مکاشِفۀ یوحنا 17
17
فاحشۀ گَپو وِ جونورِ وحشی
1اوسِه یکی وَ او هَف فرشتَه که هَف جوم داشتن، اومَه وُ وَم گُت: «بیو تا داوریِ او فاحشۀ گَپویی نَه که نِشَسِه وَ ری اُویَلِ زیاد نِشونِت بییُم، 2که پادِشایَلِ زمین باش زِنا کِردِن وِ اونگَلی که مِنِه زمین منزل دارِن، وَ شرابِ زِنایِ وِّ مَهس وابییِن.»
3وِ او فرشتَه مِنِه روحِ خدا، مِنَه بُرد وَ بیابونی. وِ زَنی دییُم که سُوارِ جونورِ وحشیِ سُرخی بی که پوشییَه وابییَه بی وَ نومَلِ کُفردار، وِ هَف سَر وِ دَه شاخ داشت. 4او زَن جومۀ بَنوش وِ سُرخی وَرِش بی وِ بِی طِلا وِ جواهرَل وِ مُروارییَل، مَلوس وابییَه بی. پیالهای طِلائی مِنِه دَسِش بی که پُرتاپُر بی وَ کِفارات وِ ناپاکییَلِ زِناش. 5وِ ای نومِ مرموز نوشتَه وابییَه بی وَ ری پیشونیش: «بابِلِ گَپو، دِی فاحشهیَل وِ کِفاراتِ زمین.» 6وِ دییُم او زن، مَهسِه وَ خینِ مقدَسَل وِ خینِ اونگَلی که سی عیسی شَهید وابییِنِه. هَمیِکِه او زَنَه دییُم سخت حیرتزَیَه وابییُم. 7امّا فرشتَه وَم گُت: «حیرَتِت وَ چِنِه؟ مِ سِرِّ او زَن وِ سِرِّ او جونورِ وحشی نَه که هَف سَر وِ دَه تا شاخ دارِه وِ زن سُوارِشِه، سیت ایگُم. 8او جونورِ وحشی که دیئی، زَمونی بی، ایسِه نیسی، وُ وَ هَمی زیئی وَ چاهِ هاویَه ایزَنِه وَدَر وِ ایرَه وَ طرفِ نابودی؛ وَ اونگَلی که وَ ری زمین منزل دارِن، که نومِشون وَ اَولِ آفرینِشِ جهان مِنِه دفترِ حیات نوشتَه نَوابییِه، وَ دییَنِ جونورِ وحشی حیرتزَیَه ایابون، سییِکِه زَمونی بی، ایسِه نیسی، وِ ایایِه.
9یِه عقلِ بِی حکمتی ایخوا. او هَف سَر هَف کُویَن که او زن نِشَسِه وَ ریشون. 10وِ هَف پادشایَن که پنج تاشون سَرنِگون وابییِنِه، وِ یِکیشون هِسی، وِ یکی دَشون هَنی نَیومَیِه؛ وِ موقِی که بیا، بایِس وِیسِه امّا تِنا یِچِی. 11وِ او جونورِ وحشی که زَمونی بی وِ ایسِه نیسی، هشتِمی یَه. وِ این هَمو هَف نفرِه وِ ایرَه وَ طرفِ نابودی.
12«وِ او دَه تا شاخ که دیئی، دَه تا پادشایَن که هَنی وَ سلطنت نَرَسییِنِه. امّا اونگَل قرارِه سی یِه ساعت بِی جونورِ وحشی وَ عنوانِ پادشایَل اقتدار بِگِرِن. 13اونگَل فکرِشون یکی یَه وِ قدرت وِ اقتدارِ خِشونَه اییِن وَ جونورِ وحشی. 14اونگَل بِی بَرَه ایجَنگِن وِ بَرَه وَشون زور ایابو، سییِکِه وِّ خداوندِ خداوَندَل وِ پادِشاهِ پادِشایَلِه - وِ اونگَلی که باشِن، خُوندَه وابییِهیَل وِ بَرگزیدِهیَل وِ وفادارَلِن.»
15وِ او فرشتَه وَم گُت: «اُویَلی که دیئی، جِی که فاحشَه نِشَسِه، قومَل وِ جماعَتَل وِ مِلَتَل وِ زُوونَلِن. 16وِ او دَه شاخ وِ جونورِ وحشی که دیئی، وَ فاحشَه بیزار ایابون. اونگَل او فاحشَه نَه تِنا اینِن وِ لخت وِلِش ایکِنِن، گوشتِشَه غوت اییِن وُ وِّ نَه مِنِه تَش ایسوزَنِن. 17سییِکِه خدا نَهایِه مِنِه دِلشون که ارادۀ وِّ نَه وَجا بیارِن وِ هُمفکر بون، تا قدرتِ سلطنتِ خِشونَه بییِن وَ جونورِ وحشی، تا کلامِ خدا اَنجوم وابو. 18وِ او زن که دیئی هَمو شهرِ گَپو یَه که وَ پادشایَلِ زمین سلطنت ایکِنِه.»
Currently Selected:
مکاشِفۀ یوحنا 17: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
