نامۀ اَوَل وَ کِلیسِی تسالونیکی 3
3
1پَ وَختی که دَ طاقت نَیاشتیم، رضایت دِیم که ایما نَه مِنِه آتِن تِنا بِلِن. 2وِ ایما تیموتائوسَ که کَکِی ایما وِ هُمکارِ خدا مِنِه کارِ انجیل مسیح یَه، بِسی کِردیم طِیتون تا ایشا نَه مِنِه ایمونِتون تقویت و تشویق کِنِه، 3تا هیشکَه وَ خاطرِ ای سختییَل جُم نَخَرِه، سییِکِه ایشا خِتون دونیت که ایما سی یِه تعیین وابیئیمِه. 4سییِکِه هَموسِه که باتون بیئیم، پیشَپیش گُتیم که سختی ایکَشیم، هَمیطو که وابییِه، وِ هَمیطو که خَوَر داریت. 5سی هَمیو، سییِکِه دَ طاقت نَیاشتُم، تیموتائوسَ بِسی کِردُم تا وَ ایمونِتون باخَوَر وابوم، سییِکِه زَلَم ایرَت که وِه که وَسوَسَه ایکِنِه یعنی اِبلیس وَ طریقی ایشا نَه وَسوَسَه کِردَه بو، وِ زَحمَتَلِ ایما وَ هدر رَتَه بو.
گزارشِ تیموتائوس، دلگرم ایکِنِه
6امّا ایسِه که تیموتائوس وَ طِیتون وَرگَشتِه وِ سی ایما مُشتِلِقِ ایمون وِ محبتِ ایشا نَه آوُردِه وِ خَور دایِه که ایشا هَمیشَه وَ خوبی وَمون یای ایکِنیت وِ شوقِ دییَنِ ایما نَه داریت، هَموطو که ایما شوقِ دییَنِ ایشا نَه داریم - 7سی هَمیو، ای کَکایَل، مِنِه تَمومِ تنگییَل وِ سختییَل، وَ بابتِ ایشا وَ خاطرِ ایمونِتون دلگرم وابیمونِه. 8سییِکِه ایسِه زِندِیی ایکِنیم، اَر ایشا مِنِه خداوند پاوَرجا بِیت. 9سییِکِه وَ عوضِ تَمومِ شایی که وَ بابتِ ایشا مِنِه حضورِ خِدِی خِمون نَصیبِمون وابییِه، چطو شکر خدا نَه وَجا بیاریم؟ 10طوری که ایما شُو وِ رو بِی دلوُجون دعا ایکِنیم تا وَ نِزیک بِوینیمِتون وِ هر کَمِکَسریِ ایمونِتونَه برطرف کِنیم.
11ایسو خدا وِ بُومون خُوش وِ خداوندِمون عیسی، رَمونَه وَ طَرفِ ایشا واز کِنِه. 12وِ هَموطو که محبتِ ایما وَ ایشا زیاد ایابو، خداوند محبتِ ایشا نَه وَ یِکدو وُ وَ تَمومِ مردم زیاد وِ لوریز کِنِه. 13تا وِّ دِلِتونَه قُرص کِنِه تا اوسِه که خداوند ایما عیسی مسیح بِی تَمومِ مقَدسینِش ایایِه، مِنِه حضورِ خدا، بُو آسمونیمون، بیعیب وِ مقدس بِیت.
Currently Selected:
نامۀ اَوَل وَ کِلیسِی تسالونیکی 3: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
