نامۀ اَوَلِ یوحنا 4
4
روحَلَه امتحان کِنیت
1ای عزیزَلُم، هر روحی نَه باوَر مَکِنیت، بلکم روحَلَه امتحان کِنیت که بِفَمیت وَ خدایَن یا نَه. سییِکِه پیغمبَرَلِ وَدِروِ زیادی مِنِه ای دنیایَن. 2روحِ خدا نَه ایطو ایشناسیم: هر روحی که اقرار ایکِنِه که عیسی مسیح مِنِه جسم اومَیِه، وَ خدایَه. 3وِ هر روحی هَم که وَ عیسی مسیح اقرار نیکِنِه، وَ خدا نی، بلکم هَمو روحِ «ضدِ مسیح» یَه که اِشنُفتیتِه ایایِه وِ هَمیسِه هَم مِنِه دنیایَه.
4ایشا، ای اولادَلِ سَوا، وَ خدایِیت وُ وَشون زور وابیتِه، سییِکِه او روحی که مِنِه ایشایَه، گَپوتَرِه وَ او روحی که مِنِه دنیایَه. 5اونگَل وَ دنیایَن سی هَمیو هَر چیئی که ایگُن وَ دنیا یَه وِ دنیا وَشون گوش اییِه. 6ایما وَ خدایِیم وِ هَرکه خدا نَه ایشناسِه، وَمون گوش اییِه؛ وِه که وَ خدا نی، وَمون گوش نییِه. روحِ راسی وِ روحِ ناراسی نَه ایطو وَ یَک تا ایکِنیم.
خدا محبتِه
7ای عزیزَلُم، یِکدو نَه محبت کِنیم، سییِکِه محبت وَ خدایَه وِ هرکه محبت ایکِنِه، وَ خدا مولود وابییِه وِ خدا نَه ایشناسِه. 8وِه که محبت نیکِنِه، خدا نَه نَشناختِه، سییِکِه خدا محبتِه. 9محبت خدا ایطو مابینِ ایما آشکار وابی که خدا تِنا کِرِ خِشَه بِسی کِه وَ دنیا، تا وَ واسطۀ وِّ زِندِیی کِنیم. 10محبت هَمیِنِه، نَه یِکِه ایما خدا نَه محبت کِردیم، بلکم وِّ ایما نَه محبت کِه وِ کِرِ خِشَه بِسی کِه تا کفّارۀ گِنایَلِمون بو. 11ای عزیزَلُم، اَر خدا ایما نَه ایطو محبت کِه، ایما هَم بایِس یِکدو نَه محبت کِنیم. 12هیشکَه وَتَه خدا نَه نَدییِه؛ امّا اَر یِکدو نَه محبت کِنیم، خدا مِنِه ایما یَه وِ محبتِش مِنِه ایما وَ کمال رَسییِه.
13وَ وِیچِه دونیم که مِنِه وِّ ایوِیسیم وُ وِّ مِنِه ایما، سییِکِه وَ روحِ خُوش وَمون دایِه. 14وِ ایما دیمونِه وِ شهادت ایئیم که بُو، کِرِ خِشَه بِسی کِردِه تا نجات دهندۀ دنیا بو. 15وِه که اقرار ایکِنِه عیسی کِرِ خدایَه، خدا مِنِه وِّنِه وُ وِّ مِنِه خدا. 16پَ ایما محبتی نَه که خدا وَمون دارِه اِشناختیمِه وِ وَش خاطِرجَمیم.
خدا محبتِه وِ کسی که مِنِه محبتِه، مِنِه خدا یَه وِ خدا مِنِه وُّ. 17محبت ایطو مابینِ ایما کامل وابییِه تا مِنِه روزِ داوری خاطِرجَم بِیم، سییِکِه ایما مِنِه ای دنیا هَموطوریم که عیسی هِسی. 18مِنِه محبت زَلَه رَتَن نی، بلکم محبتِ کامل زَلَه رَتَنَه ایکِنِه وَدَر؛ سییِکِه زَلَه رَتَن وَ مکافات سرچشمَه ایگِرِه وِ کسی که زَلَش ایرَه، مِنِه محبت کامل نَوابییِه.
19ایما محبت ایکِنیم سییِکِه اَوَل وِّ ایما نَه محبت کِه. 20اَر کسی اِدعا کِنِه که خدا نَه محبت ایکِنِه امّا وَ کَکاش نفرت داشتَه بو، دِروکِنِه. سییِکِه کسی که کَکِی خِشَه که ایبینِه، محبت نَکِنِه، نیتَرِه خدایی نَه که نَدییِه، محبت کِنِه. 21وِ ایما ای حکمَه وَش گِرُتیمِه که هرکه خدا نَه محبت ایکِنِه، بایِس کَکاشَه هَم محبت کِنِه.
Currently Selected:
نامۀ اَوَلِ یوحنا 4: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
