مکاشِفۀ یوحنا 18
18
سَرنِگون وابییَنِ بابِل
1دِنداش، فرشتهای دَ دییُم که وَ آسَمون اییومَه دومِن، که اقتدارِ گَپویی داشت وِ زمین وَ جلالِ وِّ نورانی وابی. 2بِی صییِی بِلَندی قیرَه زَه:
«سَرنِگون وابی! بابلِ گَپو سَرنِگون وابی!
بابل وابییِه منزلِ دیوَل
وِ پَناگاهِ هر روحِ ناپاکی،
وِ چالِ هر پرندۀ ناپاک
وِ کِرِ هر جونورِ وحشیِ ناپاک وِ کِفاراتی.
3سییِکِه تَمومِ ملَتَل وَ شرابِ هوسِ هَرزهایِ وِّ خَردِن،
وِ پادِشایَلِ زمین باش بیعفتی کِردِنِه،
وِ معاملَهگَرَلِ زمین وَ زیادیِ تجملِ زِندِیی وُّ
دارا وابییِنِه.»
4اوسِه صیایی دَ وَ آسَمون اِشنُفتُم که ایگُت:
«ای قومِ مو، وَ ای شهر بِزَنیت وَدَر،
نَکِنِه شریکِ گِنایَلِش وابِیت،
نَکِنِه شریکِ بَلایَلِش وابِیت،
5سییِکِه گِنایَلِش تا وَ آسَمون اومَیِه سَرِ یَک،
وِ خدا خَطایَلِشَه وَ یای آوُردِه.
6هَموطو که بِی باقی تا کِردِه، باش تا کِنیت؛
وَ جِی کارَلی که کِردِه، دِ برابر وَش عوض بِئیت.
وَ پیالۀ شرابِ خُوش دِ برابر وَش بِئیت.
7وَ قَدی که خِشَه جلال دا وِ مِنِه تجمل زِندِی کِه،
هَموقَه وَش عذاب وِ ماتم بِئیت.
سییِکِه طِی خِشی ایگُ:
"مو مِی یِه مَلَکَه ایشینُم.
وِ نَه بیوَه یَم وُ وَتَه ماتم نیبینُم."
8سی هَمیو بلایَلِش مِنِه یِه روز ایایِن،
مرگ وِ ماتم وِ قحطی.
وِ مِنِه تَش ایسوزِه،
سییِکِه قادِرِه، خداوند خدایی که وِّ نَه داوری کِردِه.»
9وِ پادِشایَلِ زمین که باش زِنا کِردِن وِ باش مِنِه تجمل زِندِیی کِردِن، وَختی که دیِ سُتَنِ وِّ نَه بِوینِن، سیش ایگِریوِن وِ شَربَه ایخونِن. 10وَ ترسِ عذابی که وِّ ایکَشِه دیرادیر ایوِیسِن وِ ایگُن:
«وای، وای! ای شهرِ گَپو،
ای بابل، تِ ای شهرِ زوردار!
سییِکِه مِنِه یِه ساعت داوریِ تِ اومَه!»
11وِ معامِلَهگَرَلِ زمین سیش ایگِریوِن وِ ایشینِن وَ عَزاش، سییِکِه دَ کسی بارِشونَه نیسونِه، 12یعنی بارِ طِلا وِ نقرَه، جواهرَل وِ مُروارییَلِشونَه؛ بارِ پارچِۀ کَتونِ نازکِ قیمتی وِ بَنوش وِ اوریشُم وِ حریرِ سُرخِشونَه؛ بارِ چُویَلِ خَشبوِ جورواجورِشون وِ بارِ ظَرفَلِ جورواجور وَ عاج وِ بارِ ظَرفَلِ جورواجورِ چوئیِ قیمَتی وِ برنز وِ آهِن وِ مَرمَرِشونَه؛ 13بارِ دارچین وِ اَدویَه وِ بخورِ خَشبو وِ مُر وِ کُندرِشونَه؛ بارِ شراب وِ روغنِ زیتون وِ آردِ خوب وِ گندمِشونَه؛ رَمهیَل وِ گَلهیَل وِ اسبَل وِ اَرابهیَلِشونَه؛ وِ غلامَل یعنی جونِ آیَمَلِشونَه.
14هَمونگَل ایگُن: «او میوهای که جونِت اُرزوشَه داشت، وَ دَسِت رَتِه. زرق وُ برق وِ شوکتِت هَمَش رَتِه وَ بای، وُ وَتَه وَ دَس نیاریشون.» 15معامِلَهگَرَلِ ای بارَل که وَ او شهر دارا ایابییِن، وَ زَلِی عذابی که وِّ ایکَشِه، دیرادیر ایوِیسِن وِ ایگِریوِن وِ بِی صییِی بِلَند شَربَه ایخونِن 16ایگُن:
«وای، وای! ای شهرِ گَپو،
که جومهیَلی وَ پارچهیَلِ کتونِ نازک وَ رنگِ بَنوش وِ سُرخ وَرِت بی،
وِ بِی طِلا وِ جواهرَل وِ مُروارییَل مَلوس وابییَه بیئی!»
17سییِکِه مِنِه یِه ساعت تَمومِ دارائیت رَت وَ بای.»
وِ تَمومِ ناخدایَل وِ دریادارَل وِ مَلَوانَل وِ تَمومِ اونگَلی که وَ رَه دریا معامِلَه ایکِنِن، دیر وِیسان. 18وِ وَختی که دیِ سُتَنِ وِه نَه دییِن، قیرَه زَن، گُتِن: «کو شهر مِی ای شهرِ گَپو بی؟» 19وِ خِل ایکِردِن وَ سَرِشون وِ بِی گریوَه شَربَه ایخُوندِن وِ قیرَه ایزَن ایگُتِن:
«وای، وای! ای شهرِ گَپو،
شهری که تَمومِ کشتیدارَل، بِی ثروتِ وِه دارا وابییِن،
سییِکِه مِنِه یِه ساعت سَرنِگون وابی!
20سیش شایی کِنیت، ای آسَمون!
ای مقَدَسَل وِ رَسولَل وِ پِیغَمبَرَل!
سییِکِه خدا تَقاصِ ایشا نَه وَش اِسَیِه.»
21اوسِه یِه فرشتۀ زوردار، بَردی مِی بَردِ آسیو گَپویی وَگِرُت وُ وِه نَه وِردا مِنِه دریا وِ گُت:
«هَمیطو بابل، او شهرِ گَپو، بِی کُشتِکُشتار وِرِش اییِن دومِن
وِ دَ وَتَه نِشونی وَش جُسَه نیابو.
22وَ یِه واپَس دَ صییِی چَنگزَنَل، مِهتَرَل
نِیزَنَل وِ شیپورزَنَل،
مِنِه تِ وَتَه وَ گوش نیرَسِه.
دَ هیچ صنعتگَری وَ هیچ صِنفی
مِنِه تِ جُسَه نیابو.
وِ دَ صییِی هیچ آسیویی
مِنِه تِ وَ گوش نیرَسِه؛
23دَ نورِ هیچ چراغی مِنِه تِ وَتَه بِرچ نیزَنِه؛
دَ صییِی هیچ عروسِ دومایی مِنِه تِ وَ گوش نیرَسِه.
سییِکِه معامِلَهگَرَلِت گَپویَلِ زمین بییِن
وِ تَمومِ مِلَتَل بِی جادویِ تِ وَ رَه وِل وابییِن.
24خینِ پِیغَمبرَل وِ مقدسَل،
وِ خینِ تَمومِ کَسَلی که وَ ری زمین کُشتَه وابییِن، وَ نِی وِه نِه.»
Currently Selected:
مکاشِفۀ یوحنا 18: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
