کَرِی حَوارِنیا 3

شفای گَدَی لَنگ

1یَک راز، پِطرُس و یوحَنا ساعت سه پِشین که موکَهِ دعا هاد، اُ معبد اَچِدِت. 2مِ موکَوا، چند نفر، اُ یَک مردی که مادرزادی لَنگ هاد، شودائو. آنایا اُ آنا هر راز حَدِ مِ دروازَهِ معبدا که اسمُش ’دروازَهِ جوهو‘ هاد شواَنَه تا از مردمی که اُ تِک معبد اَچِدِت، صَدکَه بِگِرِ. 3وَختی مِ لَنگا اُشدی که پِطرُس و یوحَنا شُئِه اُ تِک معبد اُچِت، از آنایا صَدکَه شَئِست. 4پِطرُس و یوحَنا چَش شُن لِی آنا بِست؛ پِطرُس شُ آنا گُت: «اُ اَما چَش بِکو!» 5پَ مِ مَردا چَش شُ آنایاکِه و تَوکُع اُشهاد چِی شاتِت.

6ولی پِطرُس اُشگُت: «ما طِلا و نُکرَه اُمنی، ولی مِ چِی که اُمَ اُ تو اَتام! وَ اسم عیسی مسیح ناصری آپابِش و رَه اُچا!» 7بعد پِطرُس دست راست مِ مَردا اُشگِرِت و بلند شاکِه. مِ موکَوا پَی‌یاش و مُلَک پَی‌یاش جو اُشگِرِت 8مِ مَردا از جاش جَخت و لِی پَی‌یاش وَایستَ، اُ رَه اُفتَه. هَمیناکِه رَه اَچو و اَزتام اَجَخت و اُ خدا حمد و ستایش شَکِه، اُمرَهِ آنایا اُ تِک معبد چو. 9هَمَهِ مردم اُ آنا شُدی که رَه چِدا و اُ خدا حمد و ستایش کِردا، 10و شُشناسی که اِ هَمِئِه که حَدِ ’دروازَهِ جُهُنِ‘ معبد اَشَست و صَدکَه شَگِرِت؛ پَ، از مِ چِی که اَسِی مِ مَردا اتفاک اُفتَدِستاد، بُری تعجب شُکِه و هُشکشو اُشزاد.

پیغوم پِطرُس تِک تالار سلیمون

11هَمیناکِه مِ مَردا اُ پِطرُس و یوحَنا نُتِستاد، هَمَهِ مردم هُشکشو اُشزادِستاد و تِک ’تالار سلیمون‘ هَمَه اُمرَییَه اُ طرف آنایا شُنخیزکِه. 12وَختی پِطرُس اِئا اُشدی، لو شُ طرف مردم کِه و اُشگُت: «اَی مَردِی اسرائیلی، اَسِی چه از اِ کَرا تعجب کِردای؟ اَسِی چه چَش تُن لِی اَما بِستِه، اُنگار که وَ کُدرت و دیندارِنِ خومو، کَری مُکِردِ که اِ مَردا رَه اُچِه؟ 13خدای ابراهیم، خدای اِسحاک و خدای یعکوب، خدای بابَیّامو، اُ خادمُش عیسی جلال اُشدَ، مِ عیسایی که شما تُن تحویل دَ و جلووِ پیلاتُس فَرموندار حاشاش تُکِه، با اِکِه پیلاتُس تصمیم اُشگِرِتِستاد که آزادُش بِکو. 14ولی شما اُ آناکِه مکدّس و صالح هاد حاشا تُکِه و تُئِست که اُ یَک کاتِل تُنسِه آزاد بِکنِت. 15شما سرچشمَه زندگیا تُکُشت، مِکِه خدا اُ آنا از مُردَیّا زندَه شاکِه. اَما شاهدِی آنا هِم. 16مِ چِی که اُ اِ مَردا که دِدای و اَشناسی، کُوّت اُشدَدِ، اسم عیسی و ایمون اُ اسمُشِه. مِ ایمونی که اُ واسطَهِ عیسائِه، اُ اِ مَردا جلووِ لوی هَمَتو سلامتِنِ کامل اُشدَدِ.

17«اَلَه اَی کاکَیّا، اَدانام که شما از لِی نادونی رفتار تُکِه، هَموناکِه رئیسیاتو شُکِه. 18ولی خدا مِ چِه‌وا که از زابُنِ هَمَهِ پیغامبریا وَ جلو اُشگُتِستاد، شُ اَنجوم رَسِنَه: اِکِه مسیحُش عذاب اَکَشِه. 19پَ توبَه بِکنی و اُ طرف خدا واگَردی تَ گناهیاتو پاک آبِه، 20تَ از حضور خداوند زَمون تَزَه آبُدَ بِرَسِه، و تا خداوند، مسیحا که از کَبل اَسِی شما معین اُشکِردِستاد، بِفرِستِ، یعنی عیسی‌ئا 21که باید تِک آسِمو وامانِه تا زَمونی که مَچی طِبک مِ چِی که خدا وَ زابُنِ پیغامبرِی مکدّسُش از تیتَه اُشگُتِه، دَفَیدو وَلم آبِه. 22موسی پیغامبر اُشگُت: ”خداوندْ خدا، از بین کاکَیّاتو، پیغامبری چُنِ ما اَسِی شما اَفرِستِ، شما باید هرچی که آنا اُ شما اَگِه گاش کَر بِکنی. 23هرکَه اُ مِ پیغامبرا گاش کَر نِکو، از بین کوم نابود اَبِه.“

24«سموئیل پیغامبر و پیغامبرِی بعد از سموئیل، هَمَشو دربارَهِ اِ رازیا پیشگویی شُکِردِ. 25شما بَچِی پیغامبریا و وارث عهدی هی که خدا خاد بابَیّاتو اُشبَست. خدا شُ ابراهیم گُت: ”اُ واسطَهِ نَسل تو هَمَهِ کومِی لِی زِمی برکت اَگِرِت.“ 26موکَه‌ای که خدا اُ خادمُش عیسی معین اُشکِه و اُشفِرِستَ، اوّل آنا شُحَدِ شما فِرِستَ تا اُ هر یَکتو از شرارتتو تُواگَردِنِه، و از اِ طریقا اُ شما برکت هادَ.»

Currently Selected:

کَرِی حَوارِنیا 3: LAB

Highlight

Copy