نامۀ اَوَل وَ تیموتائوس 1
1
1وَ طرفِ پولُس که وَ حکمِ نجات دهندَهمون خدا وِ امیدِمون مسیح عیسی، رسولِ مسیح عیسی یَه؛
2وَ تیموتائوس، اولادِ حقیقیم مِنِه ایمون:
فیض وِ رحمت وِ صلحوُسلامتی وَ طرفِ خِدِی بُو وِ خداوندمون مسیح عیسی وَ تِ بو.
هشتار دَرموردِ معلِمَلِ وَدِرو
3موقِی که ایخواسُم بِرَم وَ مَقدونیَه وَ تِ اصرار کِردُم، وِیسی مِنِه اَفِسُس تا وَ یِهپارهای دستور بِیی که هیچ تَعلیمِ جورواجوری نَیِن 4وِ خِشونَه بِی مَتَلَلِ خیالی وِ شجَرَهنامهیَلی که تَه نَیارِن سَرگرم نَکِنِن، ای چییَل وَ جِی رواجِ کارِ خدا که وَ رَه ایمونِه، باعثِ جَرِبَحثِ بیخودی ایابو که ثمری نیارِه. 5هدفِ ایما وَ ای حکم، محبتِه، که وَ دلی پاک، وجدانی خوب وِ ایمونی بیریا ایوَریسِه. 6یِهپارهای وَ ای چییَل ری وَرگَردُندِنِه، وِ مِنِه جَرِبَحثَلِ بیخودی رَشونَه گُم کِردِنِه، 7ایخوان معلِمَلِ شریعت بون، بییِکِه بِیونِن چه ایگُن یا وَ چه چیئی بِی اِطمینون گَپ ایزَنِن.
8ایسو ایما دونیم که شریعت خوبه، اَر کسی وِه نَه وَ دِرِسی وَ کار بُویَرِه، 9وِ دونِسَه بو که شریعت نَه سی صالِحَل، بَلکَم سی اونگَلی یَه که نافِرمون وِ تورِن، سی بیدینَل وِ گِناکارَل، سی اونگَل که نَه مقدّسِن و کُفر ایگُن؛ سی اونگَل که دِیبُوشونَه ایکِشِن؛ سی قاتِلَل، 10سی زِناکارَل وِ لواط گَرَل؛ سی اونگَل که معاملَهگرِ برده یَن، دِروکِنَل، اونگَلی که قَسَمِ دِرو ایخَرِن، وِ هر چییِ دَ که وَ ضِدِ تعلیمِ دِرُس بو، 11تعلیمی که طبقِ انجیلِ جلالِ خِدِی متبارک، که وَ دَسِ مِ دایَه وابییِه.
مسیح عیسی اومَه سی نجاتِ گِناکارَل
12خداوندِمون مسیح عیسی نَه شکر ایکِنُم که وَم قُویَت دایِه، سییِکِه مِنَه وفادار دونِس وِ مِنَه وَ خذمتِ خُوش دَرآوُرد، 13بِی یِکِه نَهاتَر، کُفرگو و شکنجهگر و دشمنی زورگو بییُم. امّا وَم رحم وابی سییِکِه مِنِه بیایمونی، نایونی کِردَه بییُم. 14وِ فیضِ خداوندِمون مَهلی فَراوون وَم رِتَه وابی، بِی ایمون و محبتی که مِنِه مسیح عیسی یَه.
15ای گَپ قابلِ اِطمینون وُ وَ تَمومی وَ هر بابت قابلِ قبولِه، که مسیح عیسی اومَه وَ ای جهان تا گِناکارَلَه نجات بییِه، که مِ گَپوتَرینِشونُم. 16امّا سی هَمیو، وَ مِ رحم وابی تا عیسی مسیح صبرِ کاملِ خِشَه، وَ مِ که وَ تَمومِ گِناکارَل گَپوتَرُم، نِشون بییِه تا نمونهای بوم سی تَمومِ کَسَلی که سی حیاتِ ابدی وَش ایمون ایارِن. 17ایسو وَ او پادشاهِ تَمومِ دورهیَل، وَ وِّ که تا ابد هِسیش وِ نیابو دییِش، وِ تِنا خِدایَه، تا ابدالآباد حرمت وِ جلال بو، آمین!
18ای کِرُم، تیموتائوس، ای حُکمَه طبقِ نَبُوَتَلی که نَهاتَر دَرموردِ تِ وابی، وَ دَسِ تِ اییُم تا وَ کِمَکِ اونگَل مِنِه جنگِ خوب بِجَنگی. 19وِ بِچَسب وَ ایمون وُ وجدانی خوب. سییِکِه یِهپارهای بِی رَد کِردَنِ ای چییَل کِشتی ایمونِشون مِنِه یَک خُرد وابییِه، 20هیمِنائوس وِ اسکندر وَ ای دَسَه یَن، که اونگَلَه دام وَ دَسِ شِیطون تا یای بِگِرِن که کُفر نَگُن.
Currently Selected:
نامۀ اَوَل وَ تیموتائوس 1: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
