نامۀ اَوَلِ یوحنا 2
2
مسیح شفیعِ ایمایَه
1ای اولادَلِ سَوا، یِنَه سی ایشا اینِویسُم تا گِنا نَکِنیت. امّا اَر کسی گِنایی کِه، شَفیعی طِی بُو داریم، یعنی عیسی مسیحِ عادل. 2وِّ کفّارۀ گِنایَلِمونِه، وُ نَه تِنا گِنایَلِ ایما، بلکم گِنایَلِ تمومیِ دنیا هَم.
3وَ وِیچِه دونیم وِّ نَه ایشناسیم اَر وَ دَستورَلِش اطاعت کِنیم. 4وِه که ایگُ وِّ نَه ایشناسُم، امّا دَستورَلِشَه نِگَه نیکِنِه، دِروکِنِه وِ حقیقت مِنِش نی. 5امّا وِه که کلامِ وِّ نَه نِگَه ایکِنِه، محبتِ خدا وَراسی مِنِش وَ کمال رَسییِه. وَ وِیچِه دونیم مِنِشیم که: 6هرکه ایگُ مِنِه وِّ ایوِیسِه، باید هَموطو رفتار کِنِه که عیسی رفتار ایکِه.
7ای عَزیزَل، حکمی تازَه سیتون نینِویسُم، بلکم حکمی قدیمی که وِه نَه وَ اَوَل داشتیتِه. ای حکمِ قدیمی، هَمو کلامی یَه که وَ اَوَل اِشنُفتیتِه. 8وا ای حال، حکمی که مِ سیتون اینِویسُم حکمی تازِه یَه که حقیقتِش، هَم مِنِه وُّ وِ هَم مِنِه ایشا دیارِه، سییِکِه تاریکی وَ بِین ایرَه وِ نورِ حقیقی هَمیسِه هَم بِرچ ایزَنِه.
9وِه که ایگُ مِنِه نورِه امّا وَ کَکاش نفرت دارِه، هَنی مِنِه تاریکی یَه. 10وِه که وَ کَکاش محبت ایکِنِه، مِنِه نور زِندِیی ایکِنِه وِ هیچ چیئی باعث نیابو بِسُرِه وِ بییُفتِه. 11امّا وِه که وَ کَکاش نفرت دارِه، مِنِه تاریکی یَه وِ مِنِه تاریکی قَیَم اییَگِرِه. وِّ نُونِه ایرَه وَ کوچو، سییِکِه تاریکی تییَلِشَه کور کِردِه.
12ای اولادَلِ سَوا، وَ ایشا اینِویسُم،
سییِکِه گِنایَلِتون وَ خاطرِ نومِ وُّ آمرزییَه وابییِه.
13ای بُویَل، وَ ایشا اینِویسُم،
سییِکِه وِّ نَه که وَ اَزَل بییِه، ایشناسیت.
ای جَوونَل، وَ ایشا اینِویسُم،
سییِکِه وَ او شریر زور وابیتِه.
ای بَچهیَل، وَ ایشا اینِویسُم،
سییِکِه بُو نَه ایشناسیت.
14ای بُویَل، وَ ایشا اینِویسُم،
سییِکِه وِّ نَه که وَ اَزَل بییِه، ایشناسیت.
ای جَوونَل، وَ ایشا اینِویسُم،
سییِکِه زورداریت وِ کلامِ خدا مِنِه ایشا یَه،
وُ وَ او شَریر زور وابیتِه.
دل نَبَسَن وَ دنیا
15دنیا وِ اوچیئی نَه که مِنِه دنیا یَه، دوس نَیاشتَه بِیت. اَر کسی دنیا نَه دوس داشتَه بو، محبتِ بُو مِنِش نی. 16سییِکِه هر چه مِنِه دنیا یَه، یعنی خواسِهیَلِ نفس، هوسِ چییَلی که تییَه ایبینه وِ ایخوا وِ غُد بییَن سی مال وِ مقام، نَه وَ بُو بلکم وَ دنیا یَه. 17دنیا وِ هَوَسَلِش وَ بِین ایرَه، امّا وِه که ارادۀ خدا نَه وَجا ایارِه، تا ابد پاوَرجا ایوِیسِه.
هشتار درموردِ «ضدّ مسیح»
18ای بچهیَل، یِه ساعتِ آخِرِه وِ هَموطو که اِشنُفتیتِه «ضدّ مسیح» ایایِه، هَمیسِه هَم ضدّ مسیحَلِ زیادی ظهور کِردِنِه، پَ وَ هَمیِه ایفَمیم که ساعتِ آخِرِه. 19اونگَل وَ مِلامون رَتِن وَدَر، امّا وَ ایما نَبییِن؛ سییِکِه اَر وَ ایما بییِن، بامون ایوِیسان. امّا رَتَنِشون نِشون دا که هیچ کویَکیشون نَه وَ ایمایَن.
20امّا ایشا بِی روحالقدس مسح وابیتِه وِ هَمَتون فهم داریت. 21مِ اینگَلَه سیتون اینِویسُم، نَه سییِکِه حقیقتَه نُونیت، بلکم سییِکِه وِه نَه دونیت، وِ هَم دونیت که هیچ دِرویی وَ حقیقت نی. 22دِروکُن کیَه، غیرَ وِه که مسیح بییَنِ عیسی نَه حاشا ایکِنِه. ایطو کسی هَمو «ضدّ مسیح» یَه که هَم بُو وِ هَم کِرَ حاشا ایکِنِه. 23هرکه کِرَ حاشا کِنِه، بُو نَه نَیارِه هرکه کِرَ اقرار کِنِه، بُو نَه هَم دارِه.
24بِلیت اوچیئی که وَ اَوَل اِشنُفتیتِه پاوَرجا وِیسِه مِنِتون؛ اَر اوچیئی نَه که وَ اَوَل اِشنُفتیتِه پاوَرجا وِیسِه مِنِتون، ایشا هَم مِنِه کُر وِ مِنِه بُو پاوَرجا ایوِیسیت. 25وِ یِنِه اوچیئی که وِّ وَمون وَعدَه دایِه، یعنی حیات ابدی.
26مِ اینگَلَه درموردِ کَسَلی سیتون اینِویسُم که ایخوان ایشا نَه وَ رَه وِلِ کِنِن. 27امّا درموردِ ایشا بایِس بِگُم او مَسحی که وَ وِّ گِرُتیتِه، مِنِه ایشا ایوِیسِه وِ اِتیاجی نَیاریت کسی وَتون تعلیم بییِه، بلکم مسحِ وِّ درموردِ هَمَه چی وَتون تعلیم اییِه. او مَسح، حقیقی یَه، نَه وَ دِرویَه. پَ هَموطو که وَتون تعلیم دایِه، مِنِش پاوَرجا وِیسیت.
بَچهیَلِ خدا
28وِ ایسو، ای اولادَلِ سَوا، هَمیطو مِنِه وِّ پاوَرجا وِیسیت تا اوسِه که وِّ اُمبِلا اییَرگَردِه، اِطمینون داشتَه بِیم وِ موقِی اومَیَنِش وَش شرمَندَه نَوابِیم. 29اَر فَمِسیتِه که وِّ صالحِه، پَ خاطرجَمیت که، وِه که صالحی نَه وَجا ایارِه، وَ وِّ مولود وابییِه.
Currently Selected:
نامۀ اَوَلِ یوحنا 2: SLB
Highlight
Share
Compare
Copy
Want to have your highlights saved across all your devices? Sign up or sign in
@ 2024 Korpu Company
