انجیلِ یوحنا 20

مقبرۀ خالی

1مِنِه اَوَلین روز هفتَه، گَکون، موقِی که هوا هَنی تاریک بی، مریم مجدلیَّه اومَه وَ مقبرَه وِ دی که بَرد وَ جِلوش وَگِرُتَه وابی‌یِه. 2اوسِه مِنِه حالی که ایدُویِس رَت طِی شمعونِ پطرس وِ او شاگرد دَ که عیسی دوسِش داشت، وُ وَشون گُت: «آقامونَه وَ مقبَرَه بُردِنِه وِ نُونیم نَهانِشِه کوچو.» 3اوسِه پطرس بِی او شاگردِ دَ اومَن وَدَر، رایی وابی‌یِن وَ طرفِ مقبَرَه. 4وِ هر دِتاشون بِی یَک ایدُویِسِن؛ امّا او شاگردِ دَ تندتر رَت، اُفتا نِهِی پطرس وِ اَوَل رَسی وَ مَقبَرَه. 5اوسِه خَل وابی، سِیل کِه وِ دی که پارچه‌یَلِ کفن وُچِنِه، امّا نَرَت مِنِه مقبَرَه. 6شمعونِ پطرس هَم وَ دینِ وِّ اومَه وِ رَت مِنِه مقبَرَه، دی که پارچه‌یَلِ کفن وُچِنِه، 7امّا دسمالی که دورِ سرِ عیسی بَسَه بییِن طِی پارچه‌یَلِ کفن نَبی، بلکم جیاگونَه تا وابی‌یِه وِ جِیئی دَ نَهایَه وابی‌یِه. 8اوسِه او شاگردِ دَ هَم که اَوَل رَسییَه بی وَ مقبَرَه، اومَه داخل وِ دی وِ باوَر کِه. 9سی‌یِکِه هَنی نوشتۀ مقدَسَه نَفَمِسَه بییِن که وِّ بایِس وَ مُردِه‌یَل زِندَه وابو. 10اوسِه او دِتا شاگرد وَرگَشتِن وَ حونَشون.

ظاهر وابی‌یَنِ عیسی وَ مریم مَجدَلیَه

11امّا مریم، وَدَر، نِزِنگِ مقبَرَه وِیسایَه بی وِ ایگِریوِس. وِّ بِی گِریوَه خَل وابی تا سیلَ مِنِه مقبَرَه کِنِه. 12اوسِه دِتا فرشتَه نَه دی که جومِی سَفی وَرِشون بی وِ نِشَسَه بییِن وُچِه که جنازۀ عیسی نَهایَه وابی‌یَه بی، یکی وَ جِی سرِش وِ یکیدَه وَ جِی پایَلِش. 13فرشتِه‌یَل وَش گُتِن: «ای زن، سیچِه ایگِریوی؟» وِّ جواب دا: «آقامَه بُردِنِه وِ نُونُم نَهانِشِه کوچو.» 14وختی یِنَه گُت، وَرگَشت وِ عیسی نَه دی که وُچِه وِیسایِه، امّا وِّ نَه نَشناخت. 15عیسی وَش گُت: «ای زن، سیچِه ایگِریوی؟ کی نَه ایجوری؟» مریم وَ گَمونِ یِکِه باغَبونِه، گُت: «آقا، اَر تِ وِّ نَه وَگِرُتی‌یِی، وَم بِگُ نِهِیشِه کوچو تا بِرَم وُ وِّ نَه وَگِرُم.» 16عیسی صیا زَه: «مریم!» مریم وَرگَشت وَ طَرَفِش وُ وَ زُوونِ آرامی گُت: «رَبّونی!» استاد! 17عیسی وَش گُت: «وَ مِ دَس نَزَه، سی‌یِکِه هَنی نَرَتِمِه بالا طِی بُو. بلکم بِرَه طِی کَکایَلُم وُ وَشون بِگِ که ایرَم بالا طِی بُو خُوم وِ بُو ایشا وِ خِدِی خُوم وِ خِدِی ایشا.» 18مریم مجدلیَّه رَت وُ وَ شاگردَل خَوَر دا که «خداوندَ دییِمِه!» وِ هر چیئی که وَش گُتَه بی، وَشون گُت.

ظاهر وابی‌یَنِ عیسی وَ شاگردَل

19تَنگِ پَسینِ هَمو روز، که اَوَلین روز هفتَه بی، اوسِه که شاگردَل دورِ یَک بییِن وِ دَرَل وَ زَلِی یَهودی‌یَل قُلف بی، عیسی اومَه وِ مِلاشون وِیسا وِ گُت: «سلام وَ ایشا!» 20وختی یِنَه گُت، دَسَل وِ پَلی خِشَه وَشون نِشون دا. شاگردل بِی دییَنِ خداوند شایَمون وابی‌یِن. 21عیسی اُمبِلا وَشون گُت: «سلام وَ ایشا! هَموطو که بُو مِنَه بِسی کِه، مِ هَم ایشا نَه بِسی ایکِنُم.» 22وختی یِنَه گُت، وَشون هُف کِه وِ فرمایش کِه: «روح‌القدسَه بِگِریت. 23اَر گِنایَلِ کسی نَه بُویَخشیت، وَشون بَخشییَه ایابو؛ وِ اَر گِنایَلِ کسی نَه نَبَخشییَه بِلیت، نَبَخشییَه ایوِیسِه.»

عیسی و توما

24موقِی که عیسی اومَه، توما، یکی وَ او دوازَه نفر، که وَش جِمِلو هَم ایگُتِن، باشون نَبی. 25پَ باقی شاگردل وَش گُتِن: «خداوندَ دیئیمِه!» امّا وِّ وَشون گُت: «تا خُوم جِی میخَلَه مِنِه دَسَلِش نبینُم وِ پِنجۀ خِمَه نَنُم وَ جِی میخَل وِ دَسِ خِمَه نَکِنُم مِنِه سِمِی پَلیش، باوَر نیکِنُم.» 26بعدَ هشت رو، شاگردلِ عیسی اُمبِلا مِنِه حونَه بییِن وِ توما هَم باشون بی. در حالی که دَرَل قُلف بی، عیسی اومَه وِ مِلاشون وِیسا وِ گُت: «سلام وَ ایشا!» 27اوسِه وَ توما گُت: «پِنجۀ خِتَه بِنِه وِیچو وِ سیلَ دَسَلُم کُ، وِ دَسِ خِتَه بیار جِلو وِ بِل مِنِه سِمِی پَلیم. بی‌ایمون نَبو، بلکم باوَر داشتَه بو.» 28توما وَش گُت: «خداوندِ مو وِ خِدِی مو!» 29عیسی گُت: «مَه سی‌یِکِه مِنَه دیئی باوَر کِردی؟ خَش وَ حالِ اونگَلی که نَدییَه، ایمون ایارِن.»

هدفِ ای کتاب

30عیسی یِکِلی نِشونه‌یَل وِ معجزه‌یَلِ دَ مِنِه حضور شاگردل اَنجوم دا، که مِنِه ای کتاب نوشتَه نَوابی‌یِه. 31امّا اینگَل نوشتَه وابی تا ایمون بیاریت که عیسی هَمو مسیحِ موعود، کِرِ خِدایَه، وِ تا بِی ای ایمون، مِنِه نومِ وُّ حیات داشتَه بِیت.

Currently Selected:

انجیلِ یوحنا 20: SLB

Highlight

Copy