نامَه وَ عبرانییَل 9
9
عبادت مِنِه جِی مقدسِ زمینی
1ایسو حتی عهدِ اَوَل، قانونَلی سی عبادت داشت وُ وَ ری زمین هَم یِه جِی مقدس داشت. 2سییِکِه بِهونی بَرپا وابییَه بی که مِنِه بخشِ اَوَل، چراغدون، میز، وِ نونِ مقدس بی؛ وَ وِیچِه ایگُتِن: " قُدس". 3پَسِ پردۀ دِوُم، بخشی بی که نومِش "قُدسالاقداس" بی؛ 4مِنِه ای بخش، مذبَحِ طلایی سی بخور وِ صندوقِ عهد قرار داشت که تماماً بِی طلا پوشییَه وابییَه بی، مِنِه ای صندوق، کوزۀ طلاییای بی که "مَنّا" مِنِش نِگَه ایکِردِن، وِ گلاکِ هارون که گُل دایَه بی، وِ تختَهبَردَلِ عهد قرار داشت. 5وَ بالِی سَرِ صندوق که وَش ایگُتِن تختِ رحمت، فرشتهیَلِ کروبیِ "جلال" سایَه بِسَه بییِن. ایسِه نیتَریم دَرموردِ ریز وَ ریزِ ای چییَل گَپ بِزَنیم.
6ایسو وختی کِه ای چییَل وَ ای صورت قرار گِرُت، کاهنَل هِی ایرَن مِنِه بخشِ اَوَل وِ رسوم وِ آئینِ خذمتشونَه وَجا ایارِن، 7امّا تِنا کاهن اعظم ایتَرِه بِرَه مِنِه بخشِ دِوُم، وِه هَم تِنا سالی یِه دَف، وِ بِی خُوش خینِ قُربونی ایبَرِه تا سی خُوش وِ سی گِنایَلی که قوم وَ ری نایونی کِردِنِه، تقدیم کِنِه. 8روحالقدس ایطوری نِشون اییِه که تا زمونی که بخشِ اَوَل هِسیش، او رَیی که ایرَه وَ قدسالاقداس هَنی واز وانَبییِه. 9که یِه نِشونهای یَه سی زَمونِ الان. طبقِ وُه، پیشکِشَل وِ قُربونییَلی که تقدیم ایابو، نیتَرِه وجدان کسی نَه که عبادت ایکِنِه، کامل پاک کِنِه، 10بلکَم اینگَل تِنا خَردَنی وِ نوشییَنی وِ رَیَلِ جورواجورِ طهارت گِرُتَن وِ قانونَلِ مربوط وَ بَیَنِن که تِنا تا شروعِ ترتیبِ تازهای که خدا اییِه اعتبار دارِن.
نجات وَ وسیلۀ خینِ مسیح
11امّا وَختی مسیح مِنِه مقامِ کاهنِ اعظمِ چییَلِ خوبی اومَه که ایسِه نَصیبِمون وابییِه، وِّ رَت مِنِه بِهونی گَپوتَر وِ کاملتَر که بِی دس ساختَه نَوابییِه وُ وَ ای خلقت نی. 12وِّ یِه دَف سی همیشَه رَت مِنِه قدسالاقداس، نَه بِی خینِ بُزَل وِ گویَرَل، بلکَم بِی خینِ خُوش، وِ ایطو نجاتِ ابدی نَه آمایَه کِه. 13سییِکِه اَر خینِ بُزَل وِ گامیشَل وِ رِتَنِ خِل گویَرِمایَه وَ ری اونگَلی که ناپاکِن، تقدیسِشون ایکِنِه تا مِنِه جسم پاک بون، 14چِقَه بیشتر خینِ مسیح، که وَ واسطۀ روحِ ابدی، خِشَه بیعیب وَ خدا تقدیم کِه، وجدانِ ایما نَه وَ کارَلِ بیخودی پاک ایکِنِه تا خِدِی زندَه نَه خذمت کِنیم!
15پَ مسیح واسطۀ عهدی تازه یَه، تا کسلی که خُوندَه وابییِنِه، میراثِ ابدی نَه که خدا وعده دایِه وَ دَس بیارِن، سییِکِه مرگی اتّفاق اُفتایِه که اونگَلَه وَ گِنایَلی که مِنِه عهدِ اَوَل اَنجوم وابییِه نجات اییِه. 16سییِکِه وَختی ایابو یِه وصیتنامَه نَه اجرا کِه، که ثابت وابو او کسی که وصیتنامه نَه نوشتِه مُردِه. 17سییِکِه وصیتنامه نَه بعدَ مرگ ایابو اجرا کِه، وَ وُچِه که تا زمونی که کسی که وصیت کِردِه زندَه یَه، وصیتنامه نَه نیابو اجرا کِه. 18سی هَمیو، حتی عهدِ اَوَل هَم بیخین، برقرار نیابی. 19سییِکِه وَختی که موسی تَمومِ حُکمَلِ شریعتَه وَ تَمومِ قوم اعلام کِه، وِّ خینِ گویَر وِ بُزَلَه گِرُت، بِی اُو وِ پشمِ سُرخ وِ کِلغهیَلِ زوفا، پِشِنگَنا وَ ری خودِ طومار وِ تَمومِ قوم 20وِ گُت: «یِنِه خینِ او عهدی که خدا سی ایشا حکم کِردِه.» 21هَمیطو او خینَه پِشِنگَنا وَ ری بِهون وُ وَ ری تَمومِ ظرفَلی که مِنِه رسوم وِ آئینِ پرستش وَ کار ایرَت. 22وَراسی، طبقِ شریعت، تقریباً همَه چی بِی خین پاک ایابو وِ بدونِ رِتَنِ خین، آمرزشِ گِنایَل نیسی.
23پَ ایبایِس ای چییَل که نمونهیَلِ چییَلِ آسمونی یَن، بِی ای قُربونییَل پاک وابو، امّا چییَلِ آسَمونی خِشون، بِی قُربونییَلِ بِختَرَ اینگَل پاک ایابو. 24سییِکِه مسیح نَرَتِه مِنِه قدسالاقداسی که بِی دَس ساختَه وابییِه وِ تِنا نمونهای یَه وَ او چییَلِ حقیقی، بلکَم رَتِه مِنِه خودِ آسمون تا ایسِه وَ طرفِ ایما مِنِه حضورِ خدا حاضر بو. 25وِ ایطو نَبی که وِّ خِشَه هِی قُربونی کِنِه، مِی کاهنِ اعظم که هر سال ایرَه مِنِه قُدسالاقداس، وِه هَم بِی خینی که نَه خینِ خِشِه. 26سییِکِه وَ ای صورت، مسیح ایبایِس وَ زمونِ بنایِ جهان، هِی عذاب ایکَشی. امّا نَه ایطورِه، وِّ ایسو، یِه دَف سی همیشَه مِنِه آخِر تَمومِ دورهیَل اومَه تا بِی قُربونیِ خُوش، گِنا نَه وَ بِین بویَرِه. 27وِ هَموطو که تعیین وابییِه که آیَم یِه دَف بِمیرِه وِ دِنداش داوری ایا، 28پَ مسیح هَم که یِه دَف قُربونی وابی تا گِنایَلِ یِکِلی نَه وَگِرِه، دَفۀ دِوُم ایا، نَه سی وَگِرُتَنِ گِنایَل، بلکَم سی نجاتِ اونگَلی که بِی شوق بَندیرِشِن.
Currently Selected:
نامَه وَ عبرانییَل 9: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
