مکاشِفۀ یوحنا 1
1
مِنِه شروع
1مکاشفۀ عیسی مسیح، که خدا وَش عطا کِه تا اوچییَلی نَه که ایبایِس وَ ای زیئی اتفاق بییُفتِه، وَ غلامَلِ خُوش نشون بییِه، وُّ وِه نَه بِی بسی کِردَنِ فرشتۀ خُوش طِی غلامِش یوحنا آشکار کِه، 2که وَ کلامِ خدا وِ شهادت عیسی مسیح، یعنی هر چیئی که دی، گَوایی اییِه. 3خَش وَ حالِ کسی که کلامِ ای نبوّتَه ایخونِه وِ خَش وَ حالِ اونگَلی که وِه نَه ایشنِفِن وِ اوچیئی نَه که مِنِش نوشتَه وابییِه، نگَه ایکِنِن؛ سییِکِه وَخت نِزِنگِه.
پِیوم وَ هَف کلیسا
4وَ طرفِ یوحنا،
وَ هَف کلیسا که مِنِه وِلاتِ آسیایَن:
فیض وِ صلحوُسلامتی وَ ایشا بو، وَ طرفِ کسی که هِه وِ بی وِ ایایِه، وُ وَ طرفِ هَف روح که مِنِه پیشگاهِ تختِ پادشاییِ وِّنِن، 5وُ وَ طرفِ عیسی مسیح، او شاهدِ وفادار، اَوَل کس که وَ مُردِهیَل زِندَه وابی، وِ حاکمِ پادشایَلِ ری زمین.
وِّ که ایما نَه دوس دارِه وِ بِی خینِ خُوش ایما نَه وَ گِنایَلِمون آزاد کِردِه، 6وُ وِّ ایما نَه مملکتی کِه وَ کاهِنَلی سی بُوش، خدا، جلال وِ سلطنت تا وَ ابد وَ وِّ بو. آمین.
7سِی کِنیت! وِّ بِی اُورَل ایا،
وِ هر تییَهای وِّ نَه ایبینِه،
حتی اونگَلی که نیزَه وَش زَن؛
وِ تَمومِ طِیفهیَلِ ری زمین وَ خاطرِ وِّ شیوَن ایکِنِن.
وَ دِرِسی که ایطو ایابو. آمین.
8خداوند خدا ایگُ: «مِ "الف" وِ "ی" یَم او قادرِ مطلق، که هِه وِ بی وِ ایایِه.»
رؤیایِ کِرِ انسان
9مو، یوحنا، کَکِی ایشا، که مِنِه عذابَل وِ پادشایی وِ پاوَرجایی که مِنِه عیسی یَه بِی ایشا شریکُم، وَ خاطرِ کلامِ خدا وِ شهادت وَ عیسی، مِنِه جزیرهای بییُم که وَش ایگُن «پاتموس». 10مِنِه روزِ خداوند، روحِ خدا مِنَه گِرُت مِنِه خُوش، وِ صییِی بِلَندی مِی صییِی شیپور وَ پَسِ سَرُم اِشنُفتُم، 11که ایگُت: «اوچیئی نَه که ایبینی مِنِه کتابی بنویس وُ وِه نَه بسی کُ سی هَف کلیسایِ اَفِسُس، اِسمیرنا، پِرگاموم، تیاتیرا، ساردِس، فیلادِلفیا وِ لائودیکیَه.»
12اوسِه وَرگَشتُم تا بِوینُم یِه صییِی کیَه که بام گَپ ایزَنِه؛ وَختی وَرگَشتُم، هَف چراغدونِ طِلا دییُم، 13وِ مابینِ او چراغدونَل یکی نَه دییُم که مِی "کِرِ انسان" بی. وِّ قبایی بِلَند وَرِش بی وِ شالی طلائی وَ دورِ سینَش. 14سَرِگوشِش مِی پشم سَفی بی، وَ سَفیایِ برف، وِ تییَلِش مِی اَلوِ تَش بی، 15پایَلِش مِی برُنزِ برق اُفتایَه وِ خالص وابییَه مِنِه تَشِ کوره بی، وِ صیاش مِی صییِی کِلوفَنایَل بی. 16مِنِه دَسِ راسِش هَف ستارَه داشت وُ وَ دِهونِش شُمشیرِ دو دَمِ تیزی اییومَه وَدَر، وِ ریش مِی اَفتو بی که وَ تَمومیِ قُویَتِش بِرچ ایزَه.
17وَختی وِّ نَه دییُم مِی مُردَه اُفتام وَرِ پایَلِش. امّا وِّ دَسِ راسِشَه نَها وَ ریم وِ گُت: «زَلَت نَرَه، مِنُم اول وِ آخِر؛ 18مِ که زندَهیَم. مِ مُردُم، وِ ایسِه تا ابد زندَهیَم وِ کلیلَلِ مرگ وِ دنیایِ مُردِهیَل مِنِه دَسِمِه.
19پَ اوچییَلی که دییِی، اوچییَلی که ایسِه هِسی وِ اوچییَلی که وَ یِه واپَس ایابو، هَمَشَه بنویس. 20سِرِّ او هَف ستارَه که مِنِه دَسِ راسِ مِ دیئی وِ سِرِّ او هَف چراغدونِ طِلا یِنِه: او هَف ستارَه، فرشتهیَلِ هَف کلیسایَن، وِ او هَف چراغدون، هَف کلیسایَن.
Currently Selected:
مکاشِفۀ یوحنا 1: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
