مکاشِفۀ یوحنا 19
19
شایی مِنِه آسَمون
1دِنداش، صیایی اِشنُفتُم مِی صییِی بِلَندی وَ جماعتِ گَپویی مِنِه آسَمون، که قیرَه ایزَن:
«هَلِلویاه!
نجات وِ جلال وِ قدرت این خِدِی ایمانِه،
2سییِکِه داوَرییَلِش حقِه وِ عَدلِه.
سییِکِه وُّ، او فاحشۀ گَپو نَه داوری کِردِه
وِه نَه که بِی بیعفتیش زمینَه وَ گند کَشییِه،
وِ خدا تَقاصِ خینِ خادِمَلِ خِشَه وَش اِسَیِه.»
3وِ یِه دَفدَه گُتِن:
«هَلِلویاه!
تا ابدالآباد وَ او شهرِ گَپو دی راس ایابو.»
4وِ او بیسِچار ریشسَفی وِ او چار مخلوقِ زِندَه دَر برابرِ خدایی که نِشَسَه بی وَ ری تخت، اُفتان وَ خَک وُ وِّ نَه پرستش کِردِن وِ ایگُتِن:
«آمین، هَلِلویاه!»
5وِ صییِی وَ تَخت وَریسا که ایگُت:
«خِدِی ایما نَه ستایش کِنیت،
ای تَمومِ خادِمَلِش،
ای ایشا که زَلَتون وَش ایرَه،
وَ خُرد و گَپو!»
6اوسِه صییِی اِشنُفتُم که مِی صییِی جماعتی گپو، مِی هوفۀ اُویَلِ فراوون، وِ مِی صییِی بِلَندِ قُرُمتِراق بی، که قیرَه ایزَن، ایگُتِن:
هَلِلویاه!
سییِکِه خداوند خِدِی ایما،
او قادرِ مطلق، سلطَنَت ایکِنِه.
7بییِیم وَ شوق وِ شایی کِنیم، وُ وِّ نَه ستایش کِنیم،
سییِکِه زَمونِ عروسیِ او بَرَه رَسییِه،
وِ عروسِش خِشَه آمایَه کِردِه؛
8جومۀ کتونِ نازکِ زَرقِبَرقدارِ پاکی وَش دایَه وابی تا کِنِه وَرِش.»
سییِکِه او جومۀ کتون، کارَلِ صالحِ مقدسَلِه.
9وِ او فرشتَه وَم گُت: «یِنَه بنویس: خَش وَ حال اونگَلی که وَ شومِ عروسیِ او بَرَه دعوَتِن.» یِنَه هَم وَم گُت: «اینگَل کلامِ حقیقیِ خدایَن!» 10اوسِه اُفتام وَ پاش تا وِّ نَه بِپَرَستُم. امّا وِّ وَم گُت: «نَکِنِه ای کارَ کِنی! مِ بِی تِ وِ کَکایَلِت که سِفت چَسبِسِنِه وَ شهادتِ عیسی، هُم خِذمَتُم. خدا نَه پرستش کُ! سییِکِه شهادتِ عیسی، روحِ نبوتِه.»
سُوارِ اسبِ سَفی
11اوسِه دییُم که آسَمون وازِه، سِی کُ! دَمِ ریم، اسبی سَفی یَه، نومِ سُوارِش وَفادار وِ حَقِه، وِّ بِی عدالت داوری ایکِنِه وِ ایجَنگِه. 12تییَلِش مِی بِرازۀ تَشِه وِ ری سَرِش تاجَلِ زیادی یَه وِ نومی وَ ریش نوشتَه یَه که هیشکَه غیرَ خُوش نُونِش. 13قَبایی خینی وَ وَرِشِه وِ نومی که وَ وِه صیاش ایزَنِن "کلامِ خدا" یَه. 14وِ لَشکَرَلِ آسَمون، سُوار وَ اسبَلِ سَفی، وِ بِی جومهیَلِ کَتونِ نازک وِ سَفی وِ پاک، وَ دینِش ایرَتِن. 15وِ شُمشیرِ تیزی وَ کَپِش ایا وَدَر، که بِی وِه مِلَتَلَه ایزَنِه، «وَ اونگَل بِی گِلاکِ آهِنی حکومت ایکِنِه.» وِّ انگورِ خِشمِ غضبِ خِدِی قادرِ مطلقَه مِنِه حوضِ شراب لَقَتکو ایکِنِه. 16وَ ری قَبا وِ رونِش نومی نوشتَه وابییِه: "پادِشاهِ پادِشایَل وِ خداوندِ خداوَندَل."
17اوسِه فرشتهای دییُم که وِیسایَه بی مِنِه اَفتو وِ بِی صییِی بِلَند وَ تَمومِ باهِندِهیَل که مِنِه دلِ آسَمون بال ایزَن، ایگُت: «بییِیت؛ جَم وابِیت سی شومِ گپویِ خدا، 18تا وَ گوشتِ بَیَنِ پادِشایَل وِ سَردارَل وِ زوردارَل بِخَریت، وُ وَ گوشتِ اسبَل وِ سُوارَلِشون، وُ وَ گوشتِ تَمومِ آیَمَل، وَ غلام و آزاد، وَ خُرد و گَپو.»
19وِ او جونورِ وحشی وِ پادِشایَلِ زمینَه دییُم که بِی لشکَرَلِشون جَم وابییَه بییِن تا وَ ضِدِ او اسبسُوار وُ وَ ضِدِ لشکَرِش بِجَنگِن. 20وِ جونورِ وحشی گرفتار وابی وِ باش او پِیغمبرِ وَدِرو که مِنِه حضورِ جونورِ وحشی نِشونهیَل و معجزهیَلی کِردَه بی تا اونگَلی نَه که نِشونۀ جونورِ وحشی نَه قبول کِردَه بییِن وِ مجسمۀ وِّ نَه پرستش ایکِردِن گول بِزَنِه. اونگَل هر دِتاشون، زِندَه وِردایَه وابییِن مِنِه دریاچۀ تَش که بِی گوگِرد ایسوزِه. 21وِ باقیِ اونگَل بِی شُمشیری که وَ کَپِ او اسبسُوار ایومَه وَدَر، کُشتَه وابییِن وِ تَمومِ او باهِندِهیَل وَ گوشتِ اونگَل سیر خَردِن.
Currently Selected:
مکاشِفۀ یوحنا 19: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
