مکاشِفۀ یوحنا 20
20
سلطَنَتِ هزار سالَه
1اوسِه دییُم فرشتهای وَ آسَمون ایا دومِن، وِ کِلیلِ چاهِ هاویَه باشِه، وِ زنجیرِ گَپویی مِنِه دَسِشِه. 2وِ فرشتَه، اَژدَها نَه، او مارِ قدیمی نَه، که هَمو اِبلیس یا شِیطونِه، گِرُت وِ تا هزار سال نَهاش مِنِه بَند، 3وُ وِّ نَه وِردا مِنِه چاهِ هاویَه وِ دَرِشَه بَس وِ مُهرِمومِش کِه تا دَ مِلَتَلَه گول نَزَنِه تا او هزار سال تَموم وابو. دِنداش وِّ بایِس سی مِدَتِ کمی آزاد بو.
4اوسِه تَختَلی دییُم که ریشون کَسَلی نِشَسَه بییِن که اقتدارِ داوری وَ اونگَل دایَه وابییَه بی. وِ جونِ کَسَلی نَه دییُم که وَ خاطرِ شهادتِ عیسی وُ وَ خاطرِ کلامِ خدا سَرِشون وَ بَیَنِشون جیا وابییَه بی، وِ اونگَلی نَه که، نَه او جونورِ وحشی وِ مِجسمَشَه پرستش کِردَه بییِن وِ نَه نِشونۀ وِّ نَه وَ ری پیشونی وِ دَسِشون قبول کِردَه بییِن. اونگَل زِندَه وابییِن وِ بِی مسیح هزار سال سلطَنَت کِردِن. 5باقیِ مُردِهیَل زِندَه نَوابییِن تا او هزار سال تَموم وابو. یِه زِندَه وابییَنِ مُردِهیَلِ اَوَلِه. 6مبارک وِ مقدّسِه وِه که وَ او زِندَه وابییَنِ اَوَل بَهر دارِه. مرگِ دِوُم وَ ری ایطو کسی هیچ قدرتی نَیارِه بَلکَم اونگَل کاهِنَلِ خدا وِ مسیح باقی ایوِیسِن وِ باش هزار سال سلطنت ایکِنِن.
شکستِ شِیطون
7اوسِه که او هزار سال تَموم وابو، شِیطون وَ زِندان آزاد ایابو 8وِ ایا وَدَر تا مِلَتَلَه مِنِه چار گوشۀ زمین، یعنی جوج وِ ماجوجَ که عِدَهشون مِی ریگَلِ هیبِی دریا یَه، گول بِزَنِه تا سی جنگ، جَمِشون کِنِه. 9وِ اونگَل مِنِه پَهنۀ زمین رَتِن جِلو وِ اُردوگاهِ مقدَسَل وِ او شهرِ عزیزَ محاصِرَه کِردِن، امّا تَش وَ آسَمون باری وِ اونگَلَه نابود کِه. 10وِ اِبلیس که اونگَلَه گول زَیَه بی، وِردایَه وابی مِنِه دریاچۀ تَش وِ گوگرد، جِیئی که او جونورِ وحشی وِ او پِیغمبرِ وَدِرو بییِن. وِ اونگَل شُو وِ رو تا ابد عذاب ایکَشِن.
داوری وَرِ تختِ سَفیِ گَپو
11اوسِه تختِ سَفیِ گَپویی دییُم، وِ کسی نَه که نِشَسَه بی وَ ریش. آسَمون وِ زمین وَ حضورِش ایدَرَتِن وِ جِیئی سیشون نَبی. 12وِ مُردِهیَلَه دییُم، وَ خُرد وُ گَپو، که وَرِ تخت وِیسایَه بییِن، وِ دَفتَرَل واز وابی. اوسِه دفتری دَ واز وابی که دفترِ حیاتِه. وِ مُردِهیَل طبقِ کارَلِشون، طبقِ اوچیئی که مِنِه او دفتَرَل نوشتَه وابییَه بی، داوری وابییِن. 13وِ دریا مُردِهیَلی نَه که مِنِش بی دا واپَس؛ مرگ وِ دنیایِ مُردِهیَل، مُردِهیَلی نَه که مِنِشون بی دان واپَس، وِ هر کس طبقِ کارَلی که کِردَه بی، داوری وابی. 14اوسِه مرگ وِ دنیایِ مُردِهیَل وِردایَه وابییِن مِنِه دریاچۀ تَش. ای دریاچۀ تَش، مرگِ دِوِمِه. 15وِ هر کس نومِش مِنِه دفترِ حیات نوشتَه نَوابییَه بی، وِردایَه وابی مِنِه دریاچۀ تَش.
Currently Selected:
مکاشِفۀ یوحنا 20: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
