بیرینجی نامه، قُرِنتلیلَره 16
16
کؤمَک ییغمَک، مَسیحه ایمانی اولانلار ایچی
1ایندی، مَسیحه ایمانی اولانلار ایچی کؤمَک ییغمَک بارهسینده: غَلاطیه منطقهسیندهکی کلیسالارا اَمر ائتدیگیمی، سیز ده یئرینه ائتیردهسینز. 2هَر هفتهنینگ بیرینجی گؤنونده، سیزینگ هَر بیرینز اؤز درآمدینه گؤره، بیر زاد قؤیاسی قیراقا و ییغهسی، تا من گلنده، لازیم اولمایا کؤمَک ییغَینز. 3اؤرایا ائتیشدیکیمده، سیز تأیید ائدَن آداملارا معرفینامه وئرَرَم و بئللَرینی سیزینگ هَدیهلَرینز اینن یوللایارام اورشلیم شَهرینه. 4اگر گؤرهک صلاح بوندا دیر کی من ده گئدَم، اوللار منه قوشولارلار.
5مَقدونیه منطقهسیندَن گچندَن سورا، گؤرمَکینزه گلَرَم. چونکی سئیرَم مَقدونیه یولوندان گچم. 6شاید بیر مُدّت بئلَینز اینن قالام، یا دا حَتّی قیشی سیزینگ یانینزدا گچیردَم، تا بئله سفریمده، هَر یئره کی گئدیرَم، منه کؤمَک اولاینز. 7بو خاطره کی سئمئیرَم ایندی گؤرمهکینزه گلم و فقط یولوم اوستونده بئلَینزی بیر گؤرَم. اگر رَب اجازه وئره، امید واریم کی بیر مُدّت سیزینگ اینن گچیردَم. 8آما پِنتیکاست عیدینانچاز اَفِسُس شَهرینده قالارام، 9چونکی منیم ایچی بیر بویوک دَر آچیلمیش کی بیر ایشلَر ایچی دیر کی اَثری چوخ دور و ضدّ اولانلار دا چوخ دیرلار.
10اوندا کی تیموتائوس گلدی یانینزا، بیر رَقم ائدینز کی سیزینگ یانینزدا هئچنهدَن قورخوسو اولمایا، چونکی او دا منیم لهیین، رَبّینگ ایشینی گؤرور. 11پس هئچکَس اؤنو حَقیر سایماسین، اؤنو صُلح و سلامتلیگ اینن یولا سالینز تا بؤکوله یانیما؛ بو خاطره کی من اینن کاکالار اؤنونگ یولونو گؤزلهییرَک.
آخیرکی سؤزلَر
12ایندی، کاکامیز آپولُس بارهسینده، من اؤنا چوخ یالواردیم کی باقّی کاکالار اینان سیزینگ گؤرمهکینزه گله، آما اصلاً راضی اولمادی کی ایندی گله. هر وَخت فُرصت ائده، گلَر.
13هوشکار اولینز؛ ایماندا قایم تورینز، کیشی لهیین رووآل ائدینز، گؤجلو اولینز. 14واری ائدیگینز ایشلَر، مُحبّت اینن اولونسون.
15بیلیرَینز کی اِستِفاناس اوباسی، اَوّلکی آداملار ایدیلَر کی اَخائیه منطقهسینده ایمان گتیردیلَر و بو کی اوللار اؤزلَرینی مَسیحه ایمانی اولان آداملارینگ خدمتینه وَقف ائدمیشلَر. کاکالار، ایندی سیزدَن خواهش ائدیرَم کی، 16بیر بئلهیین آداملاردان و ائله بئله دا هَر کَسدَن کی بو خدمتده ایش گؤرور و زَحمت چکیر، اطاعت ائدینز. 17اِستِفاناس، فورتوناتوس و اَخائیکوس گلمهکیندن خوشحالام، بو خاطره کی اوللار سیزینگ خالی یئرینزی دؤلدورموشلار. 18چونکی اوللار منیم روحومو تازّالاتدیلار، ائله بئله دا سیزینگکینی. بیر بئلهیین آداملارا حُرمَت ائدینز.
سیزه سلاملار اولسون
19آسیا منطقهسیندهکی کلیسالار سیزه سالام ائتیردیرلَر. آکیلا و پریسکیلا و اوبالارینداکی کلیسا آداملاری، واری بئلینه، رَبده، سیزه چوخ سالام ائتیردیرلر. 20واری کاکالار سیزه سالام ائتیردیرلَر. بیر بیره مُقدّس ماچاینان سالام ائدینز.
21من، پولُس، بو سالامی اؤز اَلیم اینن سیزه یازیرام.
22اگر بیری رَبّی چوخ سئمئیر، او آداما لَعنت اولسون. ای رَبّیمیز، گل!
23رَبّ عیسانینگ فِیضی سیزینگ اینن اولسون.
24منیم مُحبّتیم، مَسیح عیسادا، سیزینگ وارینز اینن اولسون. آمین.
Currently Selected:
بیرینجی نامه، قُرِنتلیلَره 16: QII
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
