انجیلِ یوحنا 21
21
ظاهر وابییَنِ عیسی وَ هَف نفر وَ شاگردَل
1بعدَ ای اتّفاقَل، عیسی یِه دَفدَه خِشَه هیبِی دریاچۀ تیبِریه وَ شاگردَل نِشون دا. وِّ ایطو خِشَه نِشون دا: 2یِه رو شمعونِ پطرس، تومایِ معروف وَ جِمِلو، نَتَنائیل وَ مَردِمونِ قانایِ جلیل، کُرَلِ زِبدی وِ دِتا شاگردِ دَ بِی یَک بییِن. 3شمعونِ پطرس وَشون گُت: «مِ ایرَم سی ماهی گِرُتَن.» اونگَل گُتِن: «ایما هَم بات اییِیم.» اوسِه رَتِن وَدَر، سُوارِ قایق وابییِن. امّا مِنِه او شُو چیئی نَگِرُتِن. 4گَکون، عیسی وِیسا هیبِی خشکی؛ امّا شاگردل نَفَمِسِن که عیسی یَه. 5عیسی وَشون گُت: «ای بَچهیَل، چیئی سی خَردَن نَیاریت؟» جواب دان: «نه!» 6گُت: «تورَ وِربیئیت وَ طرفِ راسِ قایق، که ایجوریت.» اونگَل ای کارَ کِردِن وُ وَ زیادی ماهی نیتَرِسِن تورَ بِکَشِن مِنِه قایق. 7شاگردی که عیسی دوسِش داشت، وَ پطرس گُت: «خداوندِه!» شمعونِ پطرس وختی اِشنُفت که خداوندِه، دَرجا جومَشَه پیچَنا دورِ خُوش - سییِکِه وِه نَه وَ وَرِش درآوُردَه بی - وِ خِشَه وِردا مِنِه دریاچَه. 8امّا باقیِ شاگردَل بِی قایِق اومَن، دَرحالی که تورِ پرِ ماهی نَه بِی خِشون ایکَشییِن، سییِکِه فاصلۀ اونگَل بِی خشکی حدودِ صد متر بی.
9وختی رَسییِن وَ خشکی، دییِن تَشی بِی زغال بِر وابییِه وِ ماهی نَهایَه وابییِه سَرِش، وِ نون هَم هِسی. 10عیسی وَشون گُت: «وَ او ماهییَل که هَمیسِه گِرُتیت، بیاریت.» 11شمعونِ پطرس رَت مِنِه قایق وِ تورَ کَشی وَ خشکی. تور پُر بی وَ ماهییَلِ گَپو، وَ تعدادِ صدوپنجاهوسه ماهی. وِ بِی یِکِه تعدادِ ماهییَل تا ای حد زیاد بی، تور پَرَه نَوابی. 12عیسی وَشون گُت: «بییِیت ناشتا بِخَریت.» هیچ کویَکی وَ شاگردَل زَلَه نَکِه وَش بِپُرسِه، «تِ کییِی؟» سییِکِه دونِسِن که خداوندِه. 13عیسی اومَه جِلو، نونَه وَگِرُت وِ دا وَ اونگَل، وِ هَمیطو ماهی نَه. 14یِه سِوِمین دَفَه بی که عیسی بعدَ زندَه وابییَن وَ مُردِهیَل خِشَه وَ شاگِردَلِش نشون ایدا.
صُبَت کِردَنِ عیسی بِی پِطرُس
15بعدَ ناشتا، عیسی وَ شمعونِ پطرس پُرسی: «ای شمعون، کِرِ یونا، مَه بیشترَ اینگَل مِنَه محبت ایکِنی؟» وِّ جواب دا: «بَلِه خداوند؛ تِ دونی که دوسِت دارُم.» عیسی وَش گُت: «وَ بَرَهیَلِ مِ غذا بییِه.» 16دَفۀ دِوُم عیسی وَش پُرسی: «ای شمعون، کِرِ یونا، مَه مِنَه محبت ایکِنی؟» جواب دا: «بَلِه خداوند؛ دونی که دوسِت دارُم.» عیسی گُت: «میشَلِ مِنَه چِپونی کُ.» 17دَفۀ سِوُم عیسی وَش گُت: «ای شمعون، کِرِ یونا، مَه مِنَه دوس داری؟» پطرس وَ یِکِه عیسی سه دَفَه وَش پُرسی، «مَه مِنَه دوس داری؟» آزُردَه وابی وِ جواب دا: «ای خداوند، تِ وَ هَمَه چی آگایِی؛ تِ دونی که دوسِت دارُم.» عیسی گُت: «وَ میشَلِ مِ بِرَس. 18وَراسی، وَ تِ ایگُم، زمونی که جَوونتر بیئی قَدِ خِتَه ایبَسی وِ ایرَتی هر جا که ایخواسی؛ امّا وختی پیر وابِی دَسَلِتَه واز ایکِنی وِ یِکیدَه قَدِ تِنَه ایبَندِه، ایبَرَنِت وَ جِیئی که نیخِی.» 19عیسی بِی ای گَپ وَ چطو مُردَنِش اِشارَه ایکِه، که پطرس بِی وِه خِدا نَه جلال ایدا. اوسِه عیسی وَش گُت: «وَ دینِ مِ بیو.»
20اوسِه پطرس وَرگَشت وِ دی او شاگردی که عیسی دوسِش داشت ایا وَ دینِشون. وِّ هَموِه بی که مِنِه وختِ شوم تِکی زَیَه بی وَ سینۀ عیسی وِ وَش پُرسییَه بی، «آقا، کیَه که تِنَه تسلیم دشمن ایکِنِه؟» 21وختی پطرس وِّ نَه دی، وَ عیسی پُرسی: «آقا، پَ وِّ چه ایابو؟» 22عیسی وَش گُت: «اَر بِخوام تا وَرگَشتَنُم باقی وِیسِه، وَ تِ چه؟ تِ وَ دینِ مِ بیو!» 23پَ کَکایَل گَمون کِردِن که او شاگرد نیمیرِه، در حالی که عیسی وَ پطرس نَگُت که وِّ نیمیرِه، بلکم گُت: «اَر بِخوام تا وَرگشتَنُم باقی وِیسِه، وَ تِ چه؟»
24یِه هَمو شاگردِه که وَ ای چییَل شهادَت اییِه وِ اینگَلَه نِوِشتِه. ایما دونیم که شهادتِ وِّ راسِه.
آخِرِ سَر
25عیسی یِکِلی کارَلِ دَ هم کِه، که اَر یَک وَ یَک نِوِشتَه ایابی، گَمون نیکِنُم حتی تمومیِ دنیا هم جِی او نوشتهیَلَه داشت.
Currently Selected:
انجیلِ یوحنا 21: SLB
Highlight
Share
Copy
Want to have your highlights saved across all your devices? Sign up or sign in
@ 2024 Korpu Company
