نامۀ دِوُم وَ کِلیسِی قُرَنتُس 12
12
خارِ جسمِ پولُس
1مِ بایِس هَمیطو وَ خُوم بِبالُم؛ هَرچَن سودی نَیارِه، مِ هَمیطو وَ گُتَنِ رؤیایَل وِ مکاشفهیَلی که خداوند دایِه ادامَه اییُم. 2یکی نَه ایشناسُم که مِنِه مسیح یَه، که چاردَه سال نَهاتَر بُردَه وابی وَ آسمونِ سِوم. نُونُم بِی بَیَن رَت یا جیا وَ بَیَن، خدا دونِه. 3مِ دونُم که بُردَه وابی بالا وَ بهشت - بِی بَیَن یا جیا وَ بَیَن نُونُم، خدا دونِه - 4وُ وِّ چییَلی اِشنُفت که نیابو بِگیشون، که آیَم نیتَرِه وَ زُوونِش بیارِه. 5مِ وَ ای آیَم ایبالُم. امّا درموردِ خُوم، غیرَ ضَعفَلُم وَ چیئی نیبالُم. 6اَر بِخوام وَ خُوم بِبالُم، نَه نَفَمُم، سییِکِه حقیقتَه ایگُم. امّا ای کارَ نیکِنُم، نَکِنِه کسی گَمون کِنِه مِ گَپوتَر وَ اوچیئی یَم که مِنُم ایبینِه وُ وَ مِ ایشنِفِه.
7اوسِه سییِکِه گَپوییِ بیحَدِحسابِ ای مکاشفهیَل غِدُم نَکِنِه، خاری مِنِه بَیَنُم وَم دایَه وابی، قاصدی وَ طرفِ شیطون، تا عذابُم بییِه وِ نَلِه غُد وابوم. 8سه دَفَه وَ خداوند التماس کِردُم که وِه نَه وَم وَگِرِه، 9امّا خداوند وَم گُت: «فیضِ مِ سی تِ بَسِه، سییِکِه قدرتِ مو مِنِه ضعف کامل ایابو.» پَ بِی شاییِ بیشتری وَ ضَعفَلُم ایبالُم تا قدرتِ مسیح بیایِه وَ ریم. 10پَ، وَ خاطرِ مسیح، مِنِه ضَعفَل، دِشمونَل، تنگییَل، جفایَل وِ بلایَل، راضی یَم، سییِکِه وختی ضعیفُم، اوسِنِه که قَوی یَم.
هولوهراسِ پولُس سی کِلیسِی قُرَنتُس
11مِ نَفَم وابییِمِه! ایشا مجبورُم کِردیت. سییِکِه ایبایِس وَم تعریف ایکِردیت، سییِکِه هَرچَن هیچُم، امّا وَ او «رسولَلِ گَپو» چیئی کم نَیارُم. 12نِشونهیَلِ یِه رسولِ واقعی بِی نهایتِ صبوری، مابینِ ایشا اَنجوم وابی، بِی نِشونهیَل وِ چییَلِ عجیب وِ کارَلِ گَپو. 13سییِکِه مِنِه چه چیئی کمتر وَ باقیِ کلیسایَل وَتون لطف وابییِه، غیرَ یِکِه وَتَه باری وَ کولِتون نَنَهامِه؟ ای اشتباهِ مِنَه بُویَخشیت!
14ایسِه آمادَه یَم سی دَفۀ سوم بیام طِیتون، وِ باری نینُم وَ کولِتون. سییِکِه مالِتونَه نیخوام، بلکم خِتونَه ایخوام. سییِکِه نَه اولادَلِن که بایِس سی دِیبُوشون ذخیرَه کِنِن، بلکم دِیبُو سی اولادَلِشون ذخیرَه ایکِنِن. 15مِ بِی دلوُجون سی جونِ ایشا خرج ایکِنُم وِ جونِمَه هَم اییُم. اَر مِ ایشا نَه بیشتر دوس دارُم، مَه بایِس مِنَه کمتر دوس داشتَه بِیت؟
16امّا بِی یِکِه قبول داریت باری وَ کولِتون نَنَهامِه، لابُد ایگیت حُقَهباز بییِمِه، وِ بِی حُقَهبازی ایشا نَه وَ دَس آوُردِمِه. 17مَه وَ واسطۀ اونگَلی که بِسی کِردُم طِیتون، وَتون نَفعی بُردُم؟ 18مِ تیتوسَ وادار کِردُم که بیا طِیتون وِ کَکامونَه هَم باش بِسی کِردُم. مَه تیتوس وَتون نفعی بُرد؟ مَه ایما وَ یِه روح وِ یِه رَه رفتار نَکِردیم؟
19مَه تا ایسِه گَمون ایکِردیت که تلاش ایکِنیم در برابرِ ایشا وَ خِمون دفاع کِنیم؟ ایما مِنِه حضورِ خدا وِ مِی کَسَلی گَپ ایزَنیم که مِنِه مسیح یَن، وِ هر چه ایکِنیم، ای عَزیزَل، سی تقویتِ ایمونِ ایشایَه. 20سییِکِه زَلَم ایرَه که بیام طِیتون وِ ایشا نَه اوطوری که ایخوام، نبینُم، وِ ایشا هَم مِنَه طوری که ایخِیت، نبینیت. زَلَم ایرَه مابینِ ایشا جَرِدعوا، حَسودی، خِشم، دشمنی، بُهتون، غیبت، غِدی وِ هَرکی هَرکی بو. 21مِ زَلَم ایرَه که وختی اُمبِلا بیام طِیتون، خدا یِه دَفدَه مِنَه مِنِه حضورِ ایشا کوچِکنظم کِنِه وِ مِ مجبور بوم وَ خاطرِ یِهپارهای که نَهاتَر گِنا کِردِنِه وُ وَ ناپاکی، بیعفتی وِ عَرَقخَریِ خِشون توبَه نَکِردِنِه، غَم وَبار وابوم.
Currently Selected:
نامۀ دِوُم وَ کِلیسِی قُرَنتُس 12: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
