نامَه وَ عبرانییَل 8
8
کاهن اعظمِ یِه عهدِ بِختَر
1ایسو اصلِ مطلبِ اوچیئی که ایما ایگِیم یِنِه که: ایما ایطو کاهنِ اعظمی داریم که مِنِه آسمون وَ دَسِ راسِ تختِ خِدِی متعال نِشَسِه، 2خِذمتکاری مِنِه جایَلِ مقدس، مِنِه او بِهونِ حقیقی که خداوند بَرپا کِردِه، نَه آیَم.
3سییِکِه هر کاهنِ اعظم تعیین ایابو سی تقدیم کِردَنِ پیشکِشَل وِ قُربونییَل، پَ ای کاهن هَم ایبایِس چیئی داشتَه بو سی تقدیم کِردَن. 4ایسو اَر وُّ وَ ری زمین بی، وَتَه کاهن نَبی، سییِکِه کاهنَلی هِسِن که بَنا وَ رسمِ شریعت پیشکشَلَه تقدیم ایکِنِن. 5اونگَل نمونَه وِ سایهای وَ چییَلِ آسمونی نَه خذمت ایکِنِن. سییِکِه، وَختی که موسی ایخواس بِهونَه بَرپا کِنِه، خدا وَش اَمر کِه وِ گُت: «حَواست بو که همَه چی نَه طبقِ نمونهای بسازی که مِنِه کُو وَت نِشون دایَه وابی.» 6امّا ایسِه خذمتی که مسیح وَ دس آوُردِه، یِکِلی وَ او خذمتِ قدیمی بالاتَرِه، سییِکِه وِّ مَنجیکِنِ عهدِ بِختَری یَه، ای عهد که وَ ری وَعدهیَلِ بِختَری بَنا وابییِه.
7سییِکِه اَر عهدِ اول بیعیب بی، اِتیاجی نَبی که وَ دینِ عهدِ دِوُم بِیم. 8امّا خدا وَشون عیبی ایجورِه وِ فرمایش ایکِنِه:
«خداوند ایگُ، ایسو روزَلی ایا
که مِ بِی خاندانِ اسرائیل وِ خاندانِ یهودا
عهدی تازَه ایبَندُم.
9نَه مِی عهدی که بِی بُویَلِشون بَسُم،
مِنِه روزی که دَسِشونَه گِرُتُم
تا وَ دیارِ مصر بیارمِشون وَدَر؛
سییِکِه، خداوند فرمایش ایکِنِه، اونگَل سَرِ عهدِشون بِی مِ نَوِیسان.
پَ، مِ وَشون ری وَرگَردَنام.
10سییِکِه خداوند فرمایش ایکِنِه:
یِنِه عهدی که بعدَ او روزَل
بِی خاندانِ اسرائیل ایبَندُم.
شریعتِ خِمَه اینُم مِنِه فکرِشون،
وِ اونگَلَه اینِویسُم ری دِلِشون.
وِ مِ خِداشون ایابوم،
وِ اونگَل قومِ مِ ایابون.
11وِ کسی وَ هُمساش یای نییِه
وِ کسی وَ کَکاش نیگُ،
"خداوندَ بِشناس!"
سییِکِه اونگَل هَمَه وَ خُرد وُ گَپو، مِنَه ایشناسِن،
12سییِکِه مِ نِسوت وَ خَطایَلِشون رحم ایکِنُم،
وِ گِنایَلِشونَه دَ وَتَه وَ یای نیارُم.»
13وَختی خدا وَ یِه "عهدِ تازَه" گَپ ایزَنِه، او عهدِ اَوَلَه وَ اعتبار ایندازِه؛ وِ اوچیئی که وَ اعتبار اُفتایِه وِ کهنَه وابییِه، آمادَیَه که وَ بین بِرَه.
Currently Selected:
نامَه وَ عبرانییَل 8: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
