نامۀ دِوُم وَ کِلیسِی قُرَنتُس 8
8
تشویق کِردَن وَ دَسِدِلوازی
1ای کَکایَل، ایخِیم ایشا نَه وَ فیضی که خدا وَ کلیسایَلِ مقدونیَه دایِه، باخَوَر کِنیم. 2سییِکِه اونگَل بِی یِکِه وَ خاطرِ تنگی، سخت مِنِه امتحانِن، امّا بی حَد، شایِن وِ بِی یِکِه مَهلی فقیرِن، امّا دَسِدِلوازِن. 3سییِکِه مِ شاهِدُم که اونگَل اوقَه که وَ دَسِشون ایا، حتی بیشتَرَ وُ، خِشون پا پیش نَهانِه، 4بِی یِکِلی اصرار وَمون خواسِن که مِنِه ای خذمتِ وَ ایموندارَلِ وَ مسیح بَهری داشتَه بون. 5وِ یِه طوری نَبی که ایما فکر ایکِردیم، بَلکَم اونگَل اَوَل خِشونَه وَ خداوند تقدیم کِردِن وِ اوسِه طبقِ ارادۀ خدا خِشونَه دان وَ دَسِ ایما. 6سی هَمیو، ایما وَ تیتوس خواسیم هَموطو که خُوش نَهاتَر قَیَمِ اَوَلَه وَگِرُتَه بی، ایسِه هَم ای کارِ خیرَ وَ آخِر بِرَسونِه. 7امّا هَموطو که مِنِه هَمَه چی بِختَریت - مِنِه ایمون، مِنِه گَپ زَیَن، مِنِه شناخت، مِنِه شوقِ زیاد، وِ مِنِه محبَتِتون وَ ایما - پَ مِنِه ای کارِ خیر هَم وَ هَمَه بِختَر بِیت.
8یِنَه وَتون حکم نیکِنُم، بلکم ایخوام محبتِ خالِصِتونَه نسوَت وَ شوقِ بقیَه امتحان کِنُم. 9سییِکِه وَ فیضِ خداوندِ ایما عیسی مسیح آگایِیت که هَرچَن دارا بی، وَ خاطرِ ایشا فقیر وابی تا ایشا مِنِه فقیریش دارا وابِیت.
10وِ نظرِ خِمَه درموردِ یِه ایگُم: یِه وَ نفعِتونِه، سییِکِه پار ایشا نَه تِنا ای کارِ خیرَ شروع کِردیت، بلکم شوقِشَه هَم داشتیت. 11پَ ایسِه ای کارَ وَ آخِر بِرَسونیت، تا شوقی که وَ ای کار داشتیت، بِی وَ آخِر رَسُندَنِش وَ قَدِ توانِ مالیتون جور بو. 12سییِکِه اَر شوقی بو، پیشکِشِ آیَم قبول ایابو، اَلبَت طبقِ چیئی که دارِه، نه طبقِ چیئی که نَیارِه.
13سییِکِه منظورُم نَه یِنِه که بقیَه مِنِه راحتی بون وِ ایشا مِنِه تنگی، بلکم یِکِه وَ ری انصاف بو 14که وَ زیادی چیئی که ایشا داریت، ایسِه کمِ کسریِ اونگل بَرطرف وابو، تا وَ زیادیِ چیئی که اونگَل دارِن، کمِ کَسریِ ایشا بَرطرَف وابو، تا انصاف برقرار وابو. 15هَموطو که مِنِه کِتابَلِ مقدس نوشتَه وابییِه: «وِه که زیاد جَم کِه، اضاف نَیاشت، وُ وِه که کم جَم کِه، کم نَیاشت.»
پولُس سفارِش تیتوسَ وَ قُرَنتُس ایکِنِه
16امّا خدا نَه شکر ایکِنُم که مِنِه دلِ تیتوس هَم نَهایِه که مِی مو وَ تَهِ دل وَ فکرِتون بو. 17سییِکِه وِّ نَه تِنا خواسِ ایما نَه قبول کِه، بلکم خُوش بِی یِکِلی شوق، سی اومَیَن طِی ایشا پا پیش نَها. 18وِ ایما باش کَکایی نَه بِسی ایکِنیم که تَمومِ کلیسایَل وِّ نَه وَ خاطرِ موعظۀ انجیل ایشناسِن. 19وُ نَه تِنا یُو، بَلکَم وِّ وَ طرفِ کلیسایَل انتخاب وابییِه تا مِنِه ای کارِ خیر که سی جلالِ خداوند وِ نشون دایَنِ خیرخواهیمونِه، هُمسفر ایما بو. 20ایما حَواسِمون هِسی که مِنِه ای خذمتِ جَم کِردَنِ پیشکِشَلی که وَ تَهِ دِل وَ وسیلۀ ایما ادارَه ایابو، کسی ایرادی وَمون نَگِرِه. 21سییِکِه تلاش ایکِنیم که نَه تِنا طِی خداوند، بلکم طِی مردم هَم اوچیئی که خوبِه بِکِنیم.
22وِ بِی اونگَل، کَکامونَه هَم بِسی ایکِنیم که چَندین دَفَه امتحانِش کِردیمِه وِ فَمِسیمِه که مِنِه خیلی چییَل شوق دارِه، امّا ایسِه وَ خاطرِ اِطمینونی که وَتون دارِه بیشتَرَ همیشَه شوق دارِه. 23درموردِ تیتوس بایِس بِگُم که، مِنِه خذمت وَ ایشا شریک وِ هُمکارِ مِنِه، وِ درموردِ کَکایَلِمون هَم بایِس بِگُم که، اونگَل قاصِدَلِ کلیسایَل وِ جلالِ مسیح یَن. 24پَ محبتِ خِتونَه وِ افتخاری که ایما وَتون داریم مِنِه حضورِ کلیسایَل وَ ای آیَمَل ثابت کِنیت.
Currently Selected:
نامۀ دِوُم وَ کِلیسِی قُرَنتُس 8: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
