مکاشِفۀ یوحنا 21
21
آسَمون وِ زمینِ تازَه
1اوسِه آسَمونی تازَه وِ زمینی تازَه دییُم، سییِکِه آسَمونِ اَوَل وِ زمینِ اَوَل وَ بین رَتَه بی وِ دَ دریایی نَبی. 2وِ شهرِ مقدس، یعنی اورشلیمِ تازَه نَه دییُم که وَ آسَمون وَ طِی خدا اییومَه دومِن، آمایَه وابییَه، مِی عروسی که سی میرَش مَلوس کِردَه بو. 3وِ صییِی بِلَندی وَ تخت اِشنُفتُم که ایگُت:
«سِی کُ! منزلگاه خدا بِی آیَمَلِه.
وِّ بِی اونگَل منزل ایکِنِه؛
وِ اونگَل قومِ وِّ ایابون،
وِ خدا خُوش باشونِه
وِ خِدِی اونگَل ایابو.
4وِّ هَر خَرسی نَه وَ تییَلِشون
پاک ایکِنِه.
وِ دَ مرگ نیسی؛
وِ دَ هیچ ماتم وِ هیچ شیون وِ هیچ دردی
نیسی،
سییِکِه چییَلِ اَوَل وَ بین رَتِنِه.»
5وُ وِه که نِشَسَه بی وَ ری تخت گُت: «سِی کُ! مِ همَه چی نَه نو ایکِنُم.» هَمیطو گُت: «یِنَه بنویس سییِکِه ای گَپَل قابلِ اِطمینون وِ راسِه.» 6وُ وِّ وَم گُت: «اَنجوم وابی! مِ "الف" وُ "ی" وِ اَوَل وُ آخِرُم. مِ وَ هرکه تشنَه یَه، وَ چشمۀ اُو حیات اییُم، بی یِکِه چیئی بییِه. 7هرکه زور وابو، یِنَه وَ ارث ایبَرِه، وِ مِ خِدِی وِّ ایابوم وُ وِّ کِرِ مِ ایابو. 8امّا زَلَهتِرویَل، بیایمونَل، کِفارَتَل، آیَمکِشَل، زِناکارَل، جادوگَرَل، بتپَرستَل وِ تَمومِ دِروکِنَل، دریاچۀ اَلو گِرُتَه بِی تَش وُ گوگرد نَصیبِشون ایابو. یِه مرگِ دِوِمِه.»
اورشلیمِ تازَه
9اوسِه یکی وَ او هَف فرشتَه که هَف جومِ پُر وَ او هَف بَلایِ آخِرَ داشتِن، اومَه وُ وَ مِ گُت: «بیو! مِ عروس، یعنی زَنِ بَرَه نَه وَت نِشون اییُم.» 10وُ وِّ مِنِه روحِ خدا مِنَه بُرد وَ بالِی کُویی گَپو وِ بِلَند، وِ شهرِ مقدّسِ اورشلیمَه وَم نِشون دا که وَ آسَمون وَ طِی خدا اییومَه دومِن. 11جلالِ خدا نَه داشت، بِرچِش مِی جواهرِ قیمتی نایابی بی، مِی یَشم، وِ مِی بلور شفاف بی. 12دیفارِ گَپوِ بِلَندی داشت، بِی دُوازَه دَروازَه، وِ طِی دَروازهیَلِش دُوازَه فرشتَه بی، وُ وَ ری دَروازِهیَل نومِ دُوازَه طِیفِی بنیاسرائیل نوشتَه وابییَه بی. 13سه دَروازَه وَ طرفِ مشرق، سه دَروازَه وَ طرفِ شمال، سه دَروازَه وَ طرفِ جنوب وِ سه دَروازَه وَ طرفِ مغرب بی. 14وِ دیفارِ شهر دُوازَه پییَه داشت، وِ ری اونگَل دُوازَه نومِ دُوازَه رسولِ بَرَه بی.
15او فرشتهای که بِی مِ گَپ ایزَه، چویی طِلائی سی اندازَهگِرُتَن داشت تا شهر وِ دَروازِهیَل وِ دیفارِشَه اندازَه بِگِرِه. 16شهر وَ شکلِ چارگوش، دِرازا وِ پَناش یکی یَه. وِّ شهرَ بِی او چو اندازَه گِرُت وِ برابرِ دوهزاروچارصد کیلومتر بی. دِرازا وِ پَنا وِ بِلَندیش یکی بی. 17وِّ دیفارِشَه هَم اندازَه گِرُت، وَ قیاسِ انسان صدوچِلوچار ذِراع بی، که قیاسِ فرشتَه هَم هَمیِه بی. 18دیفارِ شهر وَ یَشم دِرِس وابییَه بی، ایسِه یِکِه شهر خُوش، وَ طِلِی خالص وِ مِی شیشۀ شفاف بی. 19بَردَلی که دیفارِ شهر وَ ری اونگَل نَهایَه وابییَه بی، بِی همَه طور جواهِرَلِ قیمتی تزئین وابییَه بی. پییِۀ اَوَل وَ یَشم بی، پییِۀ دِوُم وَ یاقوتِ آبی، پییِۀ سِوُم وَ عقیقِ سَفی، پییِۀ چارُم وَ زُمُرد بی، 20پییِۀ پَنجُم وَ عقیقِ سُرخ، وِ شیشِمی وَ عقیقی وَ رنگِ تَش، هَفتِمی وَ زِبَرجَد، هَشتِمی وَ یاقوتِ کَلون، نُهُمی وَ یاقوتِ زرد، دَهُمی وَ عقیقِ سُوز، یازَهِمی وَ فیروزَه وِ دُوازَهِمی وَ یاقوتِ بَنوش. 21وِ دُوازَه دَروازۀ شهر، دُوازَه مُرواری بییِن، هر کویَکی وَ دَروازهیَل وَ یِه مُرواری ساختَه وابییَه بی، وِ خیابونِ شهر وَ طِلِی خالص وِ مِی شیشَه، شفاف بی.
22وِ هیچ معبدی مِنِه شهر نَدییُم، سییِکِه خداوند خِدِی قادرِ مطلق وِ بَرَه، معبَدِشِن. 23وِ شهر اِتیاجی وَ اَفتو وِ ماه نَیارِه که وَش روشنایی بییِه، سییِکِه جلالِ خدا وَش نور اییِه، وِ بَرَه چراغِ وِنِه. 24مِلَتَل مِنِه نورِش قَیَم اییَگِرِن، وِ پادِشایَلِ زمین، جلالِ خِشونَه ایارِن وُچو. 25وِ دَروازِهیَلِش مِنِه روز وَتَه بَسَه نیابون، وُچِه وَتَه شُو نیابو. 26اونگَل جلال وِ حُرمتِ مِلَتَلَه ایارِن وُچو. 27امّا هیچ چیِ ناپاک وِ هیچ کسی که کارَلِش کِفارات وِ دِرویَه، وَتَه وَ وُچِه رَه نیجورِه، بَلکَم تِنا کَسَلی که نومِشون مِنِه دفترِ حیاتِ بَرَه نوشتَه وابییِه، وَ وُچِه رَه ایجورِن.
Currently Selected:
مکاشِفۀ یوحنا 21: SLB
Highlight
Copy
Compare
Share
Want to have your highlights saved across all your devices? Sign up or sign in
@ 2024 Korpu Company
