نامۀ دِوِمِ پطرس 2
2
پیغَمبَرَل وِ معلِمَلِ وَدِرو
1امّا مابینِ قوم، پِیغَمبَرَلِ وَدِرو هَم بییِن، هَموطو که مابینِ ایشا هَم معلِمَلِ وَدِرو ایایِن که قایِمَکی تعلیمَلِ غلطی ایارِن که هلاک ایکِنِه، وِ هَمو اربابی نَه که اونگَلَه اَزنو اِسَه حاشا ایکِنِن، وِ ایطوری، بَلایی یِههُویی وَ سَرِ خِشون ایارِن. 2وِ یِکِلییَل وَ بیعفتییَلِ اونگَل پیروی ایکِنِن، وُ وَ خاطرِ اونگَل وَ رَه حقیقت کفر ایگُن. 3وَ ری طمعِ خِشون، بِی گَپَلِ دِرو، ایشا نَه غارت ایکِنِن. مَحکومیَتِشون که وَ نَهاتَر تعیین وابییِه، نَهاشونِه وِ نابودیشون نَخُوسییِه!
4سییِکِه اَر خدا وَ فرشتهیَلی که گِنا کِردِن رحم نَکِه، بَلکَم اونگَلَه وِر دا وَ سیاچالِ جَنَم وِ اونگَلَه بِی زَنجیرَلِ ظلماتِ غلیظ حبس کِه تا سی داوری وُچِه نِگَه داشتَه وابون؛ 5وِ اَر وَ دنیایِ قدیم هَم رحم نَکِه، بَلکَم وَ او دنیایِ بیدینَل تیفون بِسی کِه وِ تِنا نوح، که رَه صالحی نَه اعلام ایکِه، بِی هَف نَفر دَ نَه حفظ کِه؛ 6اَر شَهرَلِ سُدوم وِ عَمورَه نَه خُل کِه وُ وَ نابودی مَحکوم کِه تا عبرتی بو سی عاقبتِ بیدینی، 7وِ اَر لوطِ صالحَه که وَ هرزهاییَلِ آیَمَلِ شریر وَ تَنگ اومَیَه بی، نجات دا - 8سییِکِه او مِردِ صالح هَر رو مِلاشون زِندِیی ایکِه وِ جونِ صالِحِش وَ دییَن وِ اِشنُفتَنِ کارَلِ گَندِشون مِنِه عذاب بی - 9پَ خداوند دونِه چطو آیمِ دیندارَ وَ امتحانَل نجات بییِه وِ آیَمِ ناصالِحَه سی مکافاتِ روزِ داوری نِگَه کِنِه، 10مخصوصاً اونگَل که وَ دینِ خواسِهیَلِ فاسدِ نَفسِ خِشونِن وِ اقتدارَ خوار وَ نَظَر ایارِن.
اینگَل طوری بُلکُم وِ غِدِن که وَ اهانت وَ گَپویَلِ آسمونی زَلَشون نیرَه؛ 11دَر حالی که فرشتهیَل، بِی یِکِه قدرت وِ اقتدارِ بیشتَری دارِن، موقِی اعلام مَحکومیتِ خداوند وَ اونگَل، وَشون اهانت نیکِنِن. 12امّا اینگَل مِی حِیونَلِ بیشعورِن که وَ ری غریزَه رفتار ایکِنِن وُ وَ دنیا اومَنِه تا وَ تَلَه بییُفتِن وِ نابود وابون وِ نِسوت وَ چییَلی که نیتَرِن بِفَمِنِشون اهانت ایکِنِن، وِ مِنِه فسادِ خِشون نابود ایابون، 13وُ وَ عوَضِ او بَدی که کِردِنِه، بَد ایبینِن. خَشیِ اونگَل عیش وُ نوش مِنِه روزِ روشنِه. لَکهیَلِ نَنگی یَن که حتی موقِی که باتون مِنِه مِمونی یَن، وَ غَرق وابییَن مِنِه کِیفَلِ گولزَنَکِ خِشون دَس نییَگِرِن. 14اونگَل تییَلی دارِن پُر وَ زنا که وَ گِنا کِردَن سیر نیابو. اونگَل جونَلی نَه که سِسِن ایندازِن وَ تَلَه. دِلِشون هُمکارۀ طمع وابییِه. اولادَلِ لعنَتِن! 15رَه راسَه وِل کِردِنِه، وَ رَه وِل وابییِنِه. اونگَل رَتِن وَ رَه بَلعام کِرِ بِعور، وِه که مِزِ ناراسی نَه دوس داشت. 16امّا بَلعام وَ خاطرِ کارَلِ گَندِش توبیخ وابی؛ خَری بیزُوون بِی صییِی آیَم گَپ زَه وُ وَ کَلوبازیِ پِیغمبر دَهَنَه نَها.
17ای معلِمَلِ وَدِرو، چشمهیَلی بیاُو وِ کِرِمِنجَلی رُندَه وابییَه وَ تیفونِن که ظلماتِ غلیظی بَندیرِشونِه. 18سییِکِه بِی صییِی بِلَندِ گَپَلی که پُر وَ غِدی وِ نَفَمی یَه، اونگَلی نَه که وَ سختی وَ چَنگِ آیَمَلِ گَند دَرَتِنِه وِر اییِن مِنِه تَلۀ شهوَتَلِ نفسانیِ خِشون. 19وَشون وعدۀ آزادی اییِن، امّا اونگَل خِشون بندۀ فسادِن. سییِکِه آیَمی بندۀ هَمو چییَه که وَش زورِه. 20سییِکِه اَر، بَعدَ یِکِه اونگَل بِی شناختِ خداوند وِ نجات دهندَهمون عیسی مسیح، وَ فسادِ دنیا نجات گِرُتِن، اُمبلا وَ او چییَل گرفتار وابون وِ شکست بِخَرِن، عاقِبَتِشون بَتَرَ اوَل ایابو. 21بِختَر بی که وَ اوَل، رَه صالحی نَه نیشناختِن، تا یِکِه بعدَ اِشناختَن، وَ حُکمِ مقدّسی که وَ دَسِشون دایَه وابییَه بی، ری وَرگَردَنِن. 22ای مَثَل دَرموردِ اوچیئی گَپ ایزَنِه که سی اونگَل پیش اومَیِه:
«سگ اییَرگَردِه وَ قِیِ خُوش»،
وِ
«خوکِ شُسَه وابییَه، شُل پِلیت ایکِنِه.»
Currently Selected:
نامۀ دِوِمِ پطرس 2: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
