نامۀ دِوُم وَ کِلیسِی قُرَنتُس 9
9
پیشکِشَلی سی مَسیحییَلِ اورشلیم
1ایسِه لازم نی درموردِ ای خذمتِ وَ ایموندارَلِ وَ مسیح سیتون بِنویسُم، 2سییِکِه دونُم سی ای کار چه شوقی داریت، وُ وَ ای بابت هَم طِی ایموندارَلِ مقدونیَه وَتون بالییِمِه. وَشون گُتِمِه که ایشا وَ پار مِنِه ولاتِ اَخائیَه سی دایَنِ پیشکِش آمایَه بیئیتِه. وِ غیرتِ ایشا بیشتَرِ اونگَلَه هَم وَ ای کار واداشتِه. 3امّا ای کَکایَلَه بِسی ایکِنُم تا افتخارِمون وَ ایشا وَ ای بابت پیک نَبو، تا هَموطو که وَشون گُتُم، آمایَه بِیت. 4نَکِنِه، اَر یِهپارهای وَ ایموندارَلِ مقدونیَه بام بیان وِ بِفَمِن که ایشا نَه آمادَه یِیت، ایشا نَه نونُم امّا ایما وَ ای اِطمینونی که وَتون داشتیمِه، شَرمَندَه ایابِیم. 5پَ مِ دییُم لازمِه وَ ای کَکایَل بِخوام که نِهِی مِ بیان طِیتون وِ پیشکِشَلی نَه که وعدَه دِیتِه آمایَه کِنِن، تا ای پیشکش، پیشکشی وابو که بِی میل خِتون دِیتِه، نَه وَ زور.
بِی شایی پیشکش بِئیت
6وَ یای داشتَه بِیت: هرکه بِی کِنِسی بِکارِه، کم هَم ایبِرِه، وِ هرکه یِکِلی بکارِه، یِکِلی هَم اییَگِرِه. 7هرکه بایِس هَموقَه بییِه که مِنِه دل قَصت کِردِه، نَه بِی بیمیلی وِ زور، سییِکِه خدا کسی نَه که بِی شایی ایبَخشِه دوس دارِه. 8وِ خدا ایتَرِه هر برکتی نَه سیتون مَهلی زیاد کِنِه تا همیشَه مِنِه هَمَه چی وَ قَدِ خِتون داشتَه بِیت، وِ سی هر کارِ خوبی، وَ فراوونی داشتَه بِیت. 9هَموطو که مِنِه کتابِ زَبور اومَیِه:
«بِی دَسِدلوازی وَ مُتاجَل بَخشییِه،
عدالَتِش تا وَ ابد پاوَرجایَه.»
10وِّ که تیمَه سی کشاورز وِ نونَه سی خَردَن اییِه، تیمِتونَه سی کِشتِ کار آمایَه ایکِنِه وِ برکت اییِه وِ ثَمَرِ صالحیتونَه یِکِلی ایکِنِه. 11ایشا وَ هر بابَت دارا ایابِیت تا وَ هر بابت دَسِدِلواز بِیت، که بِی ای کارِ ایما مردم خدا نَه شکر ایکِنِن.
12سییِکِه ای خذمت، نَه تِنا اِتیاجَلِ ایموندارَلَه بَرطرف ایکِنِه، بلکم شکر کِردَنَلِ زیادی وَ طرفِ خدا سَرریز ایابو. 13وَ خاطرِ ای خذمت، مردم خدا نَه ستایِش ایکِنِن، سی اطاعتی که بِی اعترافِ ایشا وَ انجیلِ مسیح یَه، وِ هَم سی دَسِدِلوازی که مِنِه کِمَک وَ اونگَل وُ وَ هَمَه نشون ایئیت. 14هَمیطو هَم وَ خاطرِ فیضِ عظیمِ خدا که وَ ریتونِه، اونگَل سیتون دعا ایکِنِن وِ شوقِ دییَنِتونَه دارِن. 15خدا نَه شکر سی او پیشکشی که تعریف کِردَنی نی!
Currently Selected:
نامۀ دِوُم وَ کِلیسِی قُرَنتُس 9: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
