نامَه وَ کِلیسِی فیلیپی 4
4
1پَ، ای کَکایَلُم، که دوسِتون دارُم وِ شوقِ دییَنِتونَه دارُم، ایشا که شایی وِ تاجِ سرِ مِنیت، ای عزیزَل، ایطو مِنِه خداوند پاوَرجا بِیت.
نَصیحَت، تشویق، وِ دعا
2وَ اِفُودیَه خواهِشت ایکِنُم وُ وَ سینتیخی تمنا دارُم که مِنِه خداوند هُمرأی بون. 3ای هُمکارِ وفادار، وَ تِ هَم تقاضا ایکِنُم، وَ ای دِتا مِهربانو کِمَک کِنی، سییِکِه بِی کِلِمِنت وِ باقیِ هُمکارَل که نومِشون مِنِه دفترِ حیات نوشتَه وابییِه، شونَه وَ شونۀ مو سی کارِ انجیل زحمت کَشییِنِه.
4همیشَه مِنِه خداوند شای بِیت؛ اُمبِلا ایگُم: شای بِیت. 5بِلیت همَه بِیونِن که ایشا چِقَه بامِلاضَه یِیت. اومَیَنِ خداوند نِزِنگِه. 6مِنِه هولوهراسِ هیچی نَبِیت، بَلکَم مِنِه هرچیئی بِی دعا وِ تمنا، وِ بِی شکر کِردن، درخواسَلِ خِتونَه وَ خدا بِگِیت. 7وِ صلحوُسلامتیِ خدا، که بالاتَر وَ هر فَهمی یَه، دِلِتون وِ فکرِتونَه مِنِه مسیح عیسی حفاظت ایکِنِه.
8آخِرِ سَر، ای کَکایَل، وَ هر چیئی که راسِه، وَ هر چیئی که حُرمت دارِه، وَ هر چیئی که دِرِسِه، وَ هر چیئی که پاکِه، وَ هر چیئی که بابِدلِه، وُ وَ هر چیئی که قابلِ ستایِشِه، اَر خوبیای هِسی وِ لایقِ ستایِشِه، وَ ای چییَل، خوب فکر کِنیت. 9اوچیئی که وَ مِ یای گِرُتیتِه وِ قبول کِردیتِه وُ وَ مِ دیئیتِه وِ اِشنُفتیتِه، هَموِنَه وَجا بیاریت، که خِدِی صلحوُسلامتی بِی ایشانِه.
تدارکِ خدا
10مِنِه خداوند مَهلی شایَمونُم وَ یِکِه هَنی مِنِه هولوهراسِ مِنیت. ایشا وَراسی مِنِه هولِ مِ بیئیت، امّا مِجالِشَه نَیاشتیت. 11یِنَه وَ سرِ اِتیاج نیگُم، سییِکِه یای گِرُتِمِه که مِنِه هر وضعی قانع بوم. 12مِ هم دونُم متاج بییَن چطورِه وِ هم دارا بییَن. مِنِه هر وضعِ حالی، سِرِّ زِندِیی کِردَن مِنِه سیری وِ گُسنهای، داشتَن وِ نَیاشتَنَه یای گِرُتِمِه. 13مِ قدرتِ هرچیئی نَه دارُم مِنِه وِّ که وَم قویَت اییِه. 14وا ای حال، لطف کِردیت که مِنِه زَحمَتَلِ مِ شریک وابیئیت.
15وِ ایشا فیلیپییَل، خِتون دونیت که مِنِه شروعِ کارِ انجیل، وَختی که وَ مقدونیَه زَم وَدَر، هیچ کلیسایی غیرَ ایشا مِنِه کارِ دایَن وِ گِرُتَن بِی مِ شریک نَوابی، غیرَ ایشا وِ بَس. 16حتی موقِی که مِنِه تسالونیکی بییُم، ایشا سی بَرطرف کِردَنِ اِتیاجَلُم کِمک بِسی کِردیت وِ اُمبلا هَم بِسی کِردیت. 17نَه یِکِه وَ دینِ پیشکِش بوم، بلکَم وَ دینِ ثَمری یَم که اعتبارِتون طِی خدا زیاد وابو. 18کِمَکَلِتون کامل رَسی وَ دَسُم، وِ بیشتَرَ چیئی بی که اِتیاج داشتُم. حسابی تأمینُم، پیشکِشَلِتونَه که بِی اِپافرودیتوس بِسی کِردیت اِسَمِه، که پیشکشی خوشبو وِ قُربونیِ قابلِ قبول وِ موردِ پَسندِ خدا یَه. 19وِ خِدِی مو، تَمومِ اِتیاجَلِ ایشا نَه وَ حَسبِ دولتِ پُرجلالِ خُوش مِنِه مسیح عیسی بَرطرف ایکِنِه. 20وَ خدا، بُو آسمونیِ ایما تا ابدالآباد جلال بو. آمین.
سلامَلِ آخِر
21وَ تَمومِ ایموندارَل مِنِه مسیح عیسی سلام بِرَسونیت. کَکایَلی که بِی مِنِن، وَتون سلام ایرَسونِن. 22تَمومِ ایموندارَل وَتون سلام ایرَسونِن، مخصوصاً اونگَل که اهلِ حونۀ امپراطورِن.
23فیضِ خداوند عیسی مسیح بِی روحِ ایشا بو. آمین.
Currently Selected:
نامَه وَ کِلیسِی فیلیپی 4: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
