نامۀ دِوُم وَ کِلیسِی قُرَنتُس 7
7
1ای اولادَلُم، وَ وُچِه که ایما ای وعدِهیَلَه داریم، بییِیت خِمونَه وَ هر ناپاکیِ جسم وُ روح پاک کِنیم وِ بِی ترسِ وَ خدا، مقدس بییَنَه وَ کمال بِرَسونیم.
شایَمونیِ پولُس
2ایما نَه مِنِه دِلِتون جا بِئیت. وَ حقِ کسی بَدی نَکِردیمِه، کسی نَه خراب نَکِردیمِه، وَ کسی سواستفادَه نَکِردیمِه. 3مِ یِنَه نیگُم که محکومِتون کِنُم. سییِکِه نَهاتَر وَتون گُتُم که مِنِه دل ایما جا داریت، تا بِی یَک بِمیریم وِ بِی یَک زِندِیی کِنیم. 4مِ بِی دلِ جرأت باتون گَپ ایزَنُم، وَتون یِکِلی ایبالُم. مَهلی دلگرمُم، وِ بِی تَمومِ تنگییَلُم، پُرتاپِرُم وَ شایی.
5سییِکِه حتی موقِی که رَسیئیم وَ مقدونیَه، یِهدَقَه آرامش نَیاشتیم، بلکم وَ هرلَت مِنِه عذاب بیئیم - وَ صَرا جَرِمِرافَه داشتیم، وِ مِنِه دِلِمون تَرس. 6امّا او خدایی که وَ آیَمَلِ پَکَر دلگرمی اییِه، بِی اومَیَنِ تیتوس ایما نَه دلگرم کِه. 7وِ نَه تِنا بِی اومَیَنِ وُّ، بلکم وَ او دلگرمی که وَتون جُسَه بی، وختی وَ شوقِ ایشا، وِ غِصَتون وِ غیرتی که ایشا سی مِ داریت وَم گُت، مِ بیشتَر شایَمون وابییُم.
8سییِکِه حتی اَر بِی نامۀ خُوم غَم وَبارِتون کِردُم، وَ کِردِۀ خُوم نَه پشیمونُم. بِی یِکِه تا حدی پشیمون بییُم - سییِکِه ایبینُم که او نامَه، هرچَن مِدَتی کوتا، ایشا نَه غَم وَبار کِه - 9ایسِه شایَمونُم، نَه سییِکِه غَم وَبار وابیئیت، بلکم سییِکِه غَمِتون باعثِ توبۀ ایشا وابی. سییِکِه غَمِ ایشا سی خدا بی، تا هیچ ضَرَری وَ طرفِ ایما وَتون نَرَسِه. 10سییِکِه غَمی که سی خدا بو، باعثِ توبَه ایابو، که آخِرِسَر باعثِ نجات ایابو وِ پشیمونی نَیارِه. امّا غَمی که سی دنیایَه، آخِرِسَر مَرگ وَ بار ایارِه. 11سییِکِه بِوینیت ای غَمی که سی خدایَه چه شوقی مِنِتون وَ بار آوُردِه، اَلبَت هَمی شوقی که نِشون بِئیت نَه تَخصیرکاریت، چه تَش گِرُتَن، چِه تَرس، چه حسرت، چِه غیرت، چِه ادب کِردَن! وَ هر لَحاظ ثابت کِردیتِه وَ ای بابَت بی گِنایِیت. 12پَ بِی یِکِه مِ سیتون نوشتُم، وَ خاطرِ او کسی نَبییِه که بَدی کِردِه وِ یا وَش بَدی وابییِه، بلکم سی یِه بی که مِنِه حضورِ خدا غیرَتِ ایشا سی ایما، دیار وابو. 13پَ ایما دِلگَرمیم.
غیرَ دلگرمیِ خِمون، ایما وَ شاییِ تیتوس بیشتَر شایَمون وابیئیم، سییِکِه تَمومِ ایشا جونِشَه تازَه کِردَه بیئیت. 14سییِکِه هَرچَن مِ طِیش وَ هر بابت وَ ایشا بالییُم شَرمَندَه نَوابییُم، بلکم هَموطو که هر چیئی وَتون گُتیم دِرُس بی، ثابت وابی که طِی تیتوس هَم، وَجا وَتون بالییِمِه. 15وِ هَردَفَه که تیتوس اطاعتِ تَمومِ ایشا نَه وَ یای ایارِه، که چطو بِی ترسِ لَرز وِّ نَه قبول کِردیت، بیشتَر وَتون دل اییِه. 16شایَمونُم، سییِکِه وَتون سخت خاطِرجَمُم.
Currently Selected:
نامۀ دِوُم وَ کِلیسِی قُرَنتُس 7: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
