نامۀ دِوِمِ پطرس 3
3
روزِ خداوند
1ای عَزیزَل، یِه نامۀ دِوِمی یَه که سیتون اینِویسُم. هر دِتا نامَه نَه بِی ای نیت نوشتُم که وَ حوشِتون بیارُم تا فکرَلِ پاکِتونَه وَ شوق بیارُم، 2تا گَپَلی نَه که پِیغَمبرلِ مقدّس نَهاتَر گُتِنِه، وِ حکمِ خداوند وِ نجات دهندَهمونَه که وَ واسطۀ رَسولَلِتون وَتون دایَه وابی وَ یای بیاریت.
3نِهِی هرچی، بِیونیت که مِنِه زَمونِ آخِر مَخسَرَهگَرَلی ایایِن که وَ دینِ خواسِهیَلِ گَندِ خِشونِن وِ بِی مَخسَرَه 4ایگُن: «پَ چه وابی وعدۀ اومَیَنِ وُّ؟ سییِکِه وَ زَمونی که بویَلِمون مُردِن، هَمَه چی هَموطورِه که وَ اَوَلِ آفرینش بی!» 5سییِکِه، اونگَل عَمداً وَ ری ای حقیقت تییَشونَه ایبَندِن که آسمونَل وَ قدیم بی وِ زمین بِی کلامِ خدا، وَ اُو وُ وَ وسیلۀ اُو شکل گِرُت؛ 6وِ یِکِه وَ وسیلۀ هَمی اُو، دنیایی که او موقَع بی غرق وِ نابود وابی. 7امّا بِی هَمو کلام، آسمونَل وِ زمینی که ایسِه ایبینیت سی تَش اَمبار ایابون، وِ تا روزِ داوری وِ هلاک وابییَنِ بیدینَل نِگَه داشتَه ایابون.
8امّا ای عزیزل، وَ ری ای حقیقت تییَتونَه نَبَندیت که طِی خداوند یِه روز مِی هزار سالِه وِ هزار سال مِی یِه روز. 9برخلافِ گَمونِ یِهپارهای، خداوند مِنِه اَنجومِ وعدَش دیر نیکِنِه، بَلکَم بِی ایشا صبورِه، سییِکِه نیخوا کسی هلاک وابو بَلکَم ایخوا هَمَه توبَه کِنِن.
10امّا روز خداوند مِی دُز ایایِه، اوسِه آسمونَل بِی غِرُمبَه وَ بِین ایرَن وِ سِتارِهیَل تَش ایگِرِن وِ پِشک ایابون، زمین وِ تَمومِ کارَلِش دیار ایابو.
11وَ وُچِه که تَمومِ ای چییَل ایطوری پِشک ایابون، ایشا بایِس مِنِه زِندِییِ مقدس وِ دینداری که داریت چِطو مَردِمونی بِیت، 12بَندیرِ روزِ خدا بِیت وِ تلاش کِنیت او روز زیتَر بِرَسِه. مِنِه او روز که آسمونَل تَش ایگِرِن، وِ پِشک ایابون وِ ستارهیَلِ آسمونَل وَ گرما اُو ایابون. 13امّا ایما بنا وَ وعدۀ وُّ بِی شوق بَندیرِ آسمونَل وِ زمینی تازَه یِیم که هر چیئی که مِنِه نظرِ خدا دِرِسِه، مِنِش منزل کِنِه.
14پَ ای عزیزَل، ایسِه که بَندیرِ ای چییَلیت، سخت تلاش کِنیت تا مِنِه حضورِ وُّ بیلکَه وِ بیعیب وِ مِنِه صلح بِیت. 15وِ صبوریِ خداوندِ ایما نَه نجات بِیونیت، هَموطو که کَکِی عزیزِمون پولُس هَم طبقِ حکمتی که وَش عطا وابییِه، سیتون نوشت. 16وِّ مِنِه تَمومِ نامهیَلِش وَختی که وَ ای چییَل گَپ ایزَنِه اینویسِه. چییَلی مِنِه نامهیَلِشِه که فَمِسَنِشون سختِه وِ نایونَل وِ سُسایمونَل واریش ایکِنِن، هَموطو که بِی باقیِ نوشتهیَلِ مقدّس هَم ای کارَ ایکِنِن، وِ یِه باعث نابودیشون ایابو.
17پَ ایشا ای عزیزَل، ایسِه که یِنَه دونیت، وَ هوش بِیت نَکِنِه وَ رَه نادِرِسِ بیدینَل وَ رَه وِل وابِیت وِ پاوَرجایتونَه وَ دَس بِئیت، 18بَلکَم مِنِه فیض وِ شناختِ خداوند وِ نجات دهندَهمون عیسی مسیح رُشت کِنیت، که وِّ نَه وَ ایسِه تا وَ ابد جلال بو! آمین.
Currently Selected:
نامۀ دِوِمِ پطرس 3: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
