نامَه وَ عبرانییَل 11
11
بِی ایمون
1ایسو، ایمون، اِطمینون وَ چییَلی یَه که وَشون امید داریم وِ خاطرجَم بییَن وَ حقیقتِ اوچییَلی یَه که بِی تییَه نیابو دیشون. 2سییِکِه وَ خاطرِ ایمون بی که دَر موردِ مردِمونِ قدیم وَ خوبی شهادت دایَه وابی.
3ایما بِی ایمونِه که ایفَمیم، جهان وَ وسیلۀ کلامِ خدا آفرییَه وابی، طوری که چییَلی که دییَه ایابون وَ چییَلی که دییَه نیابون دِرِس وابی.
4بِی ایمون بی که هابیل قُربونیِ قابلِ قبولتری وَ قُربونیِ قائن تقدیمِ کِه، وِ سی هَمی ایمون، شهادت دایَه وابی که وِّ صالحِه، خدا بِی قبول کِردَنِ پیشکِشَلِ وُّ وَ خوبی وَش شهادت دا. وِ هَرچَن وِّ مُردِه، وَ خاطرِ ایمون، هَنی گَپ ایزَنِه.
5بِی ایمون بی که خَنوخ بُردَه وابی وَ بالا تا مرگَه نَبینِه، وُ وِّ جُسَه نَوابی، سییِکِه خدا وِّ نَه بُردَه بی، سییِکِه نِهِی یِکِه وِّ بُردَه وابو بالا، دَرموردِش شهادت دایَه وابی که خدا وَش راضی یَه. 6وِ بیایمون نیشِهِه خدا نَه راضی کِه، سییِکِه هَرکه وَ خدا نِزِنگ ایابو، بایِس ایمون داشتَه بو که وِّ هِسی وُ وَ کسَلی که وَ دینِشِن، پاداش اییِه.
7بِی ایمون بی که نوح وَختی که وَ طرفِ خدا دَرموردِ کارَلی که هَنی دییَه نَوابییَه بی باخَوَر وابی، بِی خداترسی سی نجاتِ اَهلِاَیالِش کشتیای ساخت، وِ ایطو وِّ دنیا نَه محکوم کِه وِ وارثِ او صالحی وابی که وَ رَه ایمون وَ دَس ایا.
8بِی ایمون بی که ابراهیم وَختی که خُوندَه وابی، اطاعت کِه وِ زَه وَدَر، رَت وَ جِیئی که ایبایِس وَ میراث ایبُرد؛ وِ زَه وَدَر، بییِکه بِیونِه ایرَه وَ کوچو. 9بِی ایمون بی که وِّ رَت تا مِنِه دیارِ وَعدَه، زِندِیی کِنِه، مِنِه دیارِ غریب، بِی اِسحاق وُ یعقوب، که مِنِه او وعدَه باش شریک بییِن، مِنِه بهونَل زِندِیی کِه. 10سییِکِه وِّ بَندیرِ شهری بی بِی پییِهیَل، که معمار وِ بَنّاش خدا یَه.
11بِی ایمون بی که سارا هم بِی یِکِه دالو بی وِ بچَه نیکِه قُویَتِ حاملَه وابییَنَه گِرُت؛ سییِکِه وعدَه دهندَه نَه وفادار دونِس. 12وِ ایطو، وَ یِه مِرد، وِ هَم وَ کسی که تقریباً مُردَه بی، نسلِ گَپویی وَ وجود اومَه، که مِی سِتارِهیَلِ آسمون وِ مِی ریگَل هیبِی دریا بیحَدِحساب بییِن.
13تَمومِ اینگَل مِنِه ایمون مُردِن، بییِکِه وَعدهیَلَه بِگِرِن، امّا اونگَلَه وَ دیر دییِن وُ وَشون سلام دان، وِ قبول کِردِن که وَ ری زمین، بیگانَه وِ غریبِن. 14سییِکِه اونگَل که ایطو گَپ ایزَنِن، نِشون اییِن که وَ دینِ جُسَنِ وطنی سی خِشونِن. 15اَر اونگَل وَ فکرِ دیاری بییِن که وَش زَیَه بییِن وَدَر، مِجالِ وَرگَشتَن داشتِن. 16امّا ایطو که ایبینیم، اونگَل مِنِه شوقِ مملکتِ بِختری بییِن، یعنی مملکتی آسمونی. سی هَمیو، خدا عار نَیارِه که خِدِی اونگَل خُوندَه وابو، سییِکِه وِّ شهری سیشون آمایَه کِردِه.
17بِی ایمون بی که ابراهیم موقِی که امتحان وابی، اِسحاقَ سی قُربونی تقدیم کِه؛ وُ وِّ که وَعدهیَلَه گِرُتَه بی، حاضر وابی تِنا کِرِشَه قُربونی کِنِه، 18هَموِه که وَش گُتَه وابییَه بی: «نسلِ تِ وَ اِسحاق وَ حساب ایا.» 19ابراهیم فکر کِه، که خدا ایتَرِه حتی اسحاقَ وَ مُردِهیَل زندَه کِنِه، وِ ایابو گُت ابراهیم یِه طوری اِسحاقَ وَ مرگ اِسَه واپَس.
20بِی ایمون بی که اِسحاق، یعقوب وِ عیسو نَه دَرموردِ چییَلِ آیَندَه، مِنِه دعا برکت دا.
21بِی ایمون بی که یعقوب موقِی مُردَن، هر کویَکی وَ کُرَلِ یوسفَ برکت دا وِ دَر حالی که وَ گِلاکِ خُوش تِکی زَیَه بی، سَرِشَه خَل کِه وِ عبادت کِه.
22بِی ایمون بی که یوسُف آخِرِ عمرش، دَرموردِ وَدَر رَتَنِ بنیاسرائیل وَ مصر گَپ زَه وِ دَرموردِ هَسَلِ خُوش وصیت کِه.
23بِی ایمون بی که وَختی موسی وَ دنیا اومَه، دِیبُوش وِّ نَه سه ماه قایم کِردِن، سییِکِه دییِن بچۀ مَلوسی یَه؛ وُ وَ حکمِ پادشاه زَلَشون نَرَت.
24بِی ایمون بی که موسی موقِی که گَپو وابی، نَخواس «کِرِ دویرِ فرعون» خُوندَه وابو، 25وِّ حاضر بی، بِی قومِ خدا خفت بِکَشِه تا یِکِه چَن وَختی مِنِه خَشیِ گِنا کِیف کِنِه. 26وِّ مَزِمَت وابییَن وَ خاطرِ مسیحَ گَنجی گَپوتَر وَ گَنجَلِ مصر دونِس، سییِکِه وِّ بَندیرِ پاداش بی. 27بِی ایمون بی که موسی وَ مصر زَه وَدَر وُ وَ خِشمِ پادشاه زَلَش نَرَت، سییِکِه پاوَرجا وِیسا، وَ خاطرِ یِکِه او نادییَنی همیشَه وَرِ تییَلِش بی. 28بِی ایمون بی که موسی پِسح وِ پِشِنگَنایَنِ خینَه وَجا آوُرد تا او فرشتهای که اَوَلزایَلَه ایکُشت، دَس نَنِه وَ ری اَوَلزایَلِ اسرائیل.
29بِی ایمون بی که قومِ اسرائیل وَ مابینِ دریای سرخ مِی زمینی خشک رَی وابییِن؛ امّا وختی مصرییَل تلاش کِردِن هَمی کارَ کِنِن، غرق وابییِن.
30بِی ایمون بی که دیفارَلِ شهرِ اَریحا دِندِی یِکِه قومِ اسرائیل هَف رو دورِش گَشتِن، رُمبِس.
31بِی ایمون بی که راحابِ فاحشَه بِی اونگَلی که نافِرمون بییِن کشتَه نَوابی، سییِکِه وَ گرمی جِلو جاسوسَل دَراومَه.
32دَ چه بِگُم؟ سییِکِه مِجالی نی دَرموردِ جِدعون، باراق، شَمشون، یَفتاح، وَ داوود وِ سموئیل وِ پیغَمبَرَل گَپ بِزَنُم، 33که بِی ایمون، مَملِکتَلَه واگیر کِردِن، عدالتَه برقرار کِردِن، وَعدهیَلَه گِرُتِن؛ کَپِ شیرَلَه بَسِن، 34بِرازهیَلِ تَشَه کور کِردِن، وَ دَمِ شُمشیر نجات گِرُتِن؛ ضعفِشون، قُویَت وابی، مِنِه جنگ زوردار وابییِن وِ لشکَرَلِ بیگانَه نَه تارِمار کِردِن. 35زَنَل، مُردِهیَلِ خِشونَه زِندَه جُسِن. عِدِهای شکنجَه وابییِن وِ آزادی نَه قبول نَکِردِن، تا اُمبلا زِندَه وابون سی یِه زِندِییِ بِختر. 36یِهپارهای مَخسَرَه وابییِن وِ شلاق خَردِن، وِ حتی وَ زنجیر کَشییَه وابییِن وِ اُفتان وَ زندان. 37اونگَل سنگسار وابییِن، بِی هَرَه دِ کَل وابییِن وِ بِی شُمشیر کشتَه وابییِن. مِنِه پوسِ میش وُ بز، فقیر وِ ذلیل وِ ستمکِش، وِیلون وابییِن. 38اونگَل که دنیا لایِقِشون نَبی، مِنِه بیابونَل وِ کُویَل، اِشکَفتَل وِ کِرَلِ زمین، وِیلون بییِن.
39وِ تَمومِ اینگَل بِی یِکِه وَ خاطرِ ایمونِشون وَ خوبی وَشون یای وابییِه، وا ای حال، هیچ کویَکیشون وعدَه نَه نَگِرُتِن. 40سییِکِه خدا چی بِختری سیمون حاضر کِردَه بی، تا اونگَل بیایما کامل نَوابون.
Currently Selected:
نامَه وَ عبرانییَل 11: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
