نامۀ دِوُم وَ کِلیسِی قُرَنتُس 1
1
1وَ طرفِ پولُس که وَ خواسِ خدا رسولِ عیسی مسیح یَه، وِ کَکامون تیموتائوس،
وَ کلیسِی خدا مِنِه قُرَنتُس، وِ تَمومِ ایموندارَلِ وَ مسیح مِنِه سرتاسرِ ولاتِ اَخائیَه:
2فیض وُ سلامتی وَ طرفِ بُو ایما خدا وِ خداوند عیسی مسیح، بِی ایشا بو!
خِدِی تَمومِ دلگرمییَل
3متبارک بو خدا وِ بُو خداوندِمون عیسی مسیح، که بُو رَحمَتَل وِ خِدِی تَمومِ دلگرمییَله؛ 4که مِنِه تَمومِ تنگییَل وَمون دلگرمی اییِه تا ایما هَم بِتَریم بِی او دلگرمی که وَش جُسیمِه، اونگَلی نَه که مِنِه عذابِن، دلگرم کِنیم. 5سییِکِه هَموطو که وَ عذابَلِ مسیح وَ فراوونی بَهر ایبَریم، وَ واسطۀ مسیح وَ دلگرمیِ فراوون سَرریز ایابِیم. 6اَر مِنِه تنگی یِیم، وَ خاطرِ دلگرمی وِ نجاتِ ایشانِه؛ وِ اَر دلگَرمیم، وِ هَم سی دلگرمیِ ایشانِه، وِ یِه وَ کار ایا اوسِه که ایشا هَم مِنِه هَمو عذابَلی که ایما ایکَشیم، بِی حوصلَه طاقت ایاریت. 7اِمید ایما درموردِ ایشا پاوَرجایَه، سییِکِه دونیم هَموطو که مِنِه عذابَلِ ایما بَهر بُردیت، مِنِه دلگرمیِ ایما هَم بَهر ایبَریت.
8سییِکِه ای کَکایَل، ایما نیخِیم وَ تنگییَلی که مِنِه منطقۀ آسیا وَ سَرِمون اومَه، بیخَوَر بِیت. سییِکِه طوری طاقتِمونَه طاق کِه، که اِمیدی وَ زندَه مُندَن نَیاشتیم. 9وَراسی، گَمون ایکِردیم حکمِ مَرگمونَه دانِه. امّا اینگَل هَمَش وابی تا نَه وَ خِمون، بلکم وَ خِدِیی توکل کِنیم که مُردِهیَلَه زِندَه ایکِنِه. 10خدا ایما نَه وَ ایطو خطرِ مرگوَباری نجات دا وِ نجات اییِه. اِمیدِمون وَ وِّنِه، که اُمبِلا ایما نَه نجات اییِه، 11ایشا هَم بایِس بِی دِعا کِمَکِمون کِنیت. تا خیلییَل، وَ خاطرِ ایما شکر کِنِن، وَ خاطر او برکتی که مِنِه جوابِ دِعایَلِ خیلییَل وَمون دایِه وابی.
عوض وابییَنِ برنامۀ سفر پولُس
12سییِکِه افتخارِ ایما، گواییِ وجدانِمونِه وَ یِکِه رفتارمون مِنِه دنیا وِ مخصوصاً نسوت وَ ایشا، بِی سادهای وِ روراسیِ خدایی بییِه. نَه بِی حکمتِ بشری، بلکم بنا وَ فیضِ خدا رفتار کِردیمِه. 13سییِکِه ایما چیئی غیرَ یِکِه ایخونیت وِ ایفَمیت سیتون نینِویسیم وِ مِ اِمید دارُم خوب بِفَمیت- 14هَموطو که یِچِی ایما نَه فَمِسیت، تا مِنِه روزِ خداوندِمون عیسی، هَموطو که ایما وَ ایشا ایبالیم، ایشا هَم وَ ایما بِبالیت.
15سییِکِه وَ یِه خاطِرجَم بییُم، خواسُم اَوَل بیام طِی ایشا تا سی دفۀ دِوُم فیضَه تجربه کِنیت. 16ایخواسُم سَرِ رَم وَ وِلاتِ مقدونیَه بیام بِوینِمِتون وُ وَ مقدونیَه وَرگَردُم طِیتون وِ ایشا مِنَه رایی کِنیت وَ وِلاتِ یهودیَه. 17مَه موقِی که ایخواسُم ای کارَ کِنُم، دو وَ شَک بییُم؟ وِ یا یِکِه مِی آیَمَلِ ای دنیایَم، طوری که گَپُم هَم «ها» وِ هَم «نَه» یَه؟
18قَسم وَ خدایی که وَفادارِه، گَپِ ایما بِی ایشا «ها» وِ«نَه» نَبییِه. 19سییِکِه کِرِ خدا، عیسی مسیح، که مو وِ سیلاس وِ تیموتائوس وِّ نَه مابینِتون اعلام کِردیم، «ها» وِ «نَه» نَبی، بلکم مِنِه وُّ هَمیشَه «ها» یَه. 20سییِکِه تَمومِ وعدِهیَلِ خدا مِنِه وُّ «ها» یَه. سییِکِه وَ وسیلۀ وِّنِه که ایما وَ خدا سی جلالِش «آمین» ایگِیم. 21وِ یِه خدایَه که ایما نَه بِی ایشا مِنِه مسیح پاوَرجا ایکِنِه. وِّ ایما نَه مَسح کِردِه 22وُ وِّ مُهرِ خِشَه وَمون زَیِه که این وِّنیم وِ روحِ خِشَه مِی بَیونَه نَهایِه مِنِه دِلِمون.
23خدا نَه شاهد ایگِرُم که تِنا سییِکِه ناراحَتِتون نَکِنُم، نَوَرگَشتُم وَ قُرَنتُس. 24نَه یِکِه وَ ری ایمونِتون سَروَری کِنیم، بلکم بِی ایشا، سی شاییتون تلاش کِنیم، سییِکِه ایشا مِنِه ایمونِتون پاوَرجا بِیت.
Currently Selected:
نامۀ دِوُم وَ کِلیسِی قُرَنتُس 1: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
