مکاشِفۀ یوحنا 11
11
دِتا شاهد
1اوسِه چو بِلَندی وَم دایَه وابی که مِی چو اندازَهگِرُتَن بی وُ وَم گُتَه وابی: «وَری وِ معبدِ خدا وِ مذبَحَه اندازَه بِگِه وِ عِدِۀ کَسَلی نَه که وُچِه پرستش ایکِنِن بِشمار، 2بِی محوطۀ وَدَرَ معبد کاری نَیاشتَه بو وُ وِه نَه اندازَه مَگِه، سییِکِه وِه نَه دانِه وَ مِلَتَل. وِ اونگَل شهرِ مقدَّسَه سی چلِدِ ماه لَقَتکو ایکِنِن. 3وِ مو وَ دِتا شاهدِ خُوم اقتدار اییُم، وِ اونگَل پَلاس وَ وَرِشون، هزارودِویسوشَص رو نبوت ایکِنِن.» 4اینگَل دِتا دارِ زیتون وِ دِتا چراغدونِن که ایوِیسِن مِنِه حضورِ خداوندِ زمین. 5وِ اَر کسی بِخوا وَشون ضرر بِزَنِه، تَش وَ دِهونِشون بِرازَه ایکَشِه وِ دشمَنَلِشونَه ایسوزَنِه وِ خِل ایکِنِه، پَ اَر کسی بِخوا وَشون ضرر بِزَنِه، بایِس وَ ای طریق کشتَه وابو. 6اونگَل ای قدرتَه دارِن آسَمونَه بویَندِن تا مِنِه روزَلی که نبوت ایکِنِن بارون نَزَنِه، وُ وَ ری اُویَل قدرت دارِن که اونگَلَه خین کِنِن وِ زمینَه هر چَن دَف که بِخوان وَ هر بلایی گرفتار کِنِن.
7وِ اوسِه که اونگَل شهادتِ خِشونَه تَموم کِردِن، او جونِوَرِ وَحشی که وَ چاهِ هاویَه ایا وَدَر، باشون ایجَنگِه وُ وَشون زور ایابو، اونگَلَه ایکِشِه. 8وِ جِنازَشون مِنِه خیابونِ او شهرِ گَپو که وَ کِنایَه وَش ایگُن سُدوم وِ مصر، وَ ری زمین ایوِیسِه؛ جِیی که خداوندِشون وَ صلیب وابی. 9تا سه روزِنیم، مَردم وَ هر قوم وِ هر طِیفَه وِ هر زُوون وِ هر ملت ایوِیسِن وَ تَماشِی جِنازِهیَلِشون وِ نیلِن بِکِنِنِشون زِرِ گِل. 10اونگَل که ری زمین منزل دارِن وَ مُردَنِ اینگَل شایی ایکِنِن وِ جَشن ایگِرِن وِ سی یَک پیشکِشَل بِسی ایکِنِن؛ سییِکِه ای دِتا پیغمبر سی اونگَلی که وَ ری زمین منزل دارِن، عذاب وابییِنِه.
11امّا بعدَ سه روزِنیم، نَفَسِ حیات وَ طرفِ خدا اومَه مِنِشون وِ اونگَل وِیسان وَ ری پایَلِشون، اونگَلی که وِیسایَه بییِن وَ تَماشا، زَلَهتَرَک وابییِن. 12اوسِه اونگَل صییِی بِلَندی وَ آسَمون اِشنُفتِن که وَشون ایگُت: «بییِیت بالا وَ وِچو!» وِ اونگَل وَرِ تییِۀ دشمَنَلِشون مِنِه اُوری رَتِن بالا وَ آسَمون. 13وِ دِرُس مِنِه هَمو ساعت، زمینجِمِشتِ گَپویی اومَه وِ یِهدَهمِ شهر رُمبِس وِ هَف هزار نفر مِنِه او زمینجِمِشت کُشتَه وابییِن وِ اونگَلی که زِندَه مُندِن زَلَهتَرَک وابییِن وِ خِدِی آسَمونَه جلال دان.
14وایِ دِوم تَموم وابی؛ ایسو، وایِ سِوم مِنِه رَیَه وُ وَ زیئی بایِس بیا.
شیپورِ هفتُم
15اوسِه فرشتۀ هَفتُم شیپورِشَه وَ صیا دَرآوُرد؛ وِ صیایَلِ بِلَندی مِنِه آسَمون بی که ایگُتِن:
«پادِشاییِ جهان، این خداوندِ ایما وِ مسیحِ وِّ وابییِه.
وُ وِّ تا ابدالآباد سلطنت ایکِنِه.»
16وِ او بیسِ چار ریشسَفی که مِنِه پیشگاهِ خدا ری تختَلِشون نِشَسِنِه، ریشونَه نَهان وَ زمین وِ خدا نَه پرستش کِردِن، 17وِ ایگُتِن:
«تِنَه شُکر ایکِنیم ای خداوند خِدِی قادرِ مطلق،
وِه که بی وِ هِسی.
سییِکِه قدرتِ عظیمِ خِتَه وَ دَس گِرُتییِی
وِ سَلطَنَتَه شروع کِردییِی.
18مِلَتَل وَ خِشم اومَن،
امّا زَمونِ خِشمِ تِ رَسییِه،
وِ زَمونِش رَسییِه که مُردِهیَل داوری وابون،
وِ خادِمَلت، یعنی پِیغَمبَرَل،
وِ ایموندارَلِ وَ مسیح وِ اونگَلی که حُرمتِ نومِ تِنَه نِگَه ایکِنِن،
وَ خُرد و گَپو، پاداش بِگِرِن.
وِ اونگَلی که زمینَه وَ نابودی کَشییِنِه نابود وابون.»
19اوسِه معبدِ خدا مِنِه آسَمون واز وابی؛ وِ صندوقِ عهدِ خدا مِنِه معبدِش دیار وابی؛ وِ تَشِبرقَل وِ آسَمونغِرُمبِهیَل وِ قُرُمتراقَل بی که ایوَریسا، وِ زمینجِمِشت وِ تِگِرسِ سختی اومَه.
Currently Selected:
مکاشِفۀ یوحنا 11: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
