش، پس بیزیم تعلیمیمیز هئچ دیر و سیزینگ ایمانینز ده هئچ دیر. 15بئلهیین، حَتّی بیز دا تارئ ایچی یالانچی شاهدلَر ساییلیراک، چونکی بیز، تارئ بارهسینده بئله گواهلیگ وئردیک کی او، مَسیحی دئرّیتدی، کی اگر اؤلولَر دئرّیلمئیرلَر، پس تارئ اؤنو دئرّیتمهمیش. 16چونکی اگر اؤلولَر دئرّیلمئیرلَر، حتّی مَسیح ده دئرّیلمهمیش. 17و اگر مَسیح دئرّیلمهمیش، سیزینگ ایمانینز فایدهسیز دیر و حَلی گُناهلارینز ایچیندهیَینز. 18پس، مَسیحه ایمانی اولانلار کی اؤلموشلار ده هلاک اولموشلار. 19اگر بیزیم امیدیمیز مَسیحه، فقط بو زندلیگ ایچی دیر، بیز واری آداملاردان بدبختتَرک.
20آما گرچکدَن مَسیح، اؤلومدن دئرّیلمیش و اؤلولَر آراسیندا بیر نوبَر میوه لهیین اولموش. 21چون ائله اولهیین کی اؤلوم بیر انسان طریقیندَن گلدی، اؤلومدَن دئرّیلمَک دا بیر انسان طَریقیندَن گلمیش. 22چون ائله او لهیین کی آدَمده واری کَس اؤلیر، ائله اولهیین دا مَسیحده واری کَس دئرّیلَر. 23آما هَر کَس اؤز نوبهسینده: اَوّل مَسیح کی نوبر ایدی؛ اوندان سورا دا اؤنونگ گلدیگینده، اوللار کی مَسیحکی دیرلَر. 24اوندا آخیر زامان اولور. او موقع کی پادشاهلیگی بووآ تارئیا تاپشیریر، یعنی بوندان سورا کی هَر قانونی، هَر اِقتداری و هَر قُدرتی نابود ائدیر. 25بو خاطره کی او، اوندایانچاز کی واری دشمنلَرینی آیاقی آلتینا قؤیا، حکم سؤرهسی. 26آخیرکی دشمن کی نابود اولاسی، اؤلوم دیر. 27چونکی، «تارئ واری زادی اؤنونگ اطاعتینه چیخارتمیش و اؤنونگ آیاقی آلتینا قؤیموش.» آما اوندا کی دئییلیر، «واری زاد اؤنونگ اطاعتینده دیر،» آلهیین دیر کی تارئنینگ اؤزو کی واری زادی مَسیح اطاعتینه چیخارتمیش، بو اطاعت آلتیندا دهییل. 28اوندا کی واری زاد مَسیح اطاعتینه چیخدی، اوندا اوغولونگ اؤزو دا تارئدان کی واری زادی اؤنونگ اطاعتینه چیخارتدی، اطاعت ائدَر تا تارئ، واری زادا، واری زاد اولا.
29بئله اولماسا، خلخینگ مَنظوری نه دیر بوندان کی بیر اؤلَن آدام نیابتینه تَعمید غُسلی توتیرلار؟ اگر اؤلولَر هئچ دئرّیلمئیرلَر، پس نه ایچی خلخ، اوللار نیابتینه تَعمید توتیرلار؟ 30نه ایچی بیز هر ساعت خطر ایچیندهیَک؟ 31کاکالار، او فَخریمه کی رَبّیمیز مَسیح عیسادا سیزه واریم، آند اولسون کی من هَر گؤن اؤلورَم. 32اگر من اَفِسُس شَهرینینگ آداملاری اینان کی درّنده جاناوارلار لهیین ایدیلار، انسانی نیّتلَر اینن جَنگ ائدیم، نه مَنفعت آپاردیم؟ اگر اؤلولَر دئرّیلمئیرلَر،
«گلینز تا یئیک و ایچک
چونکی صابا اؤلورَک.»
33آلدانماینز: «پیس یولداش، خوب اخلاقی خراب ائدیر.» 34بو ویل گپلَردَن کی مَستی اولموشانز، اؤزونزه گلینز، داها گُناه ائدمَینز؛ چونکی بیر پارا آداملار واردیرلار کی تارئیی تانیمئیرلار. بونو دئییرم تا خجیل اولانز.
اؤلومدَن دئرّیلَن بدن
35آما بیری خبر آلار: «اؤلولَر نهیین دئرّیلیرلَر؟ اوللار نه رَقم بدن اینن گلیرلَر؟» 36ای نافَهم آدام، سَپدیگینگ دان دئرّیلمَز، بهغیری بو کی اؤله. 37سپدیگینگ دان، ائله او بدن دهییل کی گئیرَندَن سورا اولاسی، بلکی فقط بیر دان دیر، سئیر بوغدا دانی اولسون، سئير آیری دانلار. 38آما تارئ اؤز سئدیگینه گؤره او دانا بیر بدن وئریر، هَر رَقم دانا او دانینگ اؤز بدنینی وئریر. 39بو خاطره کی واری جسملَر بیر طور دهییللَر. آداملار بیر رَقم دیرلَر، جاناوارلار بیر رَقم داها دیرلار، قوشلار بیر آیری رَقم دیرلَر و بالیقلار دا بیر آیری طور دیرلَر. 40بیر پارا بدن وار کی گؤیه تَعلّق واری، بیر پارا بدن دا وار کی یئره تَعلّق واری. آما گؤیه تَعلّقی اولان بدنینگ شوکتی بیر رَقم دیر و یئره تَعلّقی اولان بدنینگ شوکتی بیر آیری رَقم دیر. 41گؤن بیر رَقم شوکت واری و آی آیری رَقم شوکت واری و اولدوزلار دا بیر آیری طور شوکت وارلاری؛ چونکی شوکتده اولدوز، اولدوز اینان فَرق واری.
42اؤلولَرینگ دئرّیلمهکی دا ائله بئلهیین دیر. هر نه کی اَکیلیر آرادان گئدمهلی دیر؛ هر نه کی دئرّیلیر، آرادان گئدمهلی دهییل. 43ذِلّتده اَکیلیر، عِزّتده دئرّیلیر. ضَعیفلیگده اَکیلیر؛ قُوّتده دئرّیلیر. 44نَفْسانی بدن اَکیلیر، روحانی بدن دئرّیلیر. اگر نَفْسانی بدن وار، روحانی بدن ده وار. 45ائله اولهیین کی توراتدا یازیلمیش: «اَوّلکی انسان، آدَم، بیر جانلی وارلیگ اولدو»؛ آخیرکی آدَم، زندلیگ وئرن روح اولدو. 46آما اَوّلکی گلن روحانی دهییلدی، بلکی نَفْسانی ایدی، اوندان سورا گلن روحانی ایدی. 47بیرینجی انسان یئردن ایدی، تورپاقدان ایدی؛ ایکّینجی انسان گؤیدَن دیر. 48تورپاغدان اولان آدام هر طور ایدی، تورپاغدان اولانلار دا ائله او طور دیرلَر و گؤیدَن اولان آدام هر طور دیر، گؤیدَن اولانلار دا ائله او طور دیرلَر. 49ائله اولهیین کی تورپاقدان دوزهلَن آدامینگ شمایلینی اؤزوموزه آلمیشاک، او انسان شمایلینی دا کی گؤیدَن دیر، اؤزوموزه آلاراک.
سِرّ و پیروزلیگ
50کاکالار، بونو سیزه دئییرَم کی: جسم و قان، تارئ پادشاهلیگینی میراثا آپارا بیلمَز، آرادان گئدَن ده آرادان گئدمهیَنی، میراثا آپارا بیلمَز. 51قولاق آسینز! سیزه بیر سِرّ دئییرم: بیزیم واریمیز اؤلمَک، آما واریمیز دهییشیلَرَک، 52بیر آندا، بیر گؤز بیر بیره وورماکدا، آخیرکی شیپور چالیناندا. چونکی او شیپور چالینار، اؤلولَر دئرّیلَرلَر بیر رَقم کی داها آرادان گئدمَزلَر و بیز دهییشیلَرَک. 53چونکی بو آرادان گئدَن بدن، آرادان گئدمهیَن بدنی گئیهسی و بو فانی بدن، فانی اولمایان بدنی گئیهسی. 54اوندا کی آرادان گئدَن بدن، آرادان گئدمهیَن بدنی گئیه و فانی بدن، فانی اولمایان بدنی گئیه، اوندا مُقدّس یازیلیلاردا یازیلان سؤز یئرینه ائتیشَر کی دئییر: «پیروزلیگ، اؤلومو اوتموش.»
55«ای اؤلوم، سنینگ پیروزلیگینگ هاردا دیر؟
ای اؤلوم، سنینگ نیشتینگ هاردا دیر؟»
56اؤلومونگ نیشتی، گُناه دیر و گُناهینگ گؤجو، شَریعت دیر. 57آما تارئیا شُکر اولسون کی رَبّیمیز عیسا مَسیح طریقیندَن، بیزه او پیروزلیگی وئریر.
58پس، عزیز کاکالاریم، استقامت ائدینز، قایم تورینز، همیشه رَبّینگ ایشینه مشغول اولینز، چون بیلیرَینز کی زَحمَتینز رَبده هئچ دهییل.
Currently Selected:
بیرینجی نامه، قُرِنتلیلَره 15: QII
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
