کارَلِ رسولَل 1

وعدۀ روح‌القدس

1ای تِئوفیلوس، مِ کلامِ اَوَلِ خِمَه، درموردِ تَمومِ کارَلی نِوِشتُم که عیسی وَ اَوَل اَنجوم دا وِ شروع کِه وَ تعلیم دایَنِشون 2تا او روزی که وَ واسطۀ روح‌القدس دستورَلی وَ رسولَلِ برگزیدۀ خُوش دا وِ اوسِه وَ آسمون بالا بُردَه وابی. 3عیسی بعدَ عذاب کَشییَنِش، خِشَه وَ رسولَل ظاهر کِه وِ بِی دلیلَلِ زیادی وَشون ثابت کِه، که زندَه وابی‌یِه. اوسِه تا چِل رو وَشون ظاهر ایابی وِ درموردِ پادشاییِ خدا باشون گَپ ایزَه. 4عیسی وَختی باشون بی، وَشون دستور دا: «وَ اورشلیم نَرَن وَدَر، بلکم بَندیرِ او وعدۀ بُو بون، وُ وَشون گُت: "ایشا وَ مِ اِشنُفتیت، 5سی‌یِکِه یحیی بِی اُو تعمید ایدا، امّا چَن رو دَ ایشا بِی روح‌القدس تعمید ایگِریت."»

6اوسِه وَختی که دورِ یَک جَم وابی‌یَه بییِن، وَش پُرسییِن: «خداوندا، مَه مِنِه ای زمونِه، که پادشایی نَه اُمبِلا وَ اسرائیل برقرار ایکِنی؟»

7عیسی وَشون جواب دا: «لازم نی که ایشا وَخت وُ زمونَلی نَه که بُو آسمونی مِنِه اختیارِ خُوش نِگَه داشتِه بِیونیت؛ 8امّا وختی روح‌القدس وَ ری ایشا قرار بِگِرِه، ایشا قدرت ایگِریت وِ مِنِه اورشلیم وِ تمومیِ یهودیَه وِ سامِرَه وِ تا دیرتَرین جایَلِ دنیا، وَ مِ شهادت ایئیت.»

9بعدَ یِکِه عیسی ای گَپَلَه گُت، هَموطو که داشت سِیلَشون ایکِه، وَ بالا بُردَه وابی وِ اُوری وِّ نَه دَمِ تییَشون گِرُت مِنِه خُوش. 10موقِی که داشت ایرَت وَ بالا وِ هَنی رَسولَل هَموطو تییَه دُتَه بییِن وَ آسمون، یِه دَفَه دِ مِردِ سَفی پوش وِیسان طِیشون 11وِ گُتِن: «ای مِردَلِ جلیلی، سیچِه ایطو وِیسِیتِه وِ تییَه دُتیتِه وَ آسمون؟ هَمی عیسایی که وَ مِلاتون بُردَه وابی وَ آسمون، هَمیطو که دیئیت رَت وَ آسمون، اُمبِلا اییَرگَردِه.»

انتخاب مَتیاس وَ جِی یهودا

12اوسِه شاگردَل وَ کُویی که معروف بی وَ زیتون وَرگَشتِن وَ طرفِ اورشلیم. رَه او کُو تا اورشلیم بیشتَرَ یِه روزِ شَبّات نَبی یعنی وَ او قَدی که یَهودی‌یَل اجازَه داشتِن مِنِه روزِ شَبّات وَ حونَه دیر وابون. 13وختی رَسییِن، رَتِن وَ بالاحونه‌ای که مَنزلگاشون بی. اونگَل پطرس وِ یوحنا، یعقوب وِ آندریاس، فیلیپُس وِ توما، بَرتولما وِ مَتّی، یعقوب کِرِ حَلفای وِ شمعون غیور وِ یهودا کِرِ یعقوب بییِن. 14تَمومِ اونگَل بِی زَنَل وِ هَمیطو مریم دِی عیسی وِ کَکایَلِش، یِه‌دل تمومِ وختِشونَه وَقفِ دعا ایکِردِن.

15یکی وَ او روزَل، پطرس وِیسا مابینِ کَکایَل که هَمَشون ری یَک حدودِ صد‌و‌بیست نفر بییِن، 16اوسِه گُت: «ای کَکایَل، او نوشتِۀ کتابَلِ مقدس باید وَ حقیقت ایرَسی، که مَهلی نَهاتَر روح‌القدس وَ زُوونِ داوودِ پادشاه درموردِ یهودا، پیشگویی کِردَه بی، هَموِه که رَه‌بَلَدِ اونگَلی بی که عیسی نَه گرفتار کِردِن. 17سی‌یِکِه وِّ یکی وَ ایما حساب ایابی وِ بَهری مِنِه ای خذمت داشت.»

18یهودا بِی پاداشِ شرارتِ خُوش تِکَه زمینی اِسَه وِ بِی پوز اُفتا مِنِش وِ مِنِه دِلِی قَد دِ کَل وابی وِ مِنِه‌کِمَش رِت وَدَر. 19تَمومِ مردمِ اورشلیم وَ ای جریان باخَوَر وابی‌یِن وُ وَ زُوونِ خِشون نومِ وُچِنَه نَهان «حَقِل دَما»، یعنی زمینِ خین.

20سی‌یِکِه مِنِه کتابِ زبور نوشتَه وابی‌یِه:

«"حونَش چول وابو

وِ کسی وُچِه منزل نَکِنِه،"»

وِ هَم نِوشتَه وابی‌یِه:

«"بِل جاشَه یِکیدَه بِگِرِه."»

21سی هَمیو بایِس یکی وَ او مِردَلی که مِنِه تمومِ مِدَتی که عیسی خداوند مابِینِمون اومَدِ رَفت ایکِه، بامون بییِه 22یعنی وَ روزی که یحیی، عیسی نَه تعمید دا تا روزی که عیسی وَ طِیمون بالا بُردَه وابی، بِی ایما وَ شاهدَلِ زندَه وابی‌یَنِ عیسی وابو.»

23پَ دِ نفرَ پیشنهاد کِردِن: یوسفَ که وَش ایگُتِن بَرسابا وُ وِّ نَه وَ نومِ یُوستوس هَم ایشناختِن، وِ مَتیاسَ. 24اوسِه ایطو دعا کِردِن: «تِ ای خداوند، تِ وَ دلِ هَمَه باخَوَری. سیمون آشکار کُ، کویِکی وَ ای دِتا نَه انتخاب کِردی‌یِی 25تا ای خذمتِ رسالتَه وَ عُهدَه بِگِرِه، خذمتی که یهودا وَش ری وَرگَردَنا وِ رَت وَ جِیئی که این وُچِه بی.» 26اوسِه فِش بِسِن وُ فِش اُفتا وَ نومِ مَتیاس. وَ ای ترتیب وُّ وَ دَسِۀ یازَه رسول وابی.

Currently Selected:

کارَلِ رسولَل 1: SLB

Highlight

Copy