مکاشِفۀ یوحنا 6
6
هفت مُهر
1اوسِه دییُم که بَرَه، یکی وَ هَف مُهرَ اِشکَنا، وِ اِشنُفتُم که یکی وَ او چار مَخلوقِ زِندَه بِی صییِی مِی قُرُمتِراق ایگُت: «بیو!» 2هَمیِکِه سِیل کِردُم، اسبِ سَفیای دییُم، وُ وِه که سُوارِش بی، کَمونی داشت؛ وِ تاجی وَش دایَه وابی وِ او زوردار، زَه وَدَر تا زور وابو.
3موقِی که بَرَه مُهرِ دِوِمَه اِشکَنا، اِشنُفتُم که مَخلوقِ زِندۀ دِوم ایگُت: «بیو!» 4وِ اسبی دَ اومَه وَدَر که رنگِش سُرخِ روشن بی، وَ سُوارِش اجازَه دایَه وابی تا صُلحَه وَ ری زمین وَگِرِه تا آیَمَل یَکَه بِکِشِن، وِ شُمشیرِ گَپویی وَش دایَه وابی.
5موقِی که بَرَه مُهرِ سِوِمَه اِشکَنا، اِشنُفتُم که مَخلوقِ زِندۀ سِوُم ایگُت: «بیو!» هَمیِکِه سِیل کِردُم، اسبِ سِهای دییُم، که سُوارِش تِرازینی مِنِه دَسِش داشت. 6وُ وَ مابِینِ او چار مخلوقِ زِندَه، چیئی اِنگار صیایی اِشنُفتُم که ایگُت: «یِه پِیمونَه گندم، وَ یِه دینار، سِه پِیمونَه جو، وَ یِه دینار، امّا وَ روغن وُ شراب ضرر نَزَه!»
7موقِی که بَرَه مُهرِ چارِمَه اِشکَنا، اِشنُفتُم که مَخلوقِ زِندۀ چارُم ایگُت: «بیو» 8هَمیِکِه سِیل کِردُم، اسبِ رنگپَرییَهای دییُم، که نومِ سُوارِش «مرگ» بی وِ «دنیایِ مُردِهیَل» وَ دینِش اییومَه. وَ اونگَل قدرت دایَه وابی تا ربعِ زَمینَه بِی شُمشیر، قَحطی، مَرَض وِ جونِوَرَلِ وَحشیِ ری زمین بِکِشِن.
9موقِی که بَرَه مُهرِ پنجِمَه اِشکَنا، مِ زِرِ مذبَح، جونِ کَسَلی نَه دییُم که وَ خاطرِ کلامِ خدا وِ شهادتی که دایَه بییِن، کُشتَه وابییَه بییِن. 10اونگَل بِی صییِی بِلَند قیرَه ایزَن، ایگُتِن: «ای خداوندِ قادر وِ قدّوس وِ بَرحق، تا وَ کی داوری نیکِنی وِ تقاصِ خینِ ایما نَه وَ مَردِمونِ زمین نیسونی؟» 11وُ وَ هَر کویَکی وَ اونگَل، قبایی سَفی دایَه وابی وُ وَشون گُتَه وابی که یِچِی دَ آروم بِگِرِن تا عِدۀ هُمخِذمَتَل وِ کَکایَلِشون که قرارِه مِی اونگَل کشتَه وابون، کامل وابو.
12موقِی که بَرَه مُهرِ شیشمَه اِشکَنا، سِیل کِردُم، وِ دییُم که زمینجِمِشتِ گَپویی اومَه، وِ اَفتو مِی پَلاسی سِه وابی، وِ قرصِ ماه مِی خین وابی، 13وِ ستارهیَلِ آسَمون رِتِن ری زمین، هَموطو که اَنجیرَلِ نارَس بِی تَکونِ بایِ تندی وَ دار ایریزِن. 14آسَمون مِی طوماری پیچِسَه غِیب وابی، وِ هر کُو وِ جزیرهای وَ جِی خُوش جاوَجا وابی.
15اوسِه پادشایَلِ زمین وِ آیَمَلِ سرشناس، وِ حاکِمَل وِ دارایَل وِ زوردارَل، وِ هر غلام وِ آزاد، خِشونَه مِنِه اِشکَفتَل وِ مابینِ تَختَهبَردَلِ کُویَل قایِم کِردِن. 16اونگَل وَ کُویَل وِ تختَهبَردَل ایگُتِن: «بییُفتیت وَ ریمون وِ ایما نَه وَ وَرِ تییِۀ وِّ که نِشَسِه وَ ری تخت وُ وَ غضبِ بَرَه قایم کِنیت. 17سییِکِه روزِ گپوِ غضبِ اونگَل رَسییِه، وِ کیَه که بِتَرِه طاقت بیارِه؟»
Currently Selected:
مکاشِفۀ یوحنا 6: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
