نامۀ اَوَل وَ کِلیسِی قُرَنتُس 16
16
پیشکِشَل سی ایموندارَلِ وَ مسیح
1ایسو در موردِ جَم کِردَنِ پیشکِشَل سی ایموندارَلِ وَ مسیح: ایشا هَم اوچیئی نَه که وَ کلیسایَلِ غَلاطیَه گُتِمِه، اَنجوم بِئیت. 2مِنِه روزِ اَوَلِ هر هفتَه، هر کویکی وَ ایشا بایِس چیئی بِنِه اولَت وِ طِی خُوش نِگَه کِنِه، تا موقِی اومَیَنُم طِی ایشا، اِتیاجی وَ جَم کِردَنِ پیشکِشَل نَبو. 3وختی اومَم، معرفینامهیَلی اییُم وَ اونگَلی که وَشون اِطمینون داریت وِ بِی پیشکِشَلِتون بِسی ایکِنُم وَ اورشلیم. 4اَر صَلا وَ یِه بو که خُوم هَم بِرَم، وَ ای صورت اونگَل بام ایان.
نَخشهیَلی سی سَفر
5بعدَ رَی وابییَن وَ شهرِ مقدونیَه ایام طِیتون، سییِکِه ایخوام وَ مقدونیَه رَی وابوم. 6وِ شاید وِیسُم طِیتون، یا حتی زِمِسونَه باتون سَر کِنُم، تا مِنِه سفَرُم وَ هر جا که ایرَم، کِمَکُم کِنیت. 7سییِکِه نیخوام ایسِه بیام وَ دییَنِتون وِ تِنا یِچِی وِیسُم طِیتون؛ اِمید دارُم، اَر خداوند بِخوا، مِدَتی نَه باتون وَ سَر بُویَرُم. 8امّا تا عیدِ پنتیکاست مِنِه اَفِسُس ایوِیسُم 9سییِکِه سی خذمت دَرِ گَپویی وَ ریم واز وابییِه که مَهلی مفیدِه، وِ دشمَنَل هَم یِکِلی یَن.
10وَختی تیموتائوس اومَه، حواستون بو که طِیتون واهِمَه نَیاشتَه بو. سییِکِه وِّ هَم مِی مو، مشغولِ کارِ خداوندِه؛ 11پَ کسی وِّ نَه دَسِ کَم نَگِرِه. وِّ نَه وَ سلامتی راییِ سفر کِنیت تا وَرگَردِه طِیم؛ سییِکِه مِ وِ کَکایَل بَندیرِشیم.
12ایسو، درموردِ کَکامون آپولُس، وَش التماس دَرخواس کِردُم که بِی باقی کَکایَل بیا طِیتون، امّا وَتَه نَخواس که ایسِه بیا. موقِی که وَختِشَه داشت، ایایِه.
13حَواسِتون بو؛ مِنِه ایمون پاوَرجا وِیسیت؛ مِرد بِیت وِ زوردار وابِیت. 14تَمومِ کارَلِتون بِی محبت بو.
15دونیت که اَهلِاَیالِ اِستیفاناس اَوَلین کَسَلی بییِن که مِنِه وِلاتِ اَخائیَه ایمون آوُردِن، وِ اونگَل خِشونَه وقفِ خذمت وَ ایموندارَلِ وَ مسیح کِردِنِه. ایسو، ای کَکایَل، وَتون تَمنا دارُم 16مطیعِ ایطو کَسَلی بِیت وِ مطیعِ هر کسِ دَ که مِنِه ای خذمت هُمکاری ایکِنِه وِ زحمت ایکَشِه. 17وَ اومَیَنِ اِستیفاناس، فورتوناتوس وِ اَخائیکوس شایَمونُم، سییِکِه جِی خالیتونَه پُر کِردِنِه. 18سییِکِه اونگَل روحِ مِنَه وِ روحِ ایشا نَه تازَه کِردِن. ایطو کَسَلی نَه بِشناسیت.
سلامَل
19کلیسایَلِ آسیا وَتون سلام ایرَسونِن. آکیلا وِ پریسکا وِ کلیسایی که مِنِه حونَشون جَم ایابون، وَ ایشا مِنِه خداوند وَ گرمی سلام ایرَسونِن. 20تَمومِ کَکایَل وَتون سلام ایرَسونِن. بِی بوسِ مقدّس وَ یَک سلام کِنیت.
21مو، پولُس، وَ خطِ خُوم ای سلامَه سیتون اینِویسُم.
22لعنت وَ وِه که خداوندَ دوس نیارِه. خداوندِ ایما، بیو!
23فیضِ خداوند عیسی بِی ایشا بو.
24محبتِ مو مِنِه مسیح عیسی بِی تَمومِ ایشا بو. آمین.
Currently Selected:
نامۀ اَوَل وَ کِلیسِی قُرَنتُس 16: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
