بیرینجی نامه، قُرِنتلیلَره 14
14
نَبوّت ائدمَک و آیری دیللَره دانیشماک
1مُحبّت یولونو ایلَری توتینز و غِیرت اینن روحانی عَطالاری سئینز. علیالخصوص بو کی نَبوّت ائدینز. 2چونکی بیر آیری دیله دانیشان آدام، بَشر اینن دانیشمئیر، بلکی تارئ اینان دانیشیر؛ بو خاطره کی هئچکَس اؤنو آنگلامئیر؛ بلکی او، تارئ روحوندا، سِرّلَردَن دانیشیر. 3آما نَبوّت ائدَن آدام، خلخ اینن دانیشیر تا اوللاری بَنا ائده، اوللاری تَشویق ائده و تَسلّی وئره. 4بیر آیری دیله دانیشان آدام، اؤزونو بَنا ائدیر، آما نَبوّت ائدَن آدام، کلیسایی بَنا ائدیر. 5من سئیرَم کی سیزینگ وارینز آیری دیللَره دانیشاینز، آما آرتیق گؤینوم سئیر کی نَبوّت ائدَینز. نَبوّت ائدَن آدام، آیری دیللَره دانیشان آدامدان باش دیر، بهغیری بو کی بیری ترجمه ائده تا بئله کلیسا بَنا اولا.
6ایندی کاکالار، اگر من گلم سیزینگ یانینزا و آیری دیللَره دانیشام آما بئلَینزه بیر وَحی یا بیر مَعرفت یا بیر نَبوّت یا دا بیر درس گتیرمئیَم سیزینگ ایچی نه فایده واریم؟ 7حتّی اگر نِی یا دا چَنگ لهیین سازلار کی جان یوخلاری، سَسلَری فرق یوخو اولا، نهیین بیری حالیسی اولور بو کی چالینیر نه دیر؟ 8و اگر شیپور بیر آلهیین سَس یوخو اولا، کیم جَنگ ایچی آماده اولور؟ 9سیزینگ بارهینزده دا ائله بئلهیین دیر. اگر دیلینز این بیر سؤزلَر دئیَینز کی آنگلامالی اولمایا، نهیین بیری حالیسی اولور کی نه دئییلمیش؟ چونکی اوندا اینگار هوا اینان دانیشمیشانز. 10هئچ شَک یوخ کی دنیادا چوخ فرقلی دیللَر وار و هئچ بیری دا مَعنیسیز دهییل. 11پس اگر بیر دیلینگ معنیسینی بیلمئیرَم، من بو دیله دانیشان آدام ایچی بیر اؤزگهیَم و او دا منیم ایچی بیر اؤزگه دیر. 12سیزینگ بارهینزده دا ائله بئلهیین دیر، بو خاطره کی سیز غیرت وارینز کی تارئ روحونونگ عَطالاری ظاهر اولا، تالاش ائدینز کی کلیسایی بَنا ائدمَکده تَرقّی ائدَینز.
13پس بیر آیری دیله دانیشان آدام، دُعا ائدهسی کی اؤز دئدیگیلَرینی ترجمه ائده. 14بو سبریه کی اگر من بیر آیری دیله دُعا ائدَم، روحوم دعا ائدیر، آما عقلیم هئچ بهره آپارمئیر. 15من نه ایش گؤرهسیم؟ روحوم اینان دُعا ائدهرَم، آما عَقلیم اینن دا دُعا ائدهرَم؛ روحوم اینان حَمد و ثنا ییری ییرلهیَرم، آما عَقلیم اینن دا حَمد و ثنا ییری ییرلهیَرم. 16بئله اولماسا، اگر سَن روحونگ اینان شُکر ائدیرَینگ، نهیین بیر آدام کی بئلهیین زادلاردان هئچ خبر یوخو، سَنینگ شُکر ائدمَکینگه آمین دئیه بیلَر؟ وَختی آنگلامئیر کی سَن نه دئییرَینگ. 17چونکی سَن دؤز شُکر ائدیرَینگ، آما آیری آدام بَنا اولمئير. 18تارئیی شُکر ائدیرم کی سیزینگ وارینزدان آرتیق آیری دیللَره دانیشیرام. 19آما، سئیرَم کی کلیسادا بئش کلام عَقلیم اینن دانیشام تا باقّی آداملارا بیر درس وئرمیش اولام، بونونگ یئرینه کی اون مینگ کلام بیر آیری دیله دانیشام.
20کاکالار، آنگلاماگدا اوشاق لهیین اولمانز. پیسلیکده اوشاق لهیین اولینز. آما، آنگلاماگدا بیر بالغ آدام لهیین اولینز. 21توراتدا بئله یازیلمیش کی:
«اؤزگه دیللَره دانیشان آداملارینگ وسیلهسینه،
و غَریب آداملارینگ آغیزی اینان
بو خلخ اینان دانیشارام
و حتّی اوندا دا منه قولاق آسمازلار،
رَب دئییر.»
22پس آیری دیللَره دانیشماک بیر نیشانا دیر ایمانسیزلار ایچی، نه ایماندارلار ایچی. آما نَبوّت ائدمَک بیر نیشانا دیر ایماندارلار ایچی، نه ایمانسیزلار ایچی. 23پس اگر بوتون کلیسا آداملاری بیر یئره ییغیللَّر و واریسی دا آیری دیللَره دانیشالّار و بیر پارا آدام کی هئچ بئلهیین زاددان خبر یوخلاری یا دا ایماندار دهییلَر، گللَّر اوللارینگ مجلسینه بئیه دئمَزلَر کی سیز دَلییاینز؟ 24آما اگر واری کَس نَبوّت ائده و بیر ایمانی اولمایان آدام یا دا بیر آدام کی بئلهیین زاددان هئچ خبر یوخو گله اوللارینگ مجلسینه، واری کَس باعث اولور تا او آدام مُجاب اولا کی گُناهکار دیر، واری کَس طرفیندَن او آداما حکم اولونار، 25او آدام اؤرهکینینگ سِرّلَری آلهیینه چیخر و بئله اؤز ایزی اوستونه یئره دؤشَر، تارئیی پَرست ائدَر و اعلام ائدَر کی تارئ گرچکدَن سیزینگ آراینزدا دیر.
26کاکالار، پس نمنه؟ اوندا کی بیر یئره ییغیلیرَینز، هر بیرینز، بیر ییر، بیر دَرس، بیر وَحی، بیر آیری دیله دانیشماک، یا دا بیر ترجمه واری. بوللارینگ واریسی بَنا ائدمَک ایچی اولونسون. 27اگر بیر کَس بیر آیری دیله دانیشیر، او دا فقط ایکّی یا دا نهایت اؤچ آدام، نوبه به نوبه دانیشسینلار و بیر آدام دا ترجمه ائدسین. 28آما اگر هئچکَس یوخ کی ترجمه ائده، اوللار کلیسادا بی سَس قالسینلار و اؤز اؤرهکلَرینده تارئ اینن دانیشسینلار. 29نَبوّت ائدنلَردَن، ایکّی یا دا اؤچ آدام دانیشسینلار و باقّی دا اوللار دئدیگی گپلَری اندی وزن ائدسینلَر. 30اگر بیر آیری آداما کی اؤرا اوتورموش بیر وَحی گله، او آدام اَوّل بی سَس قالسین. 31چونکی سیزینگ وارینز نوبه به نوبه نَبوّت ائده بیلیرَینز، تا بئله واری کَس دَرس توتا و واری کَس تشویق اولا. 32نَبوّتائدَن آداملارینگ روحو، نَبوّت ائدَنلَردَن اطاعت ائدیرلَر. 33بو خاطره کی تارئ قَرمیقَریشیقلیگ تارئسی دهییل، بلکی صُلح و سلامتلیگ تارئسی دیر.
ائله او طور کی مَسیحه ایمانی اولان آداملارینگ بوتون کلیسالاریندا بئلهیین دیر، 34آروادلار کلیسالاردا بیسَس قالاسیلار. چونکی اوللارا دانیشماک اجازهسی وئریلمهمیش، آما اطاعت ائدهسیلَر، ائله اولهیین کی شَریعت ده دئییر. 35اگر بیر زاد وار کی سئیرلَر اؤرگنلَّر، ائوده اَرلَریندَن خبر آلسینلار؛ چونکی آرواد ایچی عیب دیر کی کلیسادا دانیشا.
36بئیه سیزینگ طریقینزدَن ایدی کی تارئ کلامی گلدی؟ یا دا بئیه فقط سیزه ائتیشمیش؟ 37اگر بیری گمان ائدیر کی بیر نَبی دیر یا بیر روحانی آدام دیر، او آدام تصدیق ائدهسی کی بو زادلار کی سیزه یازیرام، بیر حکم دیر رَب طَرفیندَن. 38اگر بیر کَس بونو قبول ائدمئیه، اؤزو دا قبول اولونماز.
39پس کاکالاریم، غیرت اینن بونونگ قولونجوندا اولینز کی نَبوّت ائدَینز و آیری دیللَره دانیشماکی مَنع ائدمَینز. 40آما واری زاد دؤز و نَظم اوستوندَن یئرینه ائتیشهسی.
Currently Selected:
بیرینجی نامه، قُرِنتلیلَره 14: QII
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
