نامۀ اَوَلِ پِطرُس 1
1
1وَ طرفِ پطرس، رسولِ عیسی مسیح،
وَ بَرگزیدِهیَلی که مِنِه وِلاتِ پونتوس وِ غلاطیَه وِ کاپادوکیَه وِ آسیا وِ بیطینیَه مِنِه غریبی پَخشِپلایَن؛ 2وَ اونگَلی که بَنا وَ پیشدانیِ خِدِی بُو، وَ واسطۀ کارِ تقدیس کنندۀ روح، سی اطاعت وَ عیسی مسیح وِ بِی پِشِنگۀ خینِش وَ اونگَل، برگزیدَه یَن:
فیض وِ صلحوُسلامتی وَ فَراوونی وَ ایشا بو.
امیدِ زندَه
3مبارک بو خدا وِ بُو آسمونی خداوندِ ایما عیسی مسیح که وَ رحمتِ عظیمِ خُوش، ایما نَه وَ واسطۀ زِندَه وابییَنِ عیسی مسیح وَ مُردِهیَل، تولدی تازَه بَخشی، سی امیدی زِندَه، 4وِ میراثی دیر وَ تباهی وِ فساد که وَتَه نیپیسِه، سیتون مِنِه آسمون نِگَه داشتَه وابییِه؛ 5سی ایشا که وَ قدرتِ خدا وُ وَ واسطۀ ایمون، مِنِه اَمونیت، سی نجاتی که آمایَه وابییِه تا مِنِه زَمونِ آخِر ظاهر وابو؛ 6وِ مِنِه یِه مَهلی شایَمونیت، هَرچَن ایسِه بَنا وَ ضرورت، زَمونِ کَمی مِنِه امتحانَلِ جورواجور سَختی کَشیئیتِه، 7تا اصیل بییَنِ ایمونِتون مِنِه امتحان ثابت وابو وِ موقِی ظهورِ عیسی مسیح باعثِ تحسین وِ تعریف وِ احترام وابو، هَمو ایمون که مَهلی باارزشتَر وَ طِلایَه که هَرچَن وَ بِینرَتَنی یَه، وَ وسیلۀ تَش اِمتحان ایابو. 8ایشا هَرچَن وِّ نَه نَدیتِه، دوسِش داریت؛ وِ هَرچَن ایسِه وِّ نَه نیبینیت، وَش ایمون داریت وِ خوشحالی ایکِنیت بِی شایی که وَ زُوون نیا وِ پُر وَ جلالِه، 9نتیجۀ ایمونِ خِتونَه وَ دَس ایاریت که نجاتِ جونِتونِه.
10دَرموردِ ای نجات، پیغَمبَرَل وَ خوبی پُرسِبِجو ایکِردِن، پیغَمبرَلی که دَرموردِ فیضی که قرار بی این ایشا وابو، سیتون نبوت کِردِن، 11اونگَل تلاش ایکِردِن بِفَمِن، موقِی که روحِ مسیح مِنِه اونگَل، عذابَلِ مسیح وِ جلالِ بعدَ وِه نَه پیشگویی کِه، چه کسی وِ چه زَمونی نَه نِشون ایدا. 12وَشون آشکار وابی که نَه خِشون بَلکَم ایشا نَه خِذمت ایکِردِن، اوسِه که دَرموردِ چییَلی گَپ ایزَن که ایسِه دَرموردِش وَ مبَشِرَلِ انجیل ایشنِفیت، وَ اونگَل که وَ واسطۀ روحالقدس که وَ آسمون بِسی وابییِه، وَ ایشا بشارت اییِن. حتی فرشتهیَل هَم اُرزو دییَنِ ای چییَلَه دارِن.
مقدّس بِیت
13پَ فکرِتونَه سی عمل آمایَه کِنیت، وَ هوش بِیت وِ اِمیدِتون وَ تَمومی وَ ری فیضی بو که موقِی ظهورِ عیسی مسیح نَصیبِتون ایابو. 14مِی اولادَلی مطیع، هُمشکلِ هَوَسَلی نَوابِیت که مِنِه زَمونِ نایونی داشتیت. 15بَلکَم هَموطو که کسی که ایشا نَه خُوندِه، قدوسِه، ایشا هَم مِنِه تَمومِ رفتارِتون مقدّس بِیت؛ 16سییِکِه نوشتَه وابییِه: «مقدّس بِیت، سییِکِه مِ قُدّوسم.»
17اَر وِّ نَه بُو ایخونیت که هر کَسی نَه بیغرض، وَ ری کارَلِش داوری ایکِنِه، پَ زَمونِ غریبیِ خِتونَه بِی خداتَرسی سَر کِنیت، 18سییِکِه دونیت که خینبَهِی آزادیتون وَ رَیَلِ بیخودی که وَ بُویَلِتون وَ ارث بُردَه بیئیت، بِی چییَلِ وَبِین رَتَنی مِی طِلا وِ نقرَه، دایَه نَوابی، 19بَلکَم بِی خینِ باارزشِ مسیح، مِی بَرَهای بیعیب و بیلَکِه. 20وِّ نِهِی آفرینشِ جهان تعیین وابی، امّا مِنِه ای زَمونَلِ آخِر وَ خاطرِ ایشا ظاهر وابی. 21ایشا که وَ واسطۀ وُّ وَ خدا ایمون آوُردیت، وَ خدایی که وِّ نَه وَ مُردِهیَل زِندَه کِه وِ جلال بَخشی، تا ایمون وِ امیدِتون وَ خدا بو.
22ایسو که بِی اطاعت وَ حقیقت، جونِ خِتونَه طاهر کِردیتِه تا محبتِ کَکاگَریِ ریراس داشتَه بِیت، یَکَه وَ دلوُجون بِی دلی پاک محبت کِنیت. 23سییِکِه ایشا اَزنو وَ دنیا اومِیتِه، نَه وَ تیمِ وَبینرَتَنی بَلکَم وَ تیمِ وَبیننَرَتَنی، یعنی وَ وسیلۀ کلامِ زِندَه وِ پاوَرجایِ خدا. 24سییِکِه،
«تَمومیِ جسم مِی گیا یَه
وِ تَمومِ جلالِش مِی گِلِ گیا یَه؛
گیا خشک ایابو وِ گِلِش ایریزِه،
25امّا کلامِ خداوند تا ابد ایوِیسِه.»
وِ ای کلام، بشارتی یَه که وَ ایشا موعظَه وابی.
Currently Selected:
نامۀ اَوَلِ پِطرُس 1: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
