نامَه وَ عبرانییَل 7
7
رتبۀ کاهن بییَنِ مِلکیصِدِق
1سییِکِه ای مِلکیصِدِق، پادشاهِ شهرِ سالیم، که کاهنِ خِدِی متعال بی، وَختی ابراهیمَ دی که وَ شکستِ پادِشایَل اییَرگَشت، وَش برکَت دا، 2وِ ابراهیم دَهیک هَر چیئی نَه وَش پیشکِش کِه. نومِ وِّ اَوَل وَ معنیِ "پادشاه صالحی" وِ دِنداش "پادشاه سالیم"، یعنی "پادشاه صلحوُسلامتی" یَه. 3وِّ دِی نَیارِه، بُو نَیارِه، نَسَبنومَه نَیارِه، نَه روزَلِ اَولِ زِندِئیش دیارِه وِ نَه روزَلِ آخِرِ زِندِئیش، امّا مِی کِرِ خدا، وِّ تا وَ ابد کاهن باقی ایوِیسِه.
4ایسو سِی کِنیت که وِّ چه مِرد گَپویی بی، که ابراهیم، بو قومِ اسرائیل، دَهیکِ غَنیمَتَلَه وَش دا! 5وِ بَنا وَ حکمِ شریعتِ موسی، کُرَلِ لاوی که کاهن ایابون، ایبایِس وَ قومِ یهود که کَکایَلِشونِن دَهیک بِسونِن، هَرچَن اونگَل هَم وَ نسلِ ابراهیمِن. 6امّا ای مِرد که وَ نسلِ اونگَل نی، وَ ابراهیم دَهیک اِسَه وُ وِّ نَه که صاحابِ وَعدهیَل بی، برکت دا. 7وِ بیگَمون، کِچِلوتَرِه که وَ گَپوتَر برکت ایگِرِه. 8وَ یِه طرف، کَسَلی دَهیک ایسونِن که وَبینرَتَنی یَن، امّا وَ طرفِ دَ، کسی که دَرموردِش شهادت دایَه وابییِه هَنی زندَه یَه. 9حتی ایابو گُت که لاوی خُوش هَم که دَهیک اییِسَه، وَ واسطۀ ابراهیم دَهیک دا. 10سییِکِه اوسِه که ملکیصِدِق ابراهیمَ دی، لاوی هَنی وَ دنیا نَیومَیَه بی.
عیسی مِنِه قیاس بِی مِلکیصِدِق
11ایسو اَر کامل بییَن وَ وسیلۀ کاهِنَلِ رتبۀ لاوی وَ دَس ایومَه، دَ چه اِتیاجی بی که کاهِنی دَ، وَ رتبۀ مِلکیصِدِق ظهور کِنِه، وَ جِی یِکِه وَ رتبۀ هارون بو؟(سییِکِه شریعت مِنِه دورۀ کاهن بییَنِ لاوی، وَ قومِ یهود رَسی) 12سییِکِه وَختی خذمتِ کاهن بییَن تغییر کِنِه، وَ ناچار شریعت هَم تغییر ایکِنِه. 13سییِکِه کسی که ای چییَل دَرموردِش گُتَه وابییِه، این طِیفِی دَ یَه که وَ او طِیفَه هیشکَه خذمتِ مذبَحَه نَکِردِه. 14سییِکِه دیارِه که خداوندِ ایما وَ نسلِ یهودا بی وِ موسی دَرموردِ او طِیفَه چیئی دَرموردِ کاهنَل نَگُت. 15وَ یِه هَم دیارتَر یِنِه که هر وخت کاهنی دَ مِی ملکیصِدِق ظهور کِنِه، 16وُّ، نَه طبقِ حکمِ شرعی که وَ نسلِش دایَه وابییِه، بلکَم طبقِ قُویَتِ حیاتِ وَبِیننَرَتَنی، کاهن ایابو. 17سییِکِه دَرموردِ وُّ مِنِه کتابِ زبور داوود ایطو شهادت دایَه وابییِه که:
«تِ تا وَ ابد کاهِنی،
مِنِه رتبۀ مِلکیصِدِق.»
18سییِکِه وَ یِه لَت، حکمِ اَولی نَهایَه وابی اولَت، سییِکِه ضعیف وِ بیفِیدَه بی، 19(سییِکِه شریعت هیچی نَه کامل نَکِه) امّا وَ لَتی دَ، امیدِ بِختَری وَمون نشون دایَه وابی که وَ طریقِ وُه وَ خدا نِزِنگ ایابِیم.
20وِ یِه بیقسم نَبی! سییِکِه اونگَلی که وَ نَهاتَر کاهن بییِن بی هیچ قسَمی کاهن وابییِن، 21امّا ای یکی کاهن وابی بِی قسمی وَ وسیلۀ وِّ که وَش گُت:
«خداوند قسم خَردِه
وِ نظَرِش نییَرگَردِه:
"تو تا وَ ابد کاهِنی."
22وِ هَمیو، عیسی نَه ضامنِ عهدِ بِختری ایکِنِه.
23عِدِۀ کاهنَلِ نَهاتَر یِکِلی بی، سییِکِه مرگ نیلِشت خذمتِشونَه ادامَه بییِن. 24امّا عیسی تا وَ ابد کاهنِه، سییِکِه تا وَ ابد زندَه یَه. 25پَ عیسی ایتَرِه اونگَلی نَه که وَ طریقِ وِّ ایان طِی خدا، کامل نجات بییِه، سییِکِه وِّ همیشَه زِنده یَه تا سیشون شفاعت کِنِه.
26سییِکِه وَراسی یِه وَجا بی که ایما ایطو کاهنِ اعظمی داشتَه بِیم که مقدس، بیگِنا، بیعیب، جیا وَ گِناکارَل، وِ جلال گِرُتَه بالاتَر وَ آسمونَلِه. 27وِّ مِی کاهنلِ اعظمِ دَ، اِتیاجی نَیارِه هر رو قُربونی کِنِه، اَول سی گِنایَلِ خُوش وِ اوسِه سی گِنایَلِ قوم، سییِکِه یِه دَف سی هَمیشَه، ای کارَ کِه، اوسِه که خِشَه قُربونی کِه. 28سییِکِه شریعت، آیَمَلَه مِنِه ضَعفَلِشون تعیین ایکِنِه سی کاهنِ اعظم بییَن، امّا کلمهیَلِ قسَمی که دِندِی شریعت اومَه، کِری نَه تعیین ایکِنِه، که تا وَ ابد کامل وابییِه.
Currently Selected:
نامَه وَ عبرانییَل 7: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
