کَرِی حَوارِنیا 4

پِطرُس و یوحَنا جلووِ شورا

1پِطرُس و یوحَنا هَنو خاد مردم حرف شواَزاد که کاهِنیا و فَرموندَه نگهبونِی معبد و عالمِی فِرکَهِ صَدّوقی رَسِدِت. 2و آنایا بُری تَریخ هادِت وَخاطر اِکِه حَوارِنیا شُن مردم تعلیم اَدَ و اعلام شواَکِه که اُ واسطَهِ عیسی، مُردَیّا زندَه اَدَبِت. 3پَ اُ آنایا شُگِرِت و اَسِی که پَسین هاد، تا رازِ بعد تِک زندان نِگَه شُکِردِت. 4ولی بُری از آنایاکِه مِ کلوما شُشُنُفتِستاد، ایمون شُئو و تعداد مَردِی که ایمون شُئو تقریبا اُ پنج هزار نفر رَسی.

5رازِ بعد، رئیسِی یهودِنیا و شیخیا و معلمِی تورات تِک شهر اورشلیم دوریَه جمع آبُدِت. 6حَنّا گَپترین کاهِن، قیافا، یوحَنا، اسکندر و هَمَهِ خونوادَه گَپترین کاهِن تِی مِ مجلسا هادِت. 7آنایا اُ پِطرُس و یوحَنا شُئو، شُن مارَکَه نَه، و از آنایا شُپُرسی: «وَ چه کُدرتی یا وَ چه اسمی اِ کَرا تُکِه؟»

8مِ موکَوا پِطرُس از روح کدّوس خدا پُر بو، و شُ آنایا گُت: «اَی رئیسِی کوم و اَی شیخیا، 9اَگَه اِراز اَما وَخاطر مِ خوبِنی که در حَک یَک آدام فلج مُکِردِ بازخواست اَبِم، که چینا شفا اُشگِرِتِه، 10پَ هَمَهِ شما و هَمَهِ کوم اسرائیل بِدانی که وَ اسم عیسی مسیح ناصریه که اِ مَردا جلوتو صحیح و سالم وَایستَدِ، مِ عیسایی که شما تُن صلیب کَشی، مِ که خدا اُ آنا از مُردَیّا زندَه شاکِه. 11اِ عیسی مِ سنگیه که شما معماریا رَد تُکِه، مِ که سنگ اصلِنِ ساختمون بُدِ.

12غیر از آنا تِی هِسکَه نجات نی، اَسِی که زِرِ آسِمو اسمِیدو اُ آدامیزاد دَدَ نِبُدِ تا اُ واسطَهِ آنا نجات پیدا بِکنِم.»

13وَختی آنایا شُدی پِطرُس و یوحَنا دِلِرزِت و شُفَهمی که آدامِی بیسواد و نا واردی هِت، هُشکشو اُشزاد. آنایا شُفَهمی که پِطرُس و یوحَنا خاد عیسی بُستِت. 14ولی وَختی شُدی مِ مردی که شفا اُشگِرِتِستاد حَدِ پِطرُس و یوحَنا وَایستَدِستاد، دِگَه شُنِشابو وَ ضد آنایا چِی بِگائِت. 15ولی وَختی فَرمو شُدَ که آنایا از شورا دَر اُچِت، آنایا اُمرَییَه شَستِت اَسِی شُور کِردَ. 16آنایا شواَگُت: «خاد اِ مَردیا چه بِکنِم؟ اَسِی که هَمَهِ آدامِی که تِی اورشلیم زندگی اَکنِت، اَدانِت که عَلَنی معجزه‌ای اُ واسطَهِ اِیا اَنجوم بُدِ و اَما مُناشابِه حاشا بِکنِم. 17ولی تا اِ خبرا بِشتَه از اِ بین مردم پَخش نِبُدِ، بِلگی اُ اِ مَردیا هشدار هاتِم که دِگَه خاد هِسکَه وَ اسم عیسی حرف نِزنِت.»

18مِ موکَوا شُن آنایا جار زاد و کَدَغان شُکِه که اصلاً وَ اسم عیسی، نِه حرفی بِزنِت و نِه تعلیمی هاتِت. 19ولی پِطرُس و یوحَنا اینا شُن آنایا جواب دَ: «شما خوتو کضاوت بِکنی، چه یَک از نظر خدا وَلمِه، گاش کَر کِردَ اُ حرف شما یا گاش کَر کِردَ اُ حرف خدا؟ 20اَسِی که اَما مُناشابِه دربارَهِ چِی که مُدِدِ و مُشُنُفتِ حرف نِزنِم.»

21اعضای شورا بعد از اِکِه اُ پِطرُس و یوحَنا بُری تهدید شُکِه، وِلشو شُکِه، اَسِی که دلیلی شُنانِجو که مجازاتشو بِکنِت، اَسِی که هَمَهِ مردم خدائا وَخاطر چِی که اتفاک اُفتَدِستاد، حمد و ستایش شواَکِه. 22اَسِی که مردی که اِ معجزه شفا لِی آنا اَنجوم بُدِستاد، بِشتَه از چهل سال اُشهاد.

ایمونداریا اَسِی دِلِرزی دعا اَکنِت

23وَختی پِطرُس و یوحَنا آزاد بُدِت حَدِ رَفیکیاشو چِدِت و هرچی که کاهِنِی گَپ معبد و شیخیا شُن آنایا گُتِستاد، نَکل شُکِه. 24آنایا وَختی اِئا شُشُنُفت، هَمَه اُمرَییَه وَ صدای بلند اُ درگاه خدا دعا شُکِه، شُگُت: «اَی خداوندی که حاکم مَچی هِش، اَی تویی که آسِمو و زِمی و دریا و هرچی که شُن تِکِه نَک اُتکِه، 25تو خوت اُ واسطَهِ روح کدّوس خدا از زابُنِ جَدمو، نوکرُت داوود پادشاه، اُتگُت که:

«”اَسِی چه ملتیا شورش اَکنِت

و کومیا اَلَکی نَکشَه اَکَشِت؟

26پادشاهِی زِمی صَف اَکَشِت،

و حاکمیا دوریَه جمع اَدَبِت،

وَ ضد خداوند

و وَ ضد مسیحُش.“

27حکیکتاً که تِی هَمِ شهرا، هم هیرودیس و هم فَرموندار رومی، پُنتیوس پیلاتُس خاد غیریهودِنیا و کوم اسرائیل وَ ضد خادم مکدّسُت عیسی که اُ آنا مَسح و تعیین اُتکِه، هَمدَست بُدِت، 28تا هرچی که دستُت و نَکشَه‌ات از کَبل معین اُشکِردِستاد، اَنجوم هاتِت. 29اَلَه، اَی خداوند، تهدیدیاشو بِبِن و اُ نوکریات نظر بِکو تَ هَمینا وَ دِلِرزِنِ تَموم، از کلومُت حرف بِزنِت، 30و دستُت هم اَسِی شفا دراز بِکو و اُ واسطَهِ اسم خادم مکدّسُت عیسی، نِشونَه‌یّا و معجزه‌یّا آشکار بِکو.»

31بعد از اِکِه دعا شُکِه، جَی که آنکا جمع هادِت لَرزِئِست و آنایا هَمَه از روح کدّوس خدا پُر بُدِت، و از کلوم خدا وَ دِلِرزی حرف شواَزاد.

شریک بُدَئِه ایمونداریا تِک مَچی

32هَمَهِ ایمونداریا یَک دل و جو هادِت و هِسکَه اُشناگُت چِی از مال و مِنالُش، مال خوشِه، بلکه آنایا تِی مَچی اُمرَییَه شریک هادِت. 33حَوارِنیا وَ کُدرت گاتی اُ زندَه آبُدَئِه خداوندْ عیسی شهادت شواَدَ و فیض گاتی لِی هَمَهِ آنایا هاد. 34بین آنایا هیچ آدامی محتاج نِهاد، اَسِی که هرکَه زِمی یا خونَه‌ای اُشهاد، شَفِرَت و پول چِی که اُشفِرَتِستاد، شَدائو 35شُ جلووِ پَی حَوارِنیا اَنَه تا طِبک نیاز هرکَه بینشو تکسیم بِبِه. 36یوسف هم که از طایفَهِ لاوی و مال قپرس هاد و حَوارِنیا شُن آنا بَرنابا یعنی ’مشوّق‘ جار اَزاد، 37زِمِنی که اُشهاد، اُشفِرَت و پولُش شَئو، شُ جلووِ پَی حَوارِنیا نَه.

Currently Selected:

کَرِی حَوارِنیا 4: LAB

Highlight

Copy