نامۀ اَوَلِ یوحنا 3
3
1سِی کِنیت بُو چه محبتی وَمون کِردِه تا بَچهیَلِ خدا وَ حساب بییِیم! وِ هَمیطو هَم هِسیم! سی هَمیِنِه که دنیا ایما نَه نیشناسِه، سییِکِه وِّ نَه نَشناخت. 2ای عزیزَل، ایسو بَچهیَلِ خدایِیم، امّا اوچیئی که ایابِیم هَنی آشکار نَوابییِه. امّا دونیم اوسِه که وِّ ظهور کِنِه، مِی وِّ ایابِیم، سییِکِه وِّ نَه هَموطو که هِسی ایبینیم. 3وِ هرکه ایطو امیدی وَش دارِه، خِشَه پاک ایکِنِه، هَموطو که وِّ پاکِه.
4هر کس مِنِه گِنا زِندِیی ایکِنِه وَ ضدِ شریعت عمل ایکِنِه؛ گِنا دَر واقع وَ ضدِ شریعتِه. 5ایشا دونیت که مسیح اومَه تا گِنایَلَه وَ بِین بُویَرِه. مِنِه وِّ هیچ گِنایی نی. 6وِه که مِنِه وِّ پاوَرجا ایوِیسِه گِنا نیکِنه، وِه که مِنِه گِنا زِندِیی ایکِنِه، وِّ نَه نَه دییِه وِ نَه اِشناختِه.
7ای اولادَلِ سَوا، نَلیت کسی وَ رَه وِلِتون کِنه. هرکه بِی صالِحی عمل ایکِنِه، صالحِه، هَموطو که وِّ صالحِه. 8وِه که مِنِه گِنا زِندِیی ایکِنِه وَ اِبلیسِه، سییِکِه اِبلیس وَ هَمو اَوَل گِنا کِردِه وِ ایکِنِه. سی هَمیو کِرِ خدا اومَه تا کارَلِ اِبلیسَه باطل کِنِه. 9وِه که وَ خدا مولود وابییِه گِنا نیکِنِه، سییِکِه سِرِشتِ خدا مِنِش ایوِیسِه؛ پَ وِّ نیتَرِه مِنِه گِنا زِندِیی کِنِه، سییِکِه وَ خدا مولود وابییِه. 10بَچهیَلِ خدا وِ بَچهیَلِ اِبلیس ایطو آشکار ایابون: وِه که اوچیئی که دِرِسِه وَجا نیارِه، وَ خدا نی، وِ هَمیطو وِه که وَ کَکاش محبت نیکِنِه.
وَ یَک محبت کِنیت
11هَم یِنِه پِیومی که وَ اَوَل اِشنُفتیت، که بایِس یِکدو نَه محبت کِنیم. 12ایما نَبایِس مِی قائن بِیم که وَ او شریر بی وِ کَکاشَه کُشت. وِ سیچه وِّ نَه کُشت؟ سییِکِه کارَلِ خُوش بَد بی وِ کارَل کَکاش دِرُس. 13ای کَکایَل، وَ یِکِه دنیا وَتون نفرت دارِه، تعجب نَکِنیت. 14ایما دونیم که وَ مرگ رَی وابیمِه وِ رَه جُسیمِه وَ حیات، سییِکِه کَکایَلِمونَه محبت ایکِنیم. هرکه وَ کَکاش محبت نیکِنِه، مِنِه مرگ وَجا ایوِیسِه. 15کسی که وَ کَکاش نفرت دارِه، قاتلِه وِ ایشا دونیت که هیچ قاتلی مِنِه حیاتِ ابدی منزل نَیارِه.
16محبتَه وَ یِه ایشناسیم که وِّ جونِ خِشَه نَها وَ رَمون، وِ ایما هَم بایِس جونِ خِمونَه بِنیم وَ رَه کَکایَلِمون. 17امّا اَر کسی مالِ دنیا نَه داشتَه بو وِ بِوینِه کَکاش مُتاجِه، وا ای حال تییَشَه وَ ریش بویَندِه، چطو محبت خدا مِنِه ایطو کسی یَه؟ 18ای اولادَلِ سَوا، بییِیت محبت کِنیم، نَه وَ زُوون وِ مِنِه گَپ، بلکم وَ راسی وِ مِنِه عمل!
19ایما وَ یِه دونیم که این حقیقَتیم، که دِلِمونَه مِنِه حضورِ وِّ قرص ایکِنیم، 20سییِکِه هر وخت دِلِمون ایما نَه محکوم کِنِه، خدا گَپوتَر وَ دِلِ ایمانِه وُ وَ هَمَه چی آگا یَه. 21ای عزیزَل، اَر دلِمون، ایما نَه محکوم نَکِنِه، مِنِه حضورِ خدا اِطمینون داریم 22وِ هر چیئی که درخواس کِنیم، وَش ایسونیم، سییِکِه وَ دستورَلِش اطاعت ایکِنیم وِ اوچیئی که باعثِ رضایتِ وِّ نِه وَجا ایاریم. 23وِ یِنِه حُکمِ خدا که وَ نومِ کِرِش عیسی مسیح ایمون بیاریم وِ یِکدو نَه محبت کِنیم، هَموطو که وَمون امر کِه. 24هرکه وَ دستورَلِ وِّ اطاعت ایکِنِه، مِنِه خدا زِندِیی ایکِنِه وِ خدا هَم مِنِه وُّ. وَ وِیچِه دونیم وِّ مِنِه ایما زِندِیی ایکِنِه که روحِ خِشَه وَمون دایِه.
Currently Selected:
نامۀ اَوَلِ یوحنا 3: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
