نامَه وَ عبرانییَل 6
6
1پَ بییِیت وَ دَرسَلِ ابتدایی دَرموردِ مسیح رَی وابِیم وِ بِرِیم نَهاتَر وَ طرفِ بالغ بییَن، وِ اُمبلا پایَه نَه نَنیمون وَ ری توبَه وَ کارَلِ بیخودی وِ ایمون وَ خدا، 2وِ تعلیم دَرموردِ تعمیدَل، دَس نَهایَنَل، زِندَه وابییَنِ مُردِهیَل وِ داوریِ ابدی. 3وِ یِنَه وَجا ایاریم اَر خدا اجازَه بییِه.
4سییِکِه اونگَلی که یِه دَف روشن وابییِنِه، وِ طومِ عَطِی آسمونی نَه مِزَه کِردِنِه وِ مِنِه روحالقدس شریک وابییِنِه 5وِ طومِ خوبِ کلامِ خدا وِ قُویَتَلِ زَمونِ آیندَه نَه مِزَه کِردِنِه، 6وِ اوسِه وَ ایمونِشون اُفتانِه، دَ نیشِهِه اونگَلَه اَزنو وَ توبَه واداشت، سییِکِه اونگَل اُمبلا کِرِ خدا نَه وَ ضررِ خِشون وَ صلیب ایکِنِن وُ وِّ نَه وَرِ تییِۀ هَمَه بیحرمت ایکِنِن.
7اَر زمینی، بارونی نَه که بیشترِ وَختَل وَش ایبارِه بِکَشَه وَ خُوش، وِ سی کَسلی که سیشون کاشتَه وابییِه مَصولِ مفیدی بییِه، وَ خدا برکت ایگِرِه. 8امّا اَر خار وُ خَش بییِه، زمینی بیارزشِه وِ نِزیکِه لعنت وابو، وِ عاقبتِش سُتَه وابییَنِه.
9ای عزیزَل، هَرچَن ایطو گَپ ایزَنیم، امّا دَرموردِ ایشا اِطمینون داریم که چییَلِ بِختَری که این نجاتِه، نصیبِتون ایابو. 10سییِکِه خدا نَه بیانصافِه، که کارِ ایشا وِ محبتی نَه که وَ خاطرِ نومِ وُّ مِنِه خذمت وَ ایموندارَلِ وَ مسیح نِشون دِیتِه وِ هَنی هَم ایدیت وَ هوشِش بویَرِه. 11اُرزویِ ایما یِنِه که هَر کویَکی وَ ایشا هَمی غیرَتَه تا وَ آخِر حفظ کِنیت، تا اِمیدِتون عملی وابو. 12تا سُس نَبِیت، بلکَم وَ کَسلی که بِی ایمون وِ صبر وارثِ وَعدهیَل ایابون سرمشق بِگِریت.
حَتمی بییَنِ وعدۀ خدا
13موقِی که خدا وَ ابراهیم وعدَه دا، سییِکِه وَ خُوش گَپوتَری نَبی که وَش قسم بِخَرِه، وَ خُوش قسم خَه 14فرمایش کِه: «وَراسی تِنَه برکت اییُم وِ نسلِ تِنَه زیاد ایکِنُم.» 15وُ وَ ای ترتیب، ابراهیم بعدَ یِکِه بِی صبر انتظار کَشی، وعدَه نَه گِرُت.
16سییِکِه مردم وَ چیئی قسم ایخَرِن که وَ خِشون گپوترِه، وِ مِنِه تَمومِ بَحثَلِشون، قَسَمی هِسی که آخِرِ سَر گَپَلِشونَه ثابت ایکِنِه. 17پَ وَختی خدا خواس وَ اونگَلی که وارثِ وَعدهیَل بییِن، بیشتر نِشون بییِه که وَ قَصتِش نییَرگَردِه، وِه نَه بِی قسم ضمانت کِه، 18تا وَ واسطۀ دِتا چیئی که تغییر نیکِنِه، که نیشِهِه خدا درموردِ اونگَل دِرو کِنِه، ایما که سی پَنا آوُردَن دَرَتیمِه، یِکِلی دِلگرمی داشتَه بِیم، تا وَ امیدی که نَهامونِه سِفت بِچَسبیم. 19ای امید، مِی لنگری سِفت وِ مطمئن سی جونِمونِه، امیدی که ایرَه اولَتِ پردۀ بِهون، وَ جِی داخلی. 20جِیئی که عیسی نِهِی ایما، وَ طرفِ ایما، رَتِه داخل؛ وِ تا ابد کاهن اعظم وابییِه مِنِه رتبۀ مِلکیصِدق.
Currently Selected:
نامَه وَ عبرانییَل 6: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
