نامۀ اَوَل وَ کِلیسِی تسالونیکی 4
4
زندِییِ بابِدلِ خدا
1وَ آخِر، پَ ای کَکایَل، ایشا وَ ایما یای گِرُتیت که چطو باید زِندِیی کِنیت تا خدا نَه راضی کِنیت، هَموطو که ای کارَ هَم ایکِنیت. ایسِه مِنِه خداوند عیسی وَتون ایخِیم وِ تمنا ایکِنیم که دَرموردِ یِه بیشترَبیشتَر تلاش کِنیت. 2سییِکِه ایشا دونیت که وَ طرفِ خداوند عیسی، چه حُکمَلی وَتون دِیمِه.
3سییِکِه خواسِ خدا یِنِه که مقدس بِیت: خِتونَه وَ بیعفتی دیر کِنیت؛ 4تا هَر کویَکی وَ ایشا بِیونِه که چطو مِنِه مقدس بییَن وِ حُرمت، بَیَنِ خِشَه نِگَه کِنِه، 5نَه مِنِه هوسِ شهوت، مِی غیرِیهودییَلی که خدا نَه نیشناسِن؛ 6تا هیشکَه مِنِه ای کار وَ حقِ کَکِی خُوش خَطا وِ دس دِرازی نَکِنِه، سییِکِه خداوند سِزِی تَمومِ ای کارَلَه اییِه، هَموطو که ایما وَ نَهاتَر هَم وَتون گُتیم وِ سخت هشتار دِیم. 7سییِکِه خدا ایما نَه خُوندِه وَ مقدس بییَن، نَه وَ ناپاکی. 8پَ، هرکه یِنَه رَد کِنِه، نَه انسان، بَلکَم خِدِیی نَه رَد کِردِه که روحالقدسِ خِشَه وَ ایشا عطا ایکِنِه.
9ایسو دَرموردِ محبتِ کَکاگَری لازم نی کسی چیئی سیتون بنویسِه، سییِکِه ایشا خِتون وَ خدا یای گِرُتیتِه که یَکَه دوس داشتَه بِیت، 10سییِکِه وَراسی ایشا تَمومِ کَکایَلَه مِنِه سرتاسرِ مقدونیَه دوس داریت. امّا ای کَکایَل، وَتون تمنا ایکِنُم، بیشترَبیشتَر ایکارَ کِنیت،
11وِ اُرزو یِنَه داشتَه بِیت که زِندِیی آرومی داشتَه بِیت وِ سَرِتون مِنِه کارِ خِتون بو وِ بِی دَسَلِ خِتون کارِکاسبی کِنیت، هَموطو که ایما وَتون حکم کِردیم، 12تا دَر برابرِ اونگَلی که وَدَرَ کِلیسایَن وَ شایستهای قَیَم وَگُریت وِ مُتاجِ کسی نَیابِیت.
اومَیَنِ خداوند عیسی
13امّا ای کَکایَل، ایما نیخِیم وَ حالِ ایموندارَلی که مُردِنِه بیخَوَر بِیت، نَکِنِه مِی باقیِ مَردم که اِمیدی نَیارِن، عزا بِگِریت. 14سییِکِه اَر اعتقاد داریم که عیسی مُرد وِ اُمبِلا زِندَه وابی، پَ هَمیطو خدا اونگَلی نَه هَم که مِنِه عیسی مُردِنِه، بِی وِّ اییَرگَردَنِه. 15سییِکِه ایما یِنَه وَ واسطۀ کلامِ خداوند وَتون اعلام ایکِنیم: که ایما که زِندَه یِیم وِ تا اومَیَنِ خداوند وَجا ایوِیسیم، نییُفتیم نِهِی اونگَلی که مُردِنِه. 16سییِکِه خداوند، خُوش بِی دستوری که بِی صییِی بِلَندِه وِ صییِی رئیسِ فرشتهیَل وِ رِنگِ شیپورِ خدا، وَ آسمون ایایِه دومِن. وِ اَوَل، مُردِهیَلِ مِنِه مسیح، زِندَه ایابون. 17اوسِه ایما که زِندَهیِیم وُ وَجا وِیسِیمِه، بِی اونگَل مِنِه اُورَل وَ بالا وَگِرُتَه ایابِیم تا خداوندَ مِنِه هوا بِوینیم، وِ اوسِه سی همیشَه بِی خداوندیم. 18پَ بِی ای گَپَل، یَکَه دلداری بِئیت.
Currently Selected:
نامۀ اَوَل وَ کِلیسِی تسالونیکی 4: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
