نامۀ دِوُم وَ کِلیسِی قُرَنتُس 6
6
1پَ وَ وُچِه که هُمکارَلِ خدایِیم، وَتون تمنا ایکِنیم که فیضِ خدا نَه بیفِیدَه وَ دَس نَیاریت. 2سییِکِه خدا مِنِه کتابِ اشعیای پیغمبر ایگُ:
«مِنِه زمونِ لطفِ خُوم جوابِتَه دام
وِ مِنِه روزِ نجات، کِمَکَت کِردُم.»
ایسو، ایسِه زمونِ لطفِ خدایَه، ایسو، ایسِه روزِ نجاتِه.
سختییَلِ پولُس
3ایما هیچ بردی وَرِ رَه کسی نینیم، نَکنِه سی خذمتِمون سَراکو بییِن، 4بلکم مِنِه هر کاری که ایکِنیم نِشون ایئیم که خادِمَلِ خدایِیم: بِی طاقتِ زیاد مِنِه تنگییَل، سختییَل، بَلایَل، 5موقِی شلاقَل، زِندانَل، بَلبَشویَل، جورَل، مِنِه بیخُویی، مِنِه گُسنهای؛ 6بِی پاکی، بِی شناخت، بِی صبر، بِی مِربونی، بِی روحالقدس، بِی محبتِ بیریا، 7بِی راسگویی، بِی قدرتِ خدا، بِی اسلحۀ صالحی وَ دَسِ راس وُ چپ؛ 8مِنِه عزّت وُ خواری، بَدنومی وُ خُوشنومی. بامون مِی حُقَهبازَل تا ایابو، وا ای حال هَنی هَم حقیقتَه ایگیم؛ 9بامون مِی بینومِ نِشونَل تا ایابو، وا ای حال هَنی هَم معروفیم؛ بامون مِی آیَمَلِ دَر حالِ مرگ تا ایابو، هَنی هَم زِندَهیِیم؛ بامون مِی آیَمَلِ مجازات وابییَه تا ایابو، وا ای حال هَنی هَم کشتَه نَوابیئیمِه؛ 10بامون مِی غَم وَبارَل تا ایابو، وا ای حال هَمیشَه شایَمونیم؛ بامون مِی فقیرَل تا ایابو، وا ای حال خیلییَلَه دارا ایکِنیم؛ بامون مِی کَسلی که چیئی نَیارِن تا ایابو، وا ای حال صاحابِ هَمَه چی یِیم.
11ای مردمِ قُرنتُش، ایما بیپَردَه باتون گَپ زِیم، دِلِمونَه سیتون واز کِردیم. 12ایما محبتِ خِمونَه وَتون دریغ نَکِردیم. بلکَم یِه ایشایِیت که محبتِ خِتونَه وَمون دریغ کِردیتِه. 13وَ جاش باتون مِی اولادَلُم گَپ ایزَنُم؛ ایشا هَم دِلِتونَه سیمون واز کِنیت.
معبدِ خِدِی زِندَه
14نَرِیت زِرِ جیِ بیایمونَل، سییِکِه صالحی بِی شرارت چه پیوندی دارِه؟ یا نور بِی تاریکی چه رفاقتی دارِه؟ 15مسیح بِی بِلیعال یعنی شِیطون چه توافقی دارِه؟ یا مؤمن بِی کافِر چه شراکَتی دارِه؟ 16معبدِ خدا بِی بُتَل چه سازِشی دارِه؟ سییِکِه ایما معبدِ خِدِی زِندَهیِیم. هَموطو که خدا مِنِه تورات وِ کتابِ پیغمبرَل گُت:
«مابینِ اونگَل منزل ایکِنُم
وِ مِلاشون رَه ایرَم،
وِ مِ خِدِی اونگَل ایابوم
وِ اونگَل قومِ مِ ایابون.»
17پَ خداوند مِنِه کتابِ پیغمبرَل ایگُ:
«وَ مِلاشون بییِیت وَدَر وُ وَشون جیا وابِیت.
وَ هیچ چیِ نجسی دَس مَزَنیت
اوسِه مِ ایشا نَه وَ گرمی قبول ایکِنُم.»
18«وِ مِ ایابوم بُوتون
وِ ایشا ایابِیت کُرَل وِ دُویَرَلُم،
خداوندِ قادرِ مطلق یِنَه ایگُ.»
Currently Selected:
نامۀ دِوُم وَ کِلیسِی قُرَنتُس 6: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
