نامَه وَ کِلیسِی اَفِسُس 1
1
1وَ طرفِ پولُس که وَ خواسِ خدا رسولِ مسیح عیسی یَه،
وَ ایموندارَلی که مِنِه شهرِ اَفِسُسِن، که مِنِه مسیح عیسی وَفادارِن:
2فیض وِ صلحوُسلامتی وَ طرفِ خدا، بُو ایما، وِ خداوند عیسی مسیح، وَ ایشا بو.
برکتَلِ روحانی مِنِه مسیح
3مبارک بو خدا وِ بُو خداوندِ ایما عیسی مسیح، که ایما نَه مِنِه مسیح بِی هَر برکتِ روحانی مِنِه جایَلِ آسمونی برکت دایِه. 4هَموطو که وِّ نِهِی آفرینش دنیا، ایما نَه مِنِه مسیح انتخاب کِه تا مِنِه حضورِش مقدس وِ بیعیب بِیم. مِنِه محبت، 5بَنا وَ صَلادیدِ خُوش، ایما نَه وَ نَهاتَر سی فرزندخُوندِهایش تعیین کِه تا وَ واسطۀ عیسی مسیح، کُرَلِ خدا بِیم؛ 6تا فیضِ پُرجلالِ وِّ ستایِش وابو، هَمو فیضی که مِنِه او عزیزِ خُوش، وَمون برکت دایِه. 7مِنِه مسیح، ایما وَ واسطۀ خینِ وِّ آزاد وابیئیمِه، که یِه هَمو آمرزشِ گِنایَلِه، که وِه نَه وَ قَدِ فیضِ عظیمِ خُوش، 8مِنِه هر حکمَت وِ فَهمِ کامل، وَ فَراوونی وَ ایما بَخشییِه. 9خدا سِرِّ ارادۀ خِشَه وَ ایما شِناسُند، بَنا وَ صَلادیدِ خُوش که مِنِه مسیح آشکار کِه 10نَخشۀ خدا یِه بی که وَختی زَمونِش بِرَسِه، همَه چی نَه، چه مِنِه آسمون وِ چه ری زمین، بِی یَک مِنِه مسیح جَم کِنِه.
11ایما مِنِه وُّ وارِثَل وابیئیمِه، سییِکِه بَنا وَ صَلادید وِّ که هَمَه چی نَه طبقِ ارادۀ خُوش اَنجوم اییِه، وَ نَهاتَر انتخاب وابییَه بیئیم. 12تا ایما که اَوَلین کَسَلی بیئیم که وَ مسیح اِمید بَسیم، جلالِ وِّ نَه ستایش کِنیم. 13ایشا هَم مِنِه وُّ، اوسِه که کلامِ حَقیقت، که هَمو انجیلِ نجاتِتونِه اِشنُفتیت وِ وَش ایمون آوُردیت، بِی روحالقدس که وَعدَه دایَه وابییِه مُهر وابیئیت، 14روحالقدس که بَیونۀ میراثِ ایما یَه تا زَمونی که وِه نَه کامل وَ دَس بیاریم، تا جلالِ خدا ستایش وابو.
شکر کِردن و دعا
15سی هَمیو، مِ هَم وَختی تعریفِ ایمونِ ایشا نَه وَ عیسی خداوند وِ محبَتِتونَه وَ تَمومِ ایموندارَل اِشنُفتُم، 16وَ شکر کِردن سی ایشا دَس نَکَشییِمِه، ایشا نَه هَمیشَه مِنِه دعایَلُم وَ حوشِم ایارُم، 17تا خِدِی خداوندِ ایما عیسی مسیح، او بُو پُرجلال، روحِ حکمت وِ مِکاشِفَه نَه وَتون عَطا کِنِه تا وِّ نَه بِشناسیت. 18تا تییَلِ دِلِتون روشَن وابو، تا او اِمیدی که خدا ایشا نَه سی وِه خُوندِه، بِشناسیت وُ وَ او میراثِ بیحَدِحساب وِ پُرجلالِ خدا مِنِه ایموندارَل پِی بویَریت. 19وُ وَ قویَتِ بیحَدِحسابِ وُّ نِسوَت وَ ایما که ایمون داریم، آگا وابِیت. ای قویَت، وَ کارِ قدرتِ بیحَدِحسابِ خدا وَریسایِه 20که وِه نَه مِنِه مسیح وَ کار گِرُت، اوسِه که وِّ نَه وَ مُردِهیَل زِندَه کِه وِ مِنِه جایَلِ آسمونی، وَ دَسِ راسِ خُوش نِشُند، 21بالاتَر وَ هَر ریاسَت وِ قدرت وِ قویَت وِ سَلطنت، وِ بالاتَر وَ هَر نومی نَه تِنا مِنِه ای دورَه بَلکَم مِنِه دورِهیَلِ آیندَه هَم. 22وُ وِّ هَمَه چی نَه نَها زِرِ پایَلِ مسیح، وِ تعیین کِه وِّ سی کلیسا سَرِ هَمَه چی بو، 23کلیسایی که بَیَنِ وِّنِه، پُر بییَنِ وُّ همَه چی نَه مِنِه همَه جا پُرتاپر ایکِنِه.
Currently Selected:
نامَه وَ کِلیسِی اَفِسُس 1: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
