مکاشِفۀ یوحنا 12
12
زَن وِ اژدها
1وِ نِشونۀ گَپویی مِنِه آسَمون دیار وابی: زَنی که اَفتو وَرِش بی وِ ماه زِرِ پایَلِش، وِ تاجی وَ دُوازَه ستارَه وَ ری سَرِش بی. 2او زَن حامِلَه بی وُ وَ دردِ زِیمون وِ عذابِ زِییدَن قیرَه ایزَه. 3اوسِه نِشونهای دَ مِنِه آسَمون دیار وابی: سِی کُ! اژدهایِ گَپویی وَ رنگ سرخ که هَف سَر داشت وِ دَه تا شاخ، وِ هَف تاج وَ ری سَرَلِش بی. 4وِ دُمِش یِهسومِ ستارهیَلِ آسَمونَه رُفت وِ رِتِشون وَ ری زمین. وِ اژدها وِیسا دَر برابرِ او زَن که داشت زِیمون ایکِه، تا هَمیِکِه وِّ زِید، بچَهشَه غوت بییِه. 5او زَن کِری زِید، کِری که قرارِه بِی گِلاکِ آهِنی وَ تَمومِ مِلَتَل حکومت کِنِه، امّا بَچَش وَگِرُتَه وابی وَ بالا طِی خدا وِ تختِش. 6وِ او زَن دَرَت وَ بیابون، وَ جِیئی که خدا سیش آمایَه کِردَه بی، تا وُچه سی هزارودِویسوشَص رو ویردارِش بون.
7وِ مِنِه آسَمون جنگ وابی. میکائیل وِ فرشتهیَلِش وَ ضِدِ اژدها جَنگییِن. وِ اژدها وِ فرشتهیَلِش وَ ضِدِ اونگَل وِیسان وَ جَنگ، 8امّا اژدها شکست خَه، وِ دَ مِنِه آسَمون جِیئی سیشون نَبی. 9وِ اژدهایِ گَپو وِر دایَه وابی دومِن، یعنی او مارِ قدیمی که نومِش اِبلیس وِ شِیطونِه، که تَمومِ دنیا نَه وَ رَه وِل ایکِنِه، وِّ وِر دایَه وابی دومِن وَ زمین، وِ فرشتهیَلِش هَم باش وِر دایَه وابییِن وَ دومِن.
10اوسِه صییِی بِلَندی مِنِه آسَمون اِشنُفتُم که ایگُت:
«ایسو نجات وِ قدرت وِ پادشاییِ خِدِی ایما،
وِ اقتدارِ مسیحِ وِّ اومَیِه،
سییِکِه او بُهتونزَن وَ کَکایَلِمون
که شو وِ رو مِنِه پیشگاهِ خِدِی ایما وَشون بُهتون ایزَنِه،
وِر دایَه وابییِه وَ دومِن.
11وِ اونگَل وَ خاطرِ خینِ بَرَه وُ وَ خاطرِ کلامِ شهادتِشون، وَش زور وابییِنِه،
سییِکِه اونگَل جونِ خِشونَه دوس نَیاشتِن، حتی تا وَ مُردَن.
12پَ، ای آسَمونَل وِ ای کَسَلی که مِنِه اونگَل منزل داریت، شایی کِنیت!
امّا وای وَ ایشا ای زمین، وِ ای دریا،
سییِکِه اِبلیس بِی خِشمِ سختی اومَیِه دومِن وَ طرفِ ایشا،
سییِکِه دونِه مِجالِ زیادی نَیارِه.»
13وِ موقِی که اژدها دی که وِر دایَه وابییِه وَ زمین، اُفتا وَ دینِ او زَنی که کِری زائییَه بی. 14امّا دِتا بالِ باشُویِ گَپو دایَه وابی وَ او زن تا وَ او مار بال بِگِرِه وَ بیابون، وَ او جِیئی که قرارِه، سی یِه زَمون، وِ زَمونَل، وِ نِصفَه زَمونی وُچِه ویردارِش بون. 15مار وَ دینِ او زَن اُویی مِی رو وَ کَپِش رِت وَدَر تا سِیلو وِّ نَه بِی خُوش بویَرِه. 16امّا زمین اومَه وَ کمکِ زَن، وِ کَپِ خِشَه واز کِه وِ رویی نَه که اژدها وَ کَپِش رِتَه بی، غوت دا. 17اوسِه اژدها وَ زن خِشم گِرُت وِ رَت تا بِی باقیِ نسلِ وِّ بِجَنگِه؛ یعنی بِی اونگَلی که احکامِ خدا نَه اطاعت ایکِنِن وِ سِفت ایچَسبِن وَ شهادتِ عیسی. 18وِ اژدها وِیسا وَ ری ریگَلِ هیبِی دریا.
Currently Selected:
مکاشِفۀ یوحنا 12: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
