نامۀ اَوَل وَ کِلیسِی تسالونیکی 2
2
خذمتِ پولس وَ کِلیسِی تسالونیکییَل
1ای کَکایَل، ایشا خِتون دونیت که اومَیَنِ ایما طِی ایشا بیفِیدَه نَبییِه، 2بَلکَم هرچَن نَهاتَر مِنِه شهرِ فیلیپی عذاب کَشیئیم وُ وَمون بیحُرمَتی کِردِن طوری که مایۀ خجالتِه، هَموطو که دونیت، امّا ایما وَ کِمَکِ خِدِی خِمون زَلَه کِردیم تا انجیلِ خدا نَه مِنِه ای بین که وَ ضِدِمون بییِن وَ ایشا اعلام کِنیم. 3سییِکِه تشویقِ ایما وَ ری خَطا یا ناپاکی یا گول زَیَن نی، 4بَلکَم هَموطو که خدا ایما نَه تأیید کِردِه تا عهدَهدارِ کارِ انجیل بِیم، پَ گَپ زَیَنِ ایما نَه سی راضی کِردَنِ آیَمِه، بَلکَم سی رضایتِ خدایی یَه که دِلِ ایما نَه امتحان ایکِنِه. 5سییِکِه ایما وَتَه بِی گَپَلی که وَ ری چاپلوسی یَه نَیومِیم، هَموطو که دونیت، وِ گَپَلِمون بونهای سی طمع نَبی - خدا خُوش شاهدِه. 6ایما وَ دینِ ستایش وَ طرفِ آیَمَل نَبیئیم، چه وَ طرفِ ایشا وِ چه وَ طرفِ بَقیَه، هَرچَن ایما مِنِه مقامِ رسولَلِ مسیح ای حقَه داشتیم که وَتون بِخِیم، 7امّا ایما مابینِ ایشا وَ نرمی رفتار کِردیم، مِی دِیی که ویردارِ بَچهیَلِ خِشِه. 8ایقَزَه دوستون داشتیم که بِی شایی حاضر بیئیم نَه تِنا انجیلِ خدا نَه باتون بَهر کِنیم، بَلکَم جونِمونَه بِنیم وَ رَتون، سییِکِه ایشا سیمون مَهلی عزیز وابییَه بیئیت. 9سییِکِه ایشا ای کَکایَل، زحمت وِ جون کَندَنِ ایما وَ یایِتونِه: که شُو وِ رو کار کِردیم تا وَختی انجیلِ خدا نَه وَتون اعلام ایکِنیم، باری وَ ری کولِ هیچ کویَکیتون نَبِیم.
10ایشا شاهِدیت وِ خدا هَم شاهدِه، که ایما بِی ایشا ایموندارَل، چطو مقدس وِ صالح وِ بیعیب رفتار کِردیم. 11سییِکِه ایشا دونیت، چِطو مِی بویی که بِی اولادَلِش رفتار ایکِنِه، 12ایما یکی یکیتونَه تشویق کِردیم، دلداری دِیم وِ سفارش کِردیم که لایقِ خدایی قَیَم وَگِریت که ایشا نَه وَ پادشایی وِ جلالِ خُوش دعوت ایکِنِه.
13وِ ایما هَم خدا نَه هَمیشَه شکر ایکِنیم که ایشا موقِی قبول کِردَنِ کلامِ خدا، او کلام که وَ ایما اِشنُفتیت، وِه نَه، نَه مِی کلامِ انسان، بَلکَم وَ عنوانِ کلامِ خدا قبول کِردیت، که وَراسی هَم هَمیطورِه؛ که مِنِه ایشا ایموندارَل کار ایکِنِه. 14سییِکِه ای کَکایَل، ایشا وَ کلیسایَلِ خدا مِنِه یهودیَه که مِنِه مسیح عیسایَن، سَرمشق گِرُتیت: سییِکِه ایشا هَم وَ هُموِلاتییَلِ خِتون، هَمو آزارَلَه دیئیت که اونگَل وَ یهودییَل دییِن، 15اونگَلی که عیسایِ خداوند وِ پیغَمبَرَلَه کُشتِن وِ ایما نَه هَم کِردِن وَدَر. اونگَل خدا نَه خُشنود نیکِنِن وِ بِی تَمومِ مردم ضدیت ایکِنِن، 16وِ نیلِن ایما بِی غیریهودییَل گَپ بِزَنیم تا نجات بِجورِن - طوری که مِی هَمیشَه پیمونۀ گِنایَلِ خِشونَه لُوریز ایکِنِن. امّا آخِرِسر غضب اومَیِه وَ ریشون.
17امّا ای کَکایَل، وَ وُچِه که مدتِ کمی وَتون جیا بیئیم، اَلبَت جسماً وِ نَه قلباً، بِی یِکِلی شوق، اُرزو دییَنِ ریتونَه داشتیم. 18سی هَمیو ایما خواسیم بییِیم طِیتون - مِ خُوم پولُس، چَن دَف خواسُم بیام - امّا شِیطون نَلِشت. 19سییِکِه اِمید و شایی و تاجِ افتخارِ ایما، مِنِه حضورِ خداوندمون عیسی موقِی اومَیَنِش چِنِه؟ مَه نَه ایشایِیت؟ 20سییِکِه ایشا جلال و شاییِ ایمایِیت.
Currently Selected:
نامۀ اَوَل وَ کِلیسِی تسالونیکی 2: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
