نامۀ دِوُم وَ کِلیسِی قُرَنتُس 11
11
پولُس وِ رسولَلِ وَدِرو
1کاش ای یِچِی احمق بییَنِ مِنَه تحمل کِنیت، مِنَه تحمل کِنیت! 2سییِکِه مِ وَ ریتون غیرت دارُم وِ ای غیرَت وَ طرفِ خدا یَه، سییِکِه ایشا نَه نومزِی یِه میرَه کِردُم، تا مِی ریبَسۀ پاکی بییِمِتون وَ مسیح. 3امّا زَلَم ایرَه هَموطو که حوا گولِ حیلۀ مارَ خَه، فکرِ ایشا وَ رَه وِل وابو وِ نَتَریت خالص وِ ریراس سَرسپردۀ مسیح بِیت. 4سییِکِه اَر کسی بیا طِیتون وِ عیسِی دییَهای غیرَ وِه که ایما وَتون اعلام کِردیم، اعلام کِنِه، یا اَر روحی غیرَ او روحالقدسی که گِرُتیت، یا پِیومی غیرَ او پِیومِ انجیلی که قبول کِردیت وَتون بییِه، ایشا حاضریت وَ راحَتی تحملش کِنیت. 5وَراسی، مِ گَمون نیکِنُم وَ او"رسولَلِ گَپو" چیئی کم داشتَه بوم. 6حتی اَر مِنِه گَپ زَیَن سَررشتَه نَیاشتَه بوم، مِنِه معرفت چیئی کم نَیارُم؛ وَراسی، ایما یِنَه کامل وُ وَ هَر بابت سیتون ثابت کِردیمِه.
7خِمَه خوار کِردُم تا ایشا سَرفَراز وابِیت، سییِکِه مَه گِنا کِردُم که پِیومِ انجیلِ خدا نَه وَتون مُفت اعلام کِردُم؟ 8مِ کلیسایَلِ دَ نَه غارت کِردُم وَشون کِمَکِ مالی گِرُتُم تا ایشا نَه خذمت کِنُم. 9وِ موقِی که بِی ایشا بییُم وِ متاج بییُم، باری نَنَهام وَ کول کسی، سییِکِه کَکایَلی که وَ ولاتِ مقدونیَه اومَن اِتیاجَلِمَه آوُردِن. وِ مِ هیچ باری سرِ کولِتون نَبییِمِه وِ نیابوم. 10قسم وَ راستیِ مسیح که مِنِه وجودِمِه، هیشکَه مِنِه تَمومِ منطقۀ اَخائیَه، ای افتخارَ وَم نیسونِه. 11وِ سیچِه؟ مَه سییِکِه دوسِتون نَیارُم؟ خدا دونِه که دوسِتون دارُم! 12وِ ای کارِ خِمَه ادامَه اییُم، تا مِجال نَیُم وَ اونگَلی که ایخوان اِدعا کِنِن هَمیطو که ایما خذمت ایکِنیم، خذمت ایکِنِن.
13سییِکِه ایطو آیَمَلی، رسولَلِ وَدِرو وِ خادِمَلی حُقَهبازِن که خِشونَه وَ شکلِ رسولَلِ مسیح ایدَرارِن. 14وِ یِه نَه عجیبِه، سییِکِه شیطون هَم خِشَه وَ شکلِ یِه فرشتۀ نور ایدَرارِه؛ 15پَ تعجبی نَیارِه که خادِمَلِش هَم خِشونَه وَ شکلِ خادِمَلِ صالحی دَرارِن. عاقبت، اینگَل مجازاتی که حَقِشونِه ایگِرِن.
عذابَلِ پولُس وَ عنوانِ یِه رسول
16اُمبِلا ایگُم: هیشکَه مِنَه احمق فرض نَکِنِه. امّا حتی اَر ای کارَ ایکِنیت، لااَقَل مِنَه مِی آیَمِ احمقی قبول کِنیت، تا مِ هَم یِچِی افتخار کِنُم. 17اوچیئی که بِی اِطمینون وَ افتخارِ خِم ایگُم، نَه وَ طرفِ خداوندِه، بلکم وَ ری نَفَمی یَه. 18وَ وُچه که خیلییَل وَ خاطرِ چییَلِ ای دنیا وَ خِشون ایبالِن، مِ هَم وَ خِم ایبالُم. 19سییِکِه ایشا، نَفَمَلَه بِی کمالِ میل تحمل ایکِنیت، اِنگار خِتون مَهلی عاقِلیت! 20سییِکِه اَر یکی ایشا نَه بندۀ خُوش کِنِه، یا غوتِتون بییِه، یا وَتون سوءاستفادَه کِنِه، یا خِشَه وَتون بالاتَر بِیونِه، یا تَلَنگوش وَتون بِزَنِه، تحمل ایکِنیت. 21بِی شَرمَندِهای بایِس بِگُم، ایما سی ای کار مَهلی ضعیف بیئیمِه!
امّا اَر کسی هنی زَلَه ایکِنِه وَ چیئی بِبالِه - اُمبِلا هَم مِی یِه احمق گَپ ایزَنُم - مِ هَم زَلَه ایکِنُم وَش بِبالُم. 22اونگَل عبرانی یَن؟ مِ هَم هِسُم! اونگَل اسرائیلی یَن؟ مِ هَم هِسُم! اونگَل وَ نسلِ ابراهیمِن؟ مِ هَم هِسُم! 23اونگَل خادِمِ مسیح یَن؟ مِ وَشون بِختَرُم! - مِی کَلویَل گَپ ایزَنُم - وَ هَمَه سختتَر کار کِردِمِه، مَهلی بیشتَر اُفتامِه وَ زندان، بیشتَرَ هَمَه شلاق خَردِمِه، بیشترِ موقعیَل نِزیک بییِه بِمیرُم. 24پَنج دَفَه وَ یهودییَل، سیونُه ضربَه شلاق خَردُم. 25سه دَفَه بِی چو زَنُم، یِه دَفَه سنگسار وابییُم، سه دَفَه کِشتیم غرق وابی، یِه شُو وِ یِه رو مِنِه اُو دریا بییِمِه. 26مِنِه سفرَلِ پَسِ سَرِ یَک، مِنِه خطر رویَل، خطرِ رازَنَل؛ خطر وَ طرفِ قومِ خُوم، خطر وَ طرفِ غیرِیَهودییَل؛ خطر مِنِه شهر، خطر مِنِه بیابون، خطر مِنِه دریا؛ خطر وَ طرفِ کَکایَلِ وَدِرو؛ 27مِنِه سختی وُ عذاب، بیخُویییَلِ زیاد؛ مِنِه گُسنِهای وِ تشنهای، بیشترِ موقِعیَل بیغذایی، مِنِه سرما لخت وُ پَتی بییِمِه. 28وِ غیرَ تَمومِ اینگَل، هولوهراس سی تَمومِ کلیسایَل، باری یَه که هررو وَ کولِمِه. 29کیَه که ضعیف وابو وِ مِ ضعیف نَوابوم؟ کیَه که وَ گِل بِخَرِه وِ مِ سیش نَسوزُم؟
30اَر ایبایِس بِبالُم، وَ چییَلی ایبالُم که ضعفِ مِنَه نشون اییِه. 31خدا وِ بُو عیسی خداوند، وِّ که تا ابد مبارکِه، دونِه که دِرو نیکِنُم. 32مِنِه شهرِ دمشق، حاکمِ دَس نِشُندۀ آرِتاسِ پادشاه، ناتورَلی نَها وَ شهرِ دمشق تا مِنَه بِگِرِن. 33امّا مِنَه نَهان مِنِه سَلهای، وَ پنجرهای مِنِه دیوارِ شهر دان دومِن وِ ایطو وَ چَنگِش دَرَتُم.
Currently Selected:
نامۀ دِوُم وَ کِلیسِی قُرَنتُس 11: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
