مکاشِفۀ یوحنا 5
5
طومار وِ بَرَه
1اوسِه مِنِه دَسِ راسِ وِّ که نِشَسَه بی وَ ری تخت طوماری دییُم که پشتِ ریش نوشتهیَلی بی وِ بِی هَف مُهر، مُهرِموم وابییَه بی. 2وِ فرشتۀ زورداری دییُم که بِی صییِی بِلَند اعلام ایکِه: «کیَه که لایق بو طومارَ واز کِنِه وِ مُهرَلِشَه بِشکَنِه؟» 3وِ هیشکَه، نَه مِنِه آسَمون، نَه ری زمین، نَه زِرِ زمین، نیتَرِس طومارَ واز کِنِه یا سِیلَ مِنِش کِنِه. 4مِ زار زار ایگِریوِسُم سییِکِه هیشکَه جُسَه نَوابی که لایقِ واز کِردَنِ طومار یا سِیل کِردَن مِنِش بو. 5اوسِه یکی وَ او ریشسَفییَل وَم گُت: «مَگریو. سِی کُ! او شیرِ طِیفِی یَهودا، او ریشۀ داوود، زور وابییِه تا بِتَرِه طومار وِ هَف مُهرِشَه واز کِنِه.»
6اوسِه دییُم که مابینِ تخت وِ چار مخلوقِ زِندَه وِ ریشسَفییَل، بَرَهای وِیسایَه بی که انگار قُربونی وابییَه بی. هَف شاخ وِ هَف تییَه داشت که هَف روحِ خدایَن که بِسی وابییِنِه وَ تَمومِ زمین. 7بَرَه اومَه جِلو وِ طومارَ وَ دَسِ راسِ وِّ که نِشَسَه بی وَ ری تخت گِرُت. 8وَختی که وِّ طومارَ گِرُت، او چار مخلوقِ زِندَه وِ او بیسوچار ریشسَفی سَجدَه کِردِن، هر کویَکیشون سازی مِنِه دَسِشون بی وِ جومَلِ طِلایی پُر وَ بخور که هَمو دعایَلِ ایموندارَلِه. 9وِ اونگَل سِرویی تازَه خُوندِن که ایگُت:
«تِ لایقی که طومارَ بِگِری، وِ مُهرَلِشَه بِشکَنی،
سییِکِه قُربونی وابیئی، وِ بِی خینِ خُوت مردِمَه
وَ هر طِیفَه وِ زُوون وِ قوم وِ ملت،
سی خدا اِسِی؛
10تِ اونگَلَه مَملکت کِردی وِ کاهِنَلی سی خِدامون
وِ اونگَل وَ ری زمین سلطنت ایکِنِن.»
11اوسِه سِیل کِردُم وِ صییِی فرشتِهیَلِ زیادی نَه اِشنُفتُم که دورتادورِ او تخت وِ مَخلوقَلِ زِندَه وِ ریشسَفییَل بییِن. وِ عِدَهشون صَدهاهزار وِ هِزارونهزار بی. 12بِی صییِی بِلند ایگُتِن:
«او بَرۀ قُربونی وابییَه
لایقِه که قدرت وِ دولت وِ حکمت وِ قُویَت،
حُرمت وِ جلال وِ ستایش وَش تقدیم وابو.»
13اوسِه اِشنُفتُم که هر موجودی که مِنِه آسَمون وِ ری زمین وِ زِرِ زمین وِ مِنِه دریا یَه، وِ هر چیئی که مِنِشونِه، ایگُتِن:
«ستایش وِ حُرمت، جلال وِ قدرت،
این وِّ که نِشَسِه وَ ری تخت وِ بَرَه بو تا ابدالآباد.»
14وِ او چار مخلوقِ زِندَه گُتِن: «آمین» وِ ریشسَفییَل بِی پوز اُفتان وُ وِّ نَه پرستش کِردِن.
Currently Selected:
مکاشِفۀ یوحنا 5: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
