نامَه وَ عبرانییَل 10
10
قُربونیِ مسیح یِه دَف سی همیشَه
1سییِکِه شریعت تِنا سایهای وَ چییَلِ خوبِ آیندَه یَه، وِ نَه شکلِ واقعیِ او چییَل، سی هَمیو، وَتَه نیتَرِه بِی قُربونییَلی که سال وَ سال هِی تقدیم ایابو، اونگَلی نَه که سی عبادت ایان نِزِنگ، کامل کِنِه. 2اَندی مَه پیشکشِ قُربونییَلِ اونگَل تَموم نیابی؟ سییِکِه اونگَلی که عبادت ایکِردِن، یِه دَف پاک ایابییِن، وِ دَ خِشونَه گِناکار نُونِسِن. 3امّا او قُربونییَلِ هر سال گِنایَلِشونَه وَ حوشِشون ایارِه، 4سییِکِه نیشِهِه خینِ گامیشَل وِ بُزَل گِنایَلَه وَ بِین بویَرِه.
5سی هَمیو، وَختی که مسیح اومَه وَ مِنِه دنیا، فرمایش کِه:
«تِ قُربونی وِ پیشکِش نَخواسی،
بَلکَم سی مِ بَیَنی آمایَه کِردی؛
6خشنودیِ تِ وَ یِه نَبی که سیت قُربونییَلِ سُتَنی وِ پیشکِشَلِ گِنا بیارِن.
7پَ گُتُم: "ای خدا، ایسِه مِ اومَمِه،
تا ارادۀ تِنَه وَجا بیارُم؛
هَموطو که مِنِه طومارِ کتاب، دَرموردُم نوشتَه وابییِه."»
8دِندِی یِکه ایگُ: «تِ قُربونی وِ پیشکش، قُربونییَلِ سُتَنی وِ قُربونییَلِ گِنا نَه نَخواسی وُ وَشون خشنود نَبیئی» که اینَگَل طبقِ شریعت تقدیم ایابون. 9اوسِه وِّ فرمایش کِه: «ایسو مِ اومَمِه تا ارادۀ تِنَه وَجا بیارُم.» وِّ اَوَلی نَه باطل ایکِنِه تا دِوِمی نَه برقرار کِنِه. 10وِ بِی هَمی ارادَه، ایما یِه دَف سی همیشَه، وَ طریقِ قُربونیِ بَیَنِ عیسی مسیح، وَقفِ وِّ وابیئیمِه.
11وِ هر کاهن، هَر رو ایوِیسِه وَ خذمت، وِ هَمو قُربونییَلی نَه که وَتَه نیتَرِن گِنایَلَه وَ بِین بُویَرِن، هِی تقدیم ایکِنِه. 12امّا مسیح دِندِی یِکِه سی همیشَه، یِه قُربونی سی گِنایَل تقدیم کِه، وَ دَسِ راسِ خدا نِشَس. 13وِ دِندِی وُ، بَندیرِ یِنِه که دشمَنَلِش کرسیِ زِرِ پاش وابون، 14سییِکِه بِی یِه قُربونی، اونگَلی نَه که وَقف ایابون، سی همیشَه کامل کِردِه.
15روحالقدس هَم وَمون گوایی اییِه. اَوَل ایگُ:
16«خداوند فرمایش ایکِنِه:
یِنِه عهدی که بعدَ او روزَل باشون ایبَندُم.
شریعتِ خِمَه اینُم مِنِه دِلِشون،
وِ اینِویسُم ری فکرِشون.»
17اوسِه یِنَه هَم ایگُ:
«گِنایَل وِ کارَلِ شَرِشونَه
دَ وَ حوشُم نیارُم.»
18وُچِه که اینگَل آمرزییَه وابییَه بون، دَ اِتیاجی وَ تقدیم کِردَنِ قُربونی سی گِنا نی.
اِطمینونِ کاملِ ایمون
19پَ ای کَکایَل، سییِکِه خاطرجَمیم که بِی خینِ عیسی ایتَریم بِرِیم مِنِه قدسالاقداس، 20وَ وسیلۀ رَیی تازَه وِ زندَه که وُّ وَ مِنِه او پردَه یعنی بَیَنِش، وَ ریمون واز کِردِه، 21وُ وَ وُچِه که کاهنی گَپو وَ ری حونۀ خدا داریم، 22بییِیت بِی دلی راس مِنِه اِطمینونِ کاملِ ایمون، وَ خدا نِزِنگ وابِیم، وِ دِلمونَه وَ هر وجدانِ گَند پاک کِنیم وِ بَیَنمونَه بِی اُو پاک بشوریم. 23بییِیت بییِکِه شَک داشتَه بِیم، وَ امیدی که وَش اعتراف کِردیمِه سِفت بِچَسبیم، سییِکِه وِه که وعدَه دایِه، وفادارِه. 24بییِیت تا وَ فکرِ یِه بِیم که چطو یَکَه وَ محبت وِ کارَلِ خوب تشویق کِنیم. 25وُ وَ جَم وابییَن بِی یَک دَس نَوَگِریم، طوری که یِهپارهای هُمکارَشِن، بلکَم یَکَه بیشتر تشویق کِنیم، مخصوصاً ایسِه که ایبینیت او روز یعنی روزِ وَرگَشتن خداوند نِزِنگتَر ایابو.
26سییِکِه اَر ایما دِندِی یِکِه حقیقتَه اِشناختیم، وَدَسی هِی گِنا کِنیم، دَ قُربونی سی گِنایَل وَجا نیوِیسِه؛ 27بَلکَم اوچیئی که ایوِیسِه وَجا، انتظارِ ترس وَباری وَ داوری وِ بِرازۀ تَشی یَه که دشمنلِ خدا نَه غوت اییِه. 28هرکه شریعتِ موسی نَه رَد ایکِه، بِی شهادتِ دو یا سه نفر، بِی بیرحمی کشتَه ایابی. 29وَ گَمونِ ایشا چِه مجازاتِ سختَری حقِ او کسی یَه، که کِرِ خدا نَه نَهایِه زِرِ پا، وِ خینِ عهدی نَه که باش وَقف وابییَه بی، بیحُرمت کِردِه وِ روحِ فیضَه بیعزَت کِردِه؟ 30سییِکِه ایما وِّ نَه که ای گَپَه زَه ایشناسیم که گُت: «تقاص این مِنِه؛ مِ سِزا اییُم» وِ هَم گُت: «خداوند قومِ خِشَه داوری ایکِنِه.» 31اُفتایَن وَ دَسِ خِدِی زندَه مهلی ترس وَبارِه.
32امّا روزَلِ نِهِی یِنَه وَ حوشتون بیاریت، که نِهِی یِکِه نورانی وابِیت؛ مبارزۀ سختی نَه که بِی عذابَل داشتیت، طاقت آوُردیت. 33یِهپارَه وَخت وَرِ تییِۀ همَه وَتون فاش ایدان وِ عذاب ایکَشیئیت وِ یِهپارَه وَخت شونَه وَ شونۀ کَسَلی ایوِیسِیت که باشون ایطو رفتار ایابی. 34سییِکِه ایشا بِی اونگَل که مِنِه زندان بییِن، هُمدردی ایکِردیت وِ موقِی که مالِمِنالِتونَه غارت ایکِردِن، بِی شایی قبول ایکِردیت، سییِکِه دونِسیت صاحابِ مالِمِنالِ بِختَری یِیت که ابدی یَه.
35پَ وَ ای اِطمینونِ خِتون دَس نَوَگِریت، که پاداشِ عظیمی باشِه. 36سییِکِه ایشا اِتیاج داریت که طاقت بیاریت، تا اوسِه که ارادۀ خدا نَه وَجا آوُردیت، اوچیئی نَه که وعدَه دایِه، وَ دَس بیاریت. 37سییِکِه بعدَ یِچِی
«وِّ که قرارِ بیا، ایا
وِ دیر نیکِنِه.
38امّا آیَمِ صالحِ مو
بِی ایمون زِندِیی ایکِنِه.
وِ اَر وَرگَردِه واپَس،
وَ جونُم نیشینِه.»
39امّا ایما نَه وَ اونگَلیم که اییَرگَردِن واپَس وِ هلاک ایابون، بلکَم وَ اونگَلیم که ایمون دارِن وِ حیات ایجورِن.
Currently Selected:
نامَه وَ عبرانییَل 10: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
