نامَه وَ کِلیسِی اَفِسُس 2
2
بِی فیض وَ وسیلۀ ایمون
1وِ ایشا مِنِه خطایَل وِ گِنایَل مُردَه بیئیت، 2یِه موقِی مِنِه او گِنایَل قَیَم ایزِیت، اوسِه که وَ رَیَلِ ای دنیا وُ وَ رئیسِ قدرتِ هوی، اِبلیس اطاعت ایکِردیت، وَ او روحی که ایسِه هَم مِنِه آیَمَلِ تور کار ایکِنِه. 3ایما هَم هَمَمون یِه موقِی مابینِشون مِنِه هَوَسَلِ جِسمِمون زِندِیی ایکِردیم، وِ خواسِهیَلِ جسم وِ فِکرِمونَه وَجا ایاوُردیم؛ ایما هَم مِی بقیَه، بَنا وَ طبیعتِ خِمون مَحکوم وَ غَضَبِ خدا بیئیم. 4امّا خدا که رَحمَتِش بی اَندازَه یَه، وَ خاطرِ محبتِ عظیمِ خُوش ایما نَه دوس داشت، 5حتی اوسِه که مِنِه خطایَلِمون مُردَه بیئیم، ایما نَه بِی مسیح زِندَه کِه - وَ رَه فیض نجات جُسیتِه - 6وِ ایما نَه بِی مسیح زِندَه کِه وِ مِنِه جایَلِ آسمونی بِی مسیح عیسی نِشُند، 7تا مِنِه زَمونَلِ آیندَه، او فیضِ عظیم وِ بیحَدِحسابِ خِشَه مِنِه مِرَبونیش نِسوت وَ ایما مِنِه مسیح عیسی نِشون بییِه. 8سییِکِه وَ خاطرِ فیض وُ وَ وسیلۀ ایمون نجات جُسیتِه، وِ یِه وَ خِتون نی، بَلکَم عطِی خدایَه 9وِ یِه نتیجۀ کارَل نی، تا هیشکَه وَ خُوش نَبالِه. 10سییِکِه ایما کارِ دَسِ خدایِیم، مِنِه مسیح عیسی آفرییَه وابیئیمِه تا کارَلِ خوب کِنیم، کارَلی که خدا وَ نَهاتَر آمایَه کِه تا مِنِه اونگَل قَیَم وَگِریم.
یکی بییَن مِنِه مسیح
11پَ وَ حوشتون بو که زَمونی ایشا غیرِیَهودییَلَه "خَتنَه نَوابییَه" ایخُوندِن وِ خِشونَه "خَتنَه وابییَه" دونِسِن.(دَر حالی که ختنۀ اونگَل کاری جِسمانی یَه که وَ دَسِ انسان کِردَه وابییِه) 12وَ حوشتون بو که مِنِه او زَمون وَ مسیح جیا بیئیت، وَ قومِ اسرائیل وَ حساب نیومِیت وِ بیگانه بیئیت وِ نِسوَت وَ عَهدَلِ وَعده غَریبَه بیئیت، وِ نااِمید وِ بیخدا مِنِه ای دنیا زِندِیی ایکِردیت. 13امّا ایسو مِنِه مسیح عیسی، ایشا که یِه موقِی دیر بیئیت، وَ واسطۀ خینِ مسیح نِزِنگ وابیئیتِه.
14سییِکِه مسیح خُوش صلحوُسلامتِ ایمایَه، که هر دِتِی ایما یعنی یَهود وِ غیرِیَهودَ یکی کِردِه وِ مِنِه بَیَنِ خُوش دیفارِ جیایی نَه که باعثِ دشمنی بی رُمبَنایِه. 15آئین و رسومَلی که وَ دستورَلِ شَریعَت بی، بیاعتبار کِه، تا مِنِه خُوش وَ جِی او دِتا، یِه انسانِ نو دِرُس کِنِه، تا صلحوُسلامت برقرار کِنِه، 16وِ هَر دِتامونَه مِنِه یِه بَیَن بِی خدا صلح بییِه، وَ واسطۀ صلیبِ خُوش که ری وِه دشمنی نَه کُشت. 17وُ وِّ اومَه وِ خَوَرِ خَشِ صلحَه وَ ایشا که دیر بیئیت وُ وَ اونگَلی که نِزِنگ بییِن، اعلام کِه. 18سییِکِه وَ واسطۀ وُّ، هَر دِتامون مِنِه یِه روح وَ بُو آسمونی دَسرَسی داریم.
19پَ دَ ایشا، نَه بیگانَه وِ غَریبَه یِیت، بَلکَم هَموِلاتیِ ایموندارَل وُ وَ اَهلِاَیالِ خدایِیت. 20وِ ری شالودۀ رَسولَل وِ پییغَمبَرَل بَنا وابیتِه، که مسیح عیسی خُوش بَردِ اصلیِ او بَنایَه. 21مِنِه مسیح تَمومیِ ای بَنا وَ یَک وصل ایابو وِ معبدی مقدس ایابو مِنِه خداوند. 22وِ ایشا هَم بِی یَک مِنِه مسیح بَنا ایابِیت تا وَ شکلِ حونهای دَرِیت که خدا وَ واسطۀ روحِش مِنِه وِه مَنزِل ایکِنِه.
Currently Selected:
نامَه وَ کِلیسِی اَفِسُس 2: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
