مکاشِفۀ یوحنا 16
16
هَف جومِ خِشمِ خدا
1اوسِه صیایی بِلَند وَ معبد اِشنُفتُم که وَ او هَف فرشتَه ایگُت: «بِرِیت وِ هَف جومِ خِشمِ خدا نَه بِریزیت وَ ری زمین.» 2پَ فرشتۀ اَوَل رَت وِ جومِ خِشَه رِت وَ ری زمین، وِ زَخمَلِ بَدشکل وِ پُردردی اومَه وَ ری مردِمی که نِشونۀ او جونورِ وحشی نَه داشتِن وِ مجسمۀ وِّ نَه پرستش ایکِردِن.
3فرشتۀ دِوُم جومِ خِشَه رِت وَ دریا، وِ دریا مِی خینِ آیَمِ مُردَه وابی، وِ هر چی جونداری که مِنِه دریا بی، مُرد.
4فرشتۀ سِوُم جومِ خِشَه رِت وَ ری رویَل وِ چشمهیَلِ اُو، وِ اونگَل خین وابییِن. 5وِ اِشنُفتُم که فرشتهای که اختیارِ اُویَل وَش دایَه وابییَه بی، ایگُت:
«ای قدوس، تِ عادلی
وِه که هِسی وِ بی
سییِکِه ای مجازاتَلَه تِ آوُردی،
6سییِکِه اونگَل خینِ مقدَسَل وِ پِیغَمبَرلَه رِتِنِه،
وِ تِ وَشون خین دِی تا بِخَرِن.
یِه اوچیئی یَه که حَقِشونِه!»
7وِ اِشنُفتُم مذبَح ایگُت:
«بَلِه، ای خداوند خِدِی قادرِ مطلق،
داوَرییَلِ تو، حق وِ عدلِه.»
8فرشتۀ چارُم جومِ خِشَه رِت وَ ری اَفتو، وَ اَفتو اجازَه دایَه وابی تا مردِمَه بِی تَش بِسوزَنِه. 9مردم وَ زورِ گرما سُتِن، وِ نومِ خدا نَه که وَ ای بَلایَل قدرت دارِه، لعنت کِردِن. اونگَل توبَه نَکِردِن وُ وِّ نَه جلال نَدان.
10فرشتۀ پَنجُم جومِ خِشَه رِت وَ ری تختِ او جونورِ وحشی، وِ تاریکی قَلمرو وِّ نَه گِرُت مِنِه خُوش. آیَمَل وَ زورِ درد، زُوونِ خِشونَه ایکُتِن. 11وُ وَ خاطرِ دَردَل وِ زَخمَلِشون خِدِی آسَمونَه لعنت کِردِن. اونگَل وَ کارَلِ خِشون توبَه نَکِردِن.
12فرشتۀ شیشُم جومِ خِشَه رِت وَ ری رو گَپو فِرات، وِ اُوش خشک وابی، تا رَه نَه سی پادِشایَلی که وَ مشرق ایان، آمایَه کِنِه. 13اوسِه دییُم سِه تا روحِ ناپاک مِی بَک وَ کَپِ اژدها وُ وَ کَپِ او جونورِ وحشی وُ وَ کَپِ پیغمبرِ وَدِرو اومَن وَدَر. 14سییِکِه اینگَل روحَلِ دیوَلِن، که نِشونهیَل وِ معجزهیَلی ایکِنِن وِ ایرَن طِی پادِشایَلِ تَمومِ دنیا تا اونگَلَه جَم کِنِن سی جنگ مِنِه او روزِ گَپو خِدِی قادرِ مطلق.
15«سِی کِنیت! مو مِی دِزی ایام! خَش وَ حالِ او کسی که دیار وِیسِه، وِ جومَش وَ وَرِش بو، نَکِنِه لخت رُونَه وابو وِ رسوائیشَه بِوینِن.»
16وِ اونگَل، پادِشایَلِ تَمومِ دنیا نَه جَم کِردِن مِنِه جِیئی که وَ زُوونِ عبرانی وَش ایگُن "حارمَگِدّون".
17فرشتۀ هفتُم جومِ خِشَه رِت مِنِه هوا، وِ صییِی بِلندی وَ معبد وُ وَ تخت اومَه که ایگُت: «کار تَموم وابی!» 18وِ تَشِبرق وِ قُرُمتِراق وِ آسَمونغِرُمبَه بی که ایوَریسا، وِ زمینجِمِشتِ مَهلی گَپویی اومَه، طوری که وَ شروع آفرینشِ بشر وَ ری زمین، زمینجِمِشتی وَ ای گَپویی نَبییِه. 19شهرِ گَپو سه کَل وابی وِ شهرَلِ مِلَتَل سَرنِگون وابییِن. وِ خدا او بابلِ گَپو نَه وَ یای آوُرد وِ پیالۀ پُرتاپُر وَ شرابِ تَشِ خِشمِ خِشَه دا وَ خَردِش. 20وِ هر جزیرَه دَرَت وِ دَ هیچ کُویی نَبی. 21وُ وَ آسَمون تِگِرسَلِ گَپویی وَ ری آیَمَل باری که هر دونِش، حدودِ پَنجا کیلو بی؛ وِ آیَمَل وَ خاطرِ ای تِگِرس خدا نَه لعنت کِردِن، سییِکِه ای بَلا مَهلی سخت بی.
Currently Selected:
مکاشِفۀ یوحنا 16: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
